Apocalipsis 21:1-27
21 Ikhú ndi̱yo̱o̱ mbá mekhu nuxi̱ʼ ga̱jma̱a̱ mbá ku̱ba̱ʼ nuxi̱ʼ,+ numuu rí mekhu dí nirígá nákha ginii ga̱jma̱a̱ ku̱ba̱ʼ dí nirígá nákha ginii nindáti̱ga̱a̱+ ga̱jma̱a̱ lamáa*+ nánguá rígá.
2 Ma̱ngaa ndi̱yo̱o̱ xuajin kaʼwu, Jerusalén dí Nuxi̱ʼ, nagajtaa mekhuíí asndu náa xtáa Dios.+ Kijmarataa xóo mbáa a̱ʼgu̱ bi̱ nacho̱o̱ manújúnʼ mu mbayáa xa̱bu̱.+
3 Nda̱wa̱á nidxawuun mbá aʼwá rí nigájnuu náa xílí,* rí niʼthí: “¡Atayáá! Guʼwá xtíin ndrígóo Dios rígá náa xa̱bu̱ numbaaʼ. Ikhaa maxtáa gajmíi̱n ga̱jma̱a̱ ikhiin mani̱ndxu̱ún xuajñuu, mina̱a̱ʼ má Dios gáxtáa gajmíi̱n.+
4 Makúdíi xúgíʼ iyaʼ idún,+ ni xákháñún itháan,+ ni xárígá itháan tsingíná, ni má xúmbi̱ya̱ʼ ga̱jma̱a̱ numuu rí numíniiʼ, ni má xárígá ga̱ʼkhu̱.+ Xúgíʼ dí nirígá nákha ginii nindáti̱ga̱a̱ gáʼni̱ ikhú”.
5 Bi̱ nigi̱ʼi̱ náa xílí+ niʼthí: “¡Atayáá! Xtáá ra̱ni̱ xúgíʼ nuxi̱ʼ”.+ Ma̱ngaa niʼthí: “Ataniraʼmáʼ ajngáa rígi̱, numuu rí nindxu̱u̱ gajkhun ga̱jma̱a̱ jmbu”.
6 Ga̱jma̱a̱ niʼthúnʼ: “¡Nimbánuu má! Ikhúún ñajunʼ Alfa ga̱jma̱a̱ Omega,* bi̱ ginii ga̱jma̱a̱ bi̱ iwáá kayuuʼ.+ Asndu tsáá bi̱ gákándawuuʼ, maxnu̱u̱ maga̱a̱n xúʼkhiín iyaʼ rí ndaʼya rí nagájnuu náa iduu.+
7 Bi̱ gáʼngo̱o̱, magruigúu xúgíʼ rígi̱ ga̱jma̱a̱ ikhúún mani̱ndxu̱ʼ Dios ndrígióo ga̱jma̱a̱ ikhaa mani̱ndxu̱u̱ a̱ʼdióʼ.
8 Mú bi̱ namíñúún, bi̱ raguáʼdáá fe,+ bi̱ tsagiin ga̱jma̱a̱ bi̱ nuni̱ rí tsaga, bi̱ nuradíin xa̱bu̱,+ bi̱ nubúúnʼ xkawiʼ kayuuʼ gajmiún eʼwíinʼ,*+ bi̱ nuni̱ xawan,* bi̱ nduyamajkhún xándú ga̱jma̱a̱ xúgíinʼ bi̱ nuninduwaʼ+ kuáʼti̱i̱n mañu rí nakha ga̱jma̱a̱ azufre,*+ rí nandoo gáʼthúu̱n rí makhañún a̱jma̱ nuthu”.+
9 Mbáa bi̱ mbá juwiin ángeles bi̱ kuda mbá juwan xua̱a̱ náa ka̱jnu̱ʼ juwan tsingíná rí iwáá,+ ni̱ʼkha̱ ga̱jma̱a̱ niʼthúnʼ: “Ayi̱ mu masngajmiáanʼ a̱ʼgu̱ bi̱ manújúnʼ, bi̱ maʼni a̱ʼgiu̱u̱ A̱ʼdá múgú”.+
10 Ga̱jma̱a̱ tsiaki̱i̱ ndrígóo espíritu santo* ni̱jkha̱ kañún náa mbá kúbá mba̱a̱ ga̱jma̱a̱ tsídánʼ, nisngájmuʼ Jerusalén xuajin kaʼwu, rí nagajtaa mekhuíí asndu náa xtáa Dios,+
11 ga̱jma̱a̱ gíʼdoo tsiaki̱i̱ ndrígóo Dios rí naxpíbínʼ.+ Rí naxpíbínʼ xóo mbá itsí rí mitsaanʼ* wéñuuʼ, xóo jaspe dí nangujuíi agiuuʼ.+
12 Gíʼdoo mbá xtájtsí mba̱a̱ ma̱ngaa mitsídánʼ, gíʼdoo mbá 12 xkrugua ma̱ngaa guájun mbá 12 ángeles ga̱jma̱a̱ kiʼnirámáʼ mbá 12 mbiʼyuu xuajin majkhaʼ* ndrígu̱ún e̱ji̱i̱n Israel náa xkrugua.
13 Náa nagájnuu a̱jkha̱ʼ* rígá mbá ajtsú xkrugua, xígií náa norte rígá mbá ajtsú xkrugua, náa sur rígá mbá ajtsú ga̱jma̱a̱ náa narámaaʼ a̱jkha̱ʼ* rígá mbá ajtsú xkrugua.+
14 Ma̱ngaa náa rajkhúu xtájtsí ndrígóo xuajin tuáʼán mbá 12 itsí ga̱jma̱a̱ ikhí nigumarámáʼ mbá 12 mbiʼñún bi̱ mbá 12 apóstoles ndrígóo+ A̱ʼdá múgú.
15 Bi̱ xtáá ratamíjná ga̱jmu̱ʼ kayá mbá rí magiewan ga̱jma̱a̱, mbá xkuíyá dí oro, mu magiewan ga̱jma̱a̱ xuajin, xkrugua ga̱jma̱a̱ xtájtsí.+
16 Xuajin gíʼdoo a̱jkhu̱ níjniúu, ikháá má mbaʼ ga̱jma̱a̱ rí ma̱ja̱nʼ. Ikhaa nigiewan xuajin ga̱jma̱a̱ xkuíyá: Gíʼdoo mbá 2,220 kilómetro* rí mbaʼ, rí ma̱ja̱nʼ ga̱jma̱a̱ dí mitsídánʼ ikháá má nindxu̱u̱.
17 Ma̱ngaa nigiewan xtájtsí: Gíʼdoo mbá 144 guʼxuʼ,* xó má rí nugiewun xa̱bu̱, ikhaa rúʼko̱ má nijmuu ángel ma̱ngaa.
18 Xtájtsí niguma ga̱jma̱a̱ itsí jaspe+ ga̱jma̱a̱ xuajin niguma ga̱jma̱a̱ mbawíí oro, rí naʼkuta̱ʼa̱ xóo niwanʼ.
19 Dí niguma ga̱jma̱a̱ rajkhúu xtájtsí ndrígóo xuajin kiʼniratháá ga̱jma̱a̱ xúgíʼ enii itsí dí mitsaanʼ wéñuuʼ: Timbá rí niguma ga̱jma̱a̱ rajkhúu nindxu̱u̱ itsí jaspe, raga̱jma̱ zafiro, ragajtsú calcedonia, rí maʼni a̱jkhu̱ esmeralda,
20 rí maʼni witsu sardónica, rí maʼni majun sardio, rí maʼni juwan crisólito, rí maʼni migiñuʼ berilo, rí mijna gu̱wa̱ʼ topacio, rí gu̱wa̱ʼ crisoprasa, rí gu̱wa̱ʼ i̱mba̱ jacinto ga̱jma̱a̱ rí maʼni gu̱wa̱ʼ e̱jma̱ amatista.
21 Ma̱ngaa 12 xkrugua nindxu̱u̱ 12 perla, mámbá xkrugua niguma ga̱jma̱a̱ mámbá perla. Ga̱jma̱a̱ náa kamba̱a̱ ma̱ja̱nʼ ndrígóo xuajin, nindxu̱u̱ mbawíí oro rí naʼkuta̱ʼa̱ xóo niwanʼ.
22 Na̱nguá ndi̱yo̱o̱ nimbá goʼwóo Dios ikhí, numuu rí Jeobá* Dios bi̱ gíʼdoo xúgíʼ Tsiaki̱i̱+ nindxu̱u̱ guʼwá, xó má A̱ʼdá múgú.
23 Na̱nguá má eyóoʼ rí agiuuʼ a̱jkha̱ʼ ni má agiuuʼ gu̱nʼ mambiʼi náa xuajin, numuu rí agiuuʼ Dios nambiʼi+ ga̱jma̱a̱ lámpara ndrígóo nindxu̱u̱ A̱ʼdá múgú.+
24 Xa̱bu̱ bi̱ kúwá náa xúgíʼ xuajin magún ga̱jma̱a̱ numuu agiuuʼ,+ ga̱jma̱a̱ reyes bi̱ kúwá náa tsu̱du̱u̱ ku̱ba̱ʼ muxnáá gamajkhu xuajin.
25 Xkrugoo mambaʼtoo má xúʼko̱ kañiiʼ mbiʼi numuu dí ikhí xárígá mbruʼun.+
26 Ga̱jma̱a̱ xa̱bu̱ bi̱ kúwá náa xúgíʼ xuajin muxnáá gamajkhu ga̱jma̱a̱ muni̱ mba̱a̱.+
27 Mú nimbá rí niguma gachíí, ni má nimbáa bi̱ naʼni rí xkawiʼ ga̱jma̱a̱ bi̱ naʼni nduwaʼ nditháan xáto̱ʼo̱o̱ ikhí.+ I̱ndó matu̱ʼu̱u̱n bi̱ kiʼnirámáʼ mbiʼñún náa libro rí ndaʼya* ndrígóo A̱ʼdá múgú.+
Mbaʼa nota
^ O “mar”.
^ O “trono”.
^ O “ikhúún ñajunʼ A ga̱jma̱a̱ Z”. Alfa nindxu̱u̱ timbáa letra náa abecedario griego ga̱jma̱a̱ Omega nindxu̱u̱ bi̱ naguámbáa ga̱jma̱a̱.
^ Gi̱i̱ ajngáa azufre nandoo gáʼthúu̱n xuíʼtóo itsí rí gíʼdoo agiuuʼ.
^ O “nagui̱i̱”.
^ O “tribu”.
^ O “este”.
^ O “oeste”.
^ O “libro náa kiʼnirámáʼ mbiʼñún bi̱ makuwá”.
