Lucas 1:1-80

ATADXUN NÁA AJNGÁA

Ajngáa rí na̱jkha̱ inuu Teófilo (1-4)
Gabriel naʼtáriyaʼ rí magumaa Juan bi̱ Nakumíinʼ iyááʼ xa̱bu̱ (5-25)
Gabriel naʼtáriyaʼ rí magumaa Jesús (26-38)
María na̱jkha̱ gáʼyoo Elisabet (39-45)
María naʼni mba̱a̱ Jeobá (46-56)
Nagumaa Juan ga̱jma̱a̱ nuxnáá mbiʼyuu (57-66)
Dí niʼtáriyaʼ Zacarías (67-80)

1 Mbaʼin ni̱ndxu̱ún bi̱ ninirámáʼ kuduun kayuuʼ rí ni̱ʼkha̱ rarígá, rí ikháanʼxu ndu̱ya̱a̱ rí xúʼko̱ phú nirígá,+ ² xó má nituxu bi̱ ndiyáá xú káʼnii phú ni̱ʼkha̱ rarígá+ ga̱jma̱a̱ bi̱ nutaraʼa ajngá rawuunʼ Dios.+ ³ Ikha jngóo mangúún, ndiʼyáʼ mba̱yo̱o̱ tsu̱ma̱á xú káʼnii phú nirígá asndu nákha nigi̱ʼdu̱u̱. Ikha jngóo niʼgíʼ ninirámáʼ xó má ni̱ʼkha̱ rarígá, tátá Teófilo,+ ⁴ mu ma̱ndoo ma̱ta̱ya̱a̱ rí xúgíʼ rí nisngáaʼ nindxu̱u̱ gajkhun.+ ⁵ Mbiʼi rí nixtáa Herodes*+ raʼtáñajunʼ xóo rey náa Judea, nixtáa ikhí mbáa ndxajkun bi̱ mbiʼyuu Zacarías, bi̱ xtáa náa ndxajkun bi̱ nixna mbiʼñún Abías.+ Ga̱jma̱a̱ a̱ʼgiu̱u̱ Zacarías na̱ʼkha̱ náa e̱ji̱i̱n* Aarón, ikhaa mbiʼyuu Elisabet. ⁶ Nájmi̱i̱n ikhiin ninindxu̱ún xa̱bu̱ míjíinʼ náa iduu Dios ga̱jma̱a̱ nunimbáníí májánʼ xúgíʼ kiʼtáñajunʼ ga̱jma̱a̱ xúgíʼ rí na̱nda̱ʼa̱ maguma Jeobá.* ⁷ Mú na̱nguá niguáʼdaa nimbáa ada̱ numuu rí Elisabet tségiʼdiin e̱ji̱n, ga̱jma̱a̱ mbá nájmi̱i̱n wanii má. ⁸ Zacarías nindxu̱u̱ ndxajkun ga̱jma̱a̱ nixtáa rañajunʼ náa inuu Dios mbiʼi rí kaʼyoo.+ ⁹ Xó má awan rí nigájnuu rí muni̱ ndxajkun, ikhaa kaʼyoo matsiká rí ndataun* náa guʼwá rí nduyamajkuíí Jeobá.*+ ¹⁰ Mbiʼi rí ikhaa matsiká rí ndataun, xúgíinʼ xa̱bu̱ kúwá rexa̱a̱ rutajkáan. ¹¹ Ikhú ángel ndrígóo Jeobá* nisngájmaminaʼ náa ikhaa. Wíji̱ náa níjniú mújúunʼ náa nakarámáʼ rí ndataun. ¹² Índo̱ Zacarías ndiʼyoo ángel, ni̱jkha̱ a̱jkiu̱u̱n ga̱jma̱a̱ nimíñuu wéñuuʼ. ¹³ Mú ángel niʼthúu̱n: “Xámíñáaʼ Zacarías, numuu rí Dios niʼdxawuun dí naratájkáan. A̱ʼgia̱a̱ʼ Elisabet magiʼdaa mbáa ada̱ ga̱jma̱a̱ maraxna mbíʼíí Juan.+ ¹⁴ Maraxtaa tsímáá, maʼdxaaʼ wéñuuʼ ga̱jma̱a̱ mbaʼin maʼdxúún rí maxtáa.+ ¹⁵ Numuu rí magiʼdoo numuu náa iduu Jeobá.*+ Ga̱jma̱a̱ maxágáan nditháan vino ní má i̱ʼwáʼ iya najnga̱a̱.+ Asndu nákha kajkuéwáan magiʼdoo espíritu santo.*+ ¹⁶ Ga̱jma̱a̱ maʼni rí mbaʼin e̱ji̱i̱n Israel matangi̱ín náa Jeobá* Dios ndrígu̱ún.+ ¹⁷ Ikhaa maʼga inuu Dios ga̱jma̱a̱ magiʼdoo espíritu ga̱jma̱a̱ tsiaki̱i̱ ndrígóo Elías,+ mu maʼni rí a̱jkiu̱ún xabuanii mata̱nga̱a̱ maʼni xóo a̱jkiu̱ún e̱ji̱n+ ga̱jma̱a̱ maʼni rí bi̱ tsénimbu̱ún matangi̱ín náa ku̱ma̱ rí májánʼ ndrígu̱ún xa̱bu̱ míjíinʼ, ga̱jma̱a̱ maʼni rí xa̱bu̱ makuwá xawii mu mani̱ndxu̱ún xuajñuu Jeobá”.*+ ¹⁸ Zacarías niʼthúu̱n ángel: “Xú káʼnii gáyóo á mu gajkhun rígi̱ rá. Numuu rí ikhúún ga̱jmu̱ʼ a̱ʼgiu̱ʼ waniáaʼxu̱ má”. ¹⁹ Ikhú ángel niʼthúu̱n: “Ikhúún ni̱ndxu̱ʼ Gabriel+ bi̱ xtáa má xúʼko̱ náa inuu Dios,+ ga̱jma̱a̱ kaxúʼmún ma̱ʼkhá gátha̱a̱nʼ ajngáa rí májánʼ rígi̱. ²⁰ Mú, natayáá ráʼ. Maguanáaʼ chíjmáa,* xándoo gárata asndu mbiʼi rí gámbánuu rígi̱, numuu rí tátanimba̱a̱ʼ rí nitha̱a̱nʼ rí mambanúu mbiʼi rí kaʼyoo”. ²¹ Mú xa̱bu̱ kúwá ruguáʼthi̱i̱n Zacarías ga̱jma̱a̱ nitháán a̱jkiu̱ún, numuu rí ndajyúuʼ wéñuuʼ náa guʼwá rí nduyamajkuíí Dios. ²² Índo̱ nigájna̱a̱ ni̱jkha̱ ajngóo ga̱jma̱a̱ xa̱bu̱ núkhu má nitsu̱mu̱ún rí ndiʼyoo mbá milagro náa guʼwá rí nduyamajkuíí Dios. Numuu rí nánguá eʼthí, ikha jngóo i̱ndó ñawúunʼ eʼni. ²³ Índo̱ nirámuuʼ mbiʼi rí kaʼyoo mañajunʼ náa guʼwá rí nduyamajkuíí Dios, ikhú ni̱jkha̱a̱ goʼwóo. ²⁴ Nguáthá mbiʼi nda̱wa̱á Elisabet a̱ʼgiu̱u̱ Zacarías niguewáan ada̱* ga̱jma̱a̱ tágájnuu náa goʼwóo mbá witsu igu̱nʼ. Ikhaa niʼthí: ²⁵ “Rígi̱ rí Jeobá* niʼni xúgi̱ ga̱jma̱á numuʼ. Nirmáʼáan a̱jkiu̱u̱n kaʼyoʼ mu xa̱bu̱ ní xúni̱ májtiu̱u̱nʼ”.+ ²⁶ Índo̱ ikhaa naʼni má majun igiu̱u̱nʼ, Dios nikungua̱a̱nʼ ángel Gabriel+ náa xuajin Nazaret rí naʼtáñajuunʼ Galilea ²⁷ maʼga gáʼyoo mbáa dxáʼgú*+ bi̱ mbiʼyuu María,+ bi̱ xtáa mbayáa xa̱bu̱ bi̱ mbiʼyuu José, bi̱ na̱ʼkha̱ náa David. ²⁸ Índo̱ ángel nito̱ʼo̱o̱, niʼthúu̱n: “Wajtsa̱a̱ʼ María, Jeobá* ra̱ʼkhá tháán edxuu kaʼyaaʼ, ikhaa xtáa ga̱jma̱á nindxa̱a̱ʼ ga̱jma̱a̱ naʼni tsajkurámáánʼ”. ²⁹ Mú ikhaa niʼniuu tsiánguá ga̱jma̱a̱ rí niʼthúu̱n ga̱jma̱a̱ niʼniminaʼ makro̱ʼo̱o̱ náá numuu dí xúʼko̱ nirajxi̱i̱. ³⁰ Mú ángel niʼthúu̱n: “Xámíñáaʼ María numuu rí Dios nadxuu kaʼyaaʼ. ³¹ Lá natayáá ráʼ. Midewáan mbáa ada̱+ ga̱jma̱a̱ índo̱ gáxtáa maraxna mbiʼíí Jesús.+ ³² Ikhaa magiʼdoo numuu+ ma̱ngaa magumbiʼyuu A̱ʼdióo bi̱ phú Mba̱a̱,+ ga̱jma̱a̱ Jeobá* Dios maxnúu xíliu̱u̱* David bi̱ nindxu̱u̱ anu̱u̱.*+ ³³ Ga̱jma̱a̱ maʼtáñajunʼ náa goʼwóo Jacob asndu kámuu. Xáʼga̱nú mambáa rí maʼtáñajunʼ”.+ ³⁴ Mú María nirajxu̱u̱ ángel: “Xú káʼnii gándoo gárígá rúʼko̱ á mu ikhúún xóó tséboʼ ga̱jmu̱ʼ nimbáa xa̱biya̱ rá.”+ ³⁵ Ikhú ángel niʼthúu̱n: “Espíritu santo ma̱ʼkha̱ náa ikháán+ ga̱jma̱a̱ tsiaki̱i̱ ndrígóo bi̱ phú Mba̱a̱ maruguamáʼáán* ga̱jma̱a̱ ndájkhoo. Ikha jngóo bi̱ magumaa magumbiʼyuu bi̱ kaʼwii,+ A̱ʼdióo Dios.+ ³⁶ Elisabet bi̱ xtayáá bi̱ nikhi̱i̱ má, ma̱ngaa kaguewáan mbáa ada̱. Ikhaa bi̱ xa̱bu̱ nuthi rí tséʼnii e̱ji̱n, rí xúgi̱ naʼni má majun igiu̱u̱nʼ, ³⁷ numuu rí nda̱a̱ nimbá dí mingíjyúuʼ eʼyoo Dios”.+ ³⁸ Ikhú María niʼthí: “¡Gi̱jyooʼ xtáá manimbánuu rí nandoo Jeobá!* Garigá xó má niratá”. Ikhú ángel ni̱jkha̱a̱. ³⁹ Nguáthá mbiʼi nda̱wa̱á, María ni̱jkha̱ mbá nacha̱ náa kúbá mu maʼga náa mbá xuajin rí naʼtáñajuunʼ Judá, ⁴⁰ nikágaa náa goʼwóo Zacarías ga̱jma̱a̱ nirajxi̱i̱ Elisabet. ⁴¹ Índo̱ Elisabet niʼdxuun aʼwóo María, ada̱ bi̱ kua̱ʼa̱a̱n awúu̱n nikijxi̱i̱. Ikhú nirígá espíritu santo náa Elisabet ⁴² ga̱jma̱a̱ gakhi̱i̱ niʼthí: “¡Gaguma tsajkurámáánʼ náa majñu̱únʼ gu̱ʼu̱ ga̱jma̱a̱ xúʼko̱ má ada̱ bi̱ xtá ewáan! ⁴³ Tsáá lá ni̱ndxu̱ʼ wéñuuʼ rí asndu ru̱dúu̱* Tátioʼ ma̱ʼkha̱ gáʼyoʼ rá. ⁴⁴ Numuu rí índo̱ nidxawuun rí nitrajxúún nidxuu a̱ʼdióʼ ga̱jma̱a̱ núkhu nikijxi̱i̱. ⁴⁵ Ma̱ngaa gagi xtáa a̱ʼgu̱ bi̱ niʼnimbo̱o̱, numuu rí xúgíʼ dí niʼthúu̱n Jeobá* mambanúu”. ⁴⁶ Ikhú María niʼthí: “Na̱ni̱ mba̱a̱ Jeobá*+ ⁴⁷ ga̱jma̱a̱ nadxuʼ wéñuuʼ ka̱yo̱o̱ Dios ndrígóʼ, bi̱ Naʼni kríñu̱u̱nʼ,+ ⁴⁸ maski ajndu nda̱a̱ numuʼ mú ikhaa ndiñúunʼ mu ma̱ni̱ rí nandoo.+ ¡Ga̱jma̱a̱ asndu mbiʼi xúgi̱, xúgíinʼ xa̱bu̱ bi̱ gáguwáʼ rakúwi̱i̱n muthunʼ rí xtáá gagi!+ ⁴⁹ Numuu rí Dios bi̱ gíʼdoo tsiaki̱i̱, mba̱a̱ rí niʼni ga̱jma̱á numuʼ ga̱jma̱a̱ mbiʼyuu nindxu̱u̱ kaʼwu.+ ⁵⁰ Xúgíinʼ xa̱bu̱ bi̱ naguwáʼ rakúwá bi̱ namíñúún kuyáá, nagáwíinʼ a̱jkiu̱u̱n kaʼñún.+ ⁵¹ Phú mba̱a̱ rí ikhaa niʼni ga̱jma̱a̱ tsiaki̱i̱ ndrígóo. Nixkadíin bi̱ nuxuximíjna̱.+ ⁵² Xa̱bu̱ mbaʼwi̱i̱n bi̱ nutañajunʼ nixkríguíin náa xíliu̱ún+ ga̱jma̱a̱ xa̱bu̱ guabiinʼ nikujxíín.+ ⁵³ Bi̱ naxkidxu̱u̱n naxnún rí májánʼ mu̱phu̱ asndu magiʼmún+ mú bi̱ guáʼdáá i̱ndó ñawúúnʼ ekuʼmiin magúun. ⁵⁴ Ni̱ʼkha̱ mu mambáyúu xa̱bi̱i̱, Israel, índo̱ nirmáʼáan a̱jkiu̱u̱n rí nikudaminaʼ dí magáwíinʼ a̱jkiu̱u̱n kaʼyoo+ ⁵⁵ Abrahán ga̱jma̱a̱ bi̱ gáguwáʼ* náa ikhaa+ asndu kámuu xó má nimbánuu gajmíi̱n wajin xiʼñúlú”. ⁵⁶ María niguanúu ga̱jma̱a̱ Elisabet ajtsú igu̱nʼ, nda̱wa̱á nitanga̱a̱ goʼwóo. ⁵⁷ Ikhú ni̱jkha̱nú mbiʼi rí Elisabet magiʼdaa a̱ʼdióo, nigiʼdaa mbáa dxámá. ⁵⁸ Índo̱ xa̱bu̱ bi̱ kúwá mijngii náa xtáa ga̱jma̱a̱ bi̱ kaʼñún ndiyáá xú káʼnii Jeobá* nigáwíinʼ a̱jkiu̱u̱n kaʼyoo, ikhú mangiin nikúwá gagi.+ ⁵⁹ Índo̱ nirámuuʼ migiñuʼ mbiʼi rí nigumaa ada̱. Nigún kuya̱a̱ mu mu̱thu̱ xtóo xuyuuʼ tsáʼkhúun,+ ga̱jma̱a̱ nindúún muxna mbiʼíí Zacarías, numuu rí xúʼko̱ mbiʼyuu anu̱u̱. ⁶⁰ Mú ru̱dúu̱ niʼthí: “¡Xágumbiʼyuu xúʼko̱! Juan gáʼni mbiʼyuu”. ⁶¹ Ikhú ikhiin nitháán: “Nimbáa bi̱ xtayáá na̱nguá mbiʼyuu xúʼko̱”. ⁶² Ikhú nini̱ ñawúúnʼ mu murajxi̱i̱ anu̱u̱ ada̱ xú káʼnii eyoo ikhaa rí magumbiʼyuu a̱ʼdióo. ⁶³ Ikhú ninda̱ʼa̱ mbá xuíʼtóo xajpa ga̱jma̱a̱ ikhí niʼnirámáʼ: “Juan mbiʼyuu”.+ Ikhú xúgíinʼ niʼniún tsiánguá. ⁶⁴ Núkhu ni̱ʼkha̱a̱ ajngóo ga̱jma̱a̱ nigriya̱a̱ʼ niʼthí,+ ikhú niʼni mba̱a̱ Dios. ⁶⁵ Mbá xúgíinʼ xa̱bu̱ bi̱ kúwá mijngii náa xtáa niʼniún tsiánguá ga̱jma̱a̱ mbá xúgíinʼ bi̱ kúwá náa kúbá rí kaʼyoo Judea, nigíʼdi̱i̱ nithi ga̱jma̱a̱ numuu rígi̱. ⁶⁶ Xa̱bu̱ bi̱ nidxawíín dí nirígá, niyejxi̱i̱ náa a̱jkiu̱ún rí nidxawíín ga̱jma̱a̱ nithi: “Ndiéjunʼ lá gáʼni ada̱ bugi̱ índo̱ gágaja̱a̱ rá. Numuu dí nakujmaa kaʼwu rí Jeobá* xtáa ga̱jma̱á nindxu̱u̱”. ⁶⁷ Ikhú nirígá espíritu santo náa Zacarías, anu̱u̱ ada̱, ga̱jma̱a̱ niʼtáriyaʼ: ⁶⁸ “Gaguma mba̱a̱ Jeobá* Dios ndrígóo Israel,+ numuu rí nigáwíinʼ a̱jkiu̱u̱n kaʼyoo xuajñuu ga̱jma̱a̱ niʼni kríya̱a̱ʼ.+ ⁶⁹ Niʼni rí náa goʼwóo David+ ma̱ʼkha̱ mbáa bi̱ maʼni káwáanʼ,*+ mbáa bi̱ gíʼdoo tsiaki̱i̱. ⁷⁰ Xó má nithi profetas* bi̱ niguájun jmbu bi̱ nikúwá nákha wajyúuʼ,+ ⁷¹ mu maʼni káwáanʼ náa xa̱bu̱ sia̱nʼ ga̱jma̱a̱ náa ñawúúnʼ xúgíinʼ xa̱bu̱ bi̱ nawiñu̱u̱nʼ kuyulú,+ ⁷² mu magáwiinʼ a̱jkiu̱u̱n kaʼyulú ga̱jma̱a̱ numún wajin xiʼñúlú ma̱ngaa mu makuma̱a̱ rí mitsaanʼ* dí nikudaminaʼ maʼni,+ ⁷³ rí nimbánuu ga̱jma̱a̱ wajin xiʼñúlú Abrahán,+ ⁷⁴ nda̱wa̱á rí maʼni káwáanʼ náa ñawúúnʼ xa̱bu̱ sia̱nʼ, maxnúlú mbá ñajunʼ mitsaanʼ ga̱jma̱a̱ rí xámíñulú mu̱ʼni̱ ñajuunʼ rí mitsúʼkháan, ⁷⁵ ga̱jma̱a̱ náa xúgíʼ mbiʼi rí gákuwáanʼ maʼni mbóó a̱jkiu̱lú ga̱jma̱a̱ mu̱ʼni̱ rí májánʼ. ⁷⁶ Ga̱jma̱a̱ ikháán, a̱ʼdióʼ bi̱ chíʼgíiʼ,* magumbiʼyaaʼ profeta ndrígóo bi̱ phú Mba̱a̱, numuu rí mi̱dxu̱ʼ giníín náa inuu Jeobá* mu matani̱ májáán’ kambo̱o̱,+ ⁷⁷ mu maraxnu̱u̱n ku̱ma̱ rí xóo makáwíin xa̱bu̱ xuajñuu índo̱ gáʼni mba̱a̱ a̱jkiu̱u̱n kaʼyoo aʼkhúún,+ ⁷⁸ numuu rí Dios ndrígúlú nagáwíinʼ a̱jkiu̱u̱n kaʼyulú. Ga̱jma̱a̱ numuu rúʼko̱, asndu mekhuíí mambiʼi náa ikháanʼlú mbá aguʼ xóo rí nambiʼi índo̱ najtsi, ⁷⁹ mu mambiʼñún bi̱ tri̱gi̱i̱n náa mikína mbiʼ+ ga̱jma̱a̱ mu maxná ikhulú náa kamba̱a̱ dí tsímáá”. ⁸⁰ Ada̱ ni̱jkha̱ ragaja̱a̱, niʼni migújkuiiʼ ga̱jma̱a̱ espíritu santo ndrígóo Dios, nixtáa náa ku̱ba̱ʼ mijxooʼ* asndu mbiʼi rí nisngájmaminaʼ pa̱jnu náa Israel.