Apocalipsis 5:1-14
5 Náa ñawún mújúunʼ bi̱ gíʼ náa xílí*+ ndi̱yo̱o̱ mbá rollo dí kiʼnirámáʼ náa mbá nájma̱ níʼkhóo. Kaxtoʼóo májánʼ ga̱jma̱a̱ mbá juwan sello.
2 Ga̱jma̱a̱ ndi̱yo̱o̱ mbáa ángel bi̱ gíʼdoo tsiaki̱i̱ bi̱ niʼthí gakhi̱i̱: “Tsáá kaʼyoo mambáʼtoo rollo ga̱jma̱a̱ sello rí kaxtoʼóo ga̱jma̱a̱ rá.”
3 Nimbáa, ni má bi̱ xtáa mekhuíí, náa tsu̱du̱u̱ ku̱ba̱ʼ, ni má bi̱ xtáa náa agoo ku̱ba̱ʼ, majmaa mambáʼtoo rollo ga̱jma̱a̱ mbaʼyoo rí kiʼnirámáʼ ikhí.
4 Nigíʼdu̱u̱ nimbi̱ya̱ʼ gínúʼ, numuu rí ndawa̱a̱ nimbáa bi̱ kaʼyoo mambáʼtoo rollo mu mbaʼyoo rí kiʼnirámáʼ ikhí.
5 Mú mbáa bi̱ kayá edxu̱u̱ niʼthúnʼ: “Ni xátambi̱ya̱ʼ itháan, atayáá, León bi̱ na̱ʼkha̱ náa xuajin chíʼgíiʼ* ndrígóo Judá,+ bi̱ na̱ʼkha̱ náa David,+ niʼngo̱o̱ nidaaʼ.+ Ikhaa majmaa mambáʼtoo rollo ga̱jma̱a̱ mbá juwan sello rí kaxtoʼóo ga̱jma̱a̱”.
6 Náa inuu xílí ga̱jma̱a̱ náa inún mbá a̱jkhui̱i̱n querubines* ga̱jma̱a̱ náa majñu̱únʼ bi̱ kuya̱ edxu̱u̱,+ ndi̱yo̱o̱ wíji̱ mbáa a̱ʼdá múgú+ bi̱ xóo nijuixnájxi̱i̱ kaʼnii.+ Gíʼdoo mbá juwan chi̱jyu̱u̱ʼ ga̱jma̱a̱ mbá juwan iduu. (Iduu nandoo gáʼthúu̱n mbá juwan espíritu ndrígóo Dios+ rí nijuaxúʼma náa xúgíʼ tsu̱du̱u̱ ku̱ba̱ʼ).
7 Ikhú mbá nacha̱ A̱ʼdá múgú nikuʼmaminaʼ ga̱jma̱a̱ niguajtuun rollo dí rígá náa ñawún mújúunʼ bi̱ gíʼ náa xílí.+
8 Índo̱ niguajtuun rollo, ikhú a̱jkhui̱i̱n querubines ga̱jma̱a̱ mbá 24 bi̱ kuya̱ edxu̱u̱+ nismbati̱gu̱u̱n náa inuu A̱ʼdá múgú. Mámbáa kayá arpa ga̱jma̱a̱ xua̱a̱ dí oro rí kajnííʼ rí ndataun.* (Rí ndataun nandoo gáʼthúu̱n rí nutajkháan bi̱ kaxtaʼwíin).*+
9 Ga̱jma̱a̱ nuni̱ mbá ajmúú nuxi̱ʼ+ rí naʼthí: “Kaʼyaaʼ matambáʼtáá rollo ga̱jma̱a̱ sello ndrígóo numuu rí nijuixnájxi̱i̱n ma̱ngaa ga̱jma̱a̱ eʼdiaaʼ niratsi̱i̱n xa̱bu̱+ bi̱ kúwá náa xúgíʼ xuajin majkhaʼ, bi̱ nuthi mixtiʼkhu ajngáa, xúgíinʼ enii xa̱bu̱ ga̱jma̱a̱ bi̱ kúwá náa xuajin mba̱ʼu̱ mu muni̱ ñajuunʼ Dios.+
10 Ikháán nitani̱ rí mutañajunʼ+ ga̱jma̱a̱ rí mani̱ndxu̱ún ndxajkun mu muni̱ ñajuunʼ Dios ndrígúlú.+ Ga̱jma̱a̱ ikhiin mutañajunʼ náa tsu̱du̱u̱ ku̱ba̱ʼ”.+
11 Náa gíʼ xílí, náa wájun querubines ga̱jma̱a̱ náa tri̱gi̱i̱n bi̱ kuya̱ edxu̱u̱, ndi̱yo̱o̱ dí kúwá mbájndi ángeles náa rawuunʼ ga̱jma̱a̱ nidxawuun aʼwún mbaʼin wéñuuʼ. Naʼni itháan dí diez mil rí diez mil ga̱jma̱a̱ itháan rí miles rí miles,+
12 nuthi ga̱jma̱a̱ aʼwá gakhi̱i̱: “A̱ʼdá múgú bi̱ nijuixnájxi̱i̱+ kaʼyoo magruigú tsiaki̱i̱, ku̱ma̱, rí magiʼdoo, maguma mba̱a̱, magruigú gamajkhu ga̱jma̱a̱ maguma tsajkurámaaʼ”.+
13 Ga̱jma̱a̱ nidxawuun xúgíʼ dí nigumawíi dí rígá mekhuíí, dí rígá náa tsu̱du̱u̱ ku̱ba̱ʼ ga̱jma̱a̱ náa agoo ku̱ba̱ʼ,+ ma̱ngaa náa lamáa,* xúgíʼ dí rígá ikhí nithi: “Bi̱ gíʼ náa xílí+ ga̱jma̱a̱ A̱ʼdá múgú,+ gaguma tsajkurámiinʼ, gaguma mba̱ʼu̱u̱n,+ gundrigú gamajkhu ga̱jma̱a̱ tsiaki̱i̱ asndu kámuu”.+
14 Bi̱ a̱jkhui̱i̱n querubines nithi: “¡Xúʼko̱ gáʼni!”.* Ga̱jma̱a̱ bi̱ kuya̱ edxu̱u̱ nismbati̱gu̱u̱n ga̱jma̱a̱ ndiyamajkhún.
