Éxodo 38:1-31
38 Ma̱ngaa ni’ni náa mikarámáʼ tsigijñaʼ ga̱jma̱a̱ ixi̱ acacia. Nindxu̱u̱ cuadrado, itháan rí a̱jma̱ metro* rí mbaʼ ga̱jma̱a̱ itháan rí a̱jma̱ metro rí ma̱ja̱nʼ mbá metro* rí mitsídánʼ.+
2 Náa mbá nájkhu̱ eskíniu̱u̱ ni’ni chi̱jyu̱u̱ʼ. Náa nakarámáʼ tsigijñaʼ ga̱jma̱a̱ chi̱jyu̱u̱ʼ mbá kajua̱a̱ niʼni. Nda̱wa̱á nixtájmuu cobre.+
3 Nda̱wa̱á niʼni xúgíʼ dí majmaa náa nakarámáʼ tsigijñaʼ, niʼni cubeta, pala, xua̱a̱, tenedor, ga̱jma̱a̱ daan náa nagiwa̱nʼ chámbuʼ. Xúgíʼ niʼni ga̱jma̱a̱ cobre.
4 Ma̱ngaa niʼni mbá ajua̱nʼ paska rí gíʼdoo xuájñúuʼ rí niʼni ga̱jma̱a̱ cobre, nigíwánʼ náa ta̱pha̱ dí nakarámáʼ tsigijñaʼ náa agoo rawuunʼ.
5 Niʼni ma̱ngaa a̱jkhu̱ anillo dí nisngujma náa a̱jkhu̱ eskíniu̱u̱, jmbuu má náa kra̱ʼa ajua̱nʼ paska rí gíʼdoo xuájñúuʼ rí niʼni ga̱jma̱a̱ cobre, náa anillo rígi̱ mafraʼa jngaa ixi̱.
6 Nda̱wa̱á ndiyáʼ ixi̱ acacia rí mbi̱jua̱ ga̱jma̱a̱ nixtájmuu cobre.
7 Nda̱wa̱á nikudaaʼ ixi̱ mbi̱jua̱ náa tima anillo ndrígóo náa nakarámáʼ tsigijñaʼ mu xúʼko̱ ma̱ndoo magún kuñu̱u̱n ga̱jma̱a̱. Náa nakarámáʼ tsigijñaʼ nindxu̱u̱ xóo mbá caja mijchú dí niguma ga̱jma̱a̱ xajpa dí mi̱du̱.
8 Nda̱wa̱á niʼni náa ma̱jnu̱ʼ iyaʼ ga̱jma̱a̱ cobre+ xúʼko̱ má náa magri̱gu ma̱ngaa. Mu maʼni rígi̱, nijmuu niwúúnʼ gu̱ʼu̱ bi̱ nuñajunʼ mbá kambájxu̱u̱n náa riejuun guʼwá xtíin.
9 Ma̱ngaa niniñuuʼ ma̱ja̱nʼ rexo̱o̱+ náa mbájndi guʼwá xtíin. Náa rexo̱o̱ guʼwá xtíin xígií náa sur, niʼni cortina ga̱jma̱a̱ lino dí májánʼ, rí mbaʼ naʼni mbá 44 metro.*+
10 Nitsuajun mbá 20 columna ga̱jma̱a̱ mbá 20 cuadro dí cobre náa majuáʼwánʼ rajkhúu. Gancho dí tima náa columna ga̱jma̱a̱ anillo rí mbu̱wa̱a̱ ga̱jma̱a̱ nindxu̱u̱ dí plata.
11 Ma̱ngaa xígií náa norte frájkha mbá cortina, dí mbaʼ naʼni mbá 44 metro.* Gíʼdoo mbá 20 columna ga̱jma̱a̱ mbá 20 cuadro dí cobre. Gancho ga̱jma̱a̱ rí tima náa columna ma̱ngaa anillo dí kajua̱a̱ ga̱jma̱a̱ nindxu̱u̱ dí plata.
12 Mú náa jmbuu dí narámaaʼ a̱jkha̱ʼ,* ikhí ma̱ngaa nifrajkhá cortina, rí mbaʼ ninindxu̱u̱ mbá 22 metro.* Gíʼdoo mbá gu̱wa̱ʼ columna ga̱jma̱a̱ mbá gu̱wa̱ʼ cuadro náa nijuáwánʼ rajkhúu. Gancho dí tima náa columna ga̱jma̱a̱ anillo dí kajua̱a̱ ga̱jma̱a̱ nindxu̱u̱ dí plata.
13 Náa níjniúu rí nagájnuu a̱jkha̱ʼ,* xígií náa najtsi, dí ma̱ja̱nʼ naʼni mbá 22 metro.*
14 Cortina dí frájkha náa riejuun rexo̱o̱ guʼwá xtíin naʼni mbá juwan metro* rí mbaʼ, guájun ajtsú columna ga̱jma̱a̱ ajtsú cuadro náa najuáwánʼ rajkhúu.
15 Náa i̱mba̱ níjniúu rexo̱o̱ guʼwá xtíin, ikhí krajngaa mbá cortina dí mbaʼ naʼni mbá juwan metro,* gíʼdoo ajtsú columna ga̱jma̱a̱ ajtsú cuadro náa najuáwánʼ rajkhúu.
16 Lino dí májánʼ nijmaa mu maguma ga̱jma̱a̱ cortina dí nifrajkha náa mbájndi rexo̱o̱ guʼwá xtíin.
17 Cuadro náa najuáwánʼ rajkhúu columna nindxu̱u̱ dí cobre, gancho ga̱jma̱a̱ anillo ndrígóo nindxu̱u̱ dí plata, náa edxu̱u̱ columna nigu̱u̱ plata. Anillo dí najmaa mu mbu̱wa̱a̱ ga̱jma̱a̱ xúgíʼ columna dí guájun náa rexo̱o̱ guʼwá xtíin niguma ga̱jma̱a̱ plata.+
18 Cortina dí frájkha náa riejuun rexo̱o̱ guʼwá xtíin nijuiʼñáraʼa ga̱jma̱a̱ gúmá azul, mugu̱ miʼñuu, gúmá maña̱ʼ xngeʼdi ga̱jma̱a̱ lino dí májánʼ. Dí mbaʼ naʼni mbá mijna gu̱wa̱ʼ metro,* rí mitsídánʼ itháan rí a̱jma̱ metro.* Ikháá mitsídánʼ ga̱jma̱a̱ cortina dí frájkha náa rexo̱o̱.+
19 Gíʼdoo a̱jkhu̱ columna ga̱jma̱a̱ a̱jkhu̱ cuadro náa najuáwánʼ rajkhúu dí nindxu̱u̱ cobre. Gancho ga̱jma̱a̱ anillo ndrígóo nindxu̱u̱ dí plata, xúʼko̱ má edxu̱u̱ columna nigu̱u̱ plata.
20 Xúgíʼ estaca dí najmaa náa guʼwá xtíin ga̱jma̱a̱ náa rexo̱o̱ nindxu̱u̱ dí cobre.+
21 Rígi̱ nindxu̱u̱ lista dí nijmaa mu maguma guʼwá xtíin rí mikaʼwu náa kra̱ʼa̱ arca dí Nimbánuu.*+ Moisés nikuʼmaa Itamar+ bi̱ nindxu̱u̱ aʼdióo ndxajkun Aarón mu maʼthúún levitas muni̱ rígi̱.+
22 Bezalel,+ a̱ʼdióo Urí, a̱ʼdióo Hur, bi̱ na̱ʼkha̱ náa xuajin chíʼgíiʼ* ndrígóo Judá, ikhaa nindxu̱u̱ bi̱ niʼni xúgíʼ rí Jeobá nikuʼmaa maʼni Moisés.
23 Oholiab+ a̱ʼdióo Ahisamac bi̱ na̱ʼkha̱ náa xuajin chíʼgíiʼ ndrígóo Dan ikhaa nimbáyúu. Ikhaa naʼni ñajunʼ mitsaanʼ* ga̱jma̱a̱ ñawúunʼ, naʼxmí, naʼjñaráʼa gúmá azul, mugu̱ miʼñuu, gúmá rí maña̱ʼ xngeʼdi ga̱jma̱a̱ lino dí májánʼ.
24 Xúgíʼ oro dí nijmaa náa ñajunʼ rí mikaʼwu nindxu̱u̱ ikháá má oro rí nijuixnáxi̱ xóo tsigijñaʼ dí nubajngaa:+ Nindxu̱u̱ mbá 1,000 kilo,* ki̱wu̱n xó má rí najmaa náa rí mikaʼwu.
25 Xúgíʼ plata rí nigún kudúún xa̱bu̱ xuajin dí nigumaráʼmá náa censo nindxu̱u̱ 3,440 kilo,* ki̱wu̱n xó má rí najmaa náa rí mikaʼwu.
26 Mámbáa xa̱bu̱ bi̱ gíʼdoo 20 tsiguuʼ o itháan bi̱ kiʼniráʼmá mbiʼyuu náa censo niyéjkha̱ medio siclo,* ki̱wu̱n xó má rí najmaa náa rí mikaʼwu.+ Dí mbá xúgíinʼ ninindxu̱ún 603,550 xa̱bu̱.+
27 Nirjuiya̱a̱ʼ mbá 3,420 kilo* plata mú maguma ga̱jma̱a̱ cuadro náa majuáwánʼ rajkhúu columna náa maguma ñajunʼ dí mikaʼwu, xúʼko̱ má cuadro náa majuáwánʼ rajkhúu columna náa mafrajkha cortina dí maʼga ta̱pha̱. Nijmaa mbá 3,420 kilo plata mu miʼni mbá 100 cuadro náa majuáwánʼ rajkhúu columna, náa mámbá cuadro nijmaa mbá 34,2 kilo.*+
28 Nijmuu 1,775 siclos, mu maʼni gancho dí matima náa columna ma̱ngaa nixtájmuu plata náa edxu̱u̱ columna ga̱jma̱a̱ niruwa̱a̱.
29 Mbá xúgíʼ cobre rí nixnajxi̱ ninindxu̱u̱ 2,420 kilo.*
30 Xúgíʼ cobre rígi̱ nijmuu mu maʼni cuadro rí majuáwánʼ rajkhúu columna rí guájun náa riejun guʼwá xtíin rí nagímbíin, xúʼko̱ má náa nakarámáʼ tsigijñaʼ ga̱jma̱a̱ ajua̱nʼ paska dí xuájñáʼ ga̱jma̱a̱ xúgíʼ dí najmaa náa nakarámáʼ tsigijñaʼ,
31 cuadro rí majuáwánʼ rajkhúu columna dí tri̱ga̱ náa rexo̱o̱ guʼwá xtíin, xúʼko̱ má náa najuáwánʼ rajkhúu columna rí tri̱ga̱ náa riejun, xúgíʼ estaca dí nijmaa náa guʼwá xtíin ga̱jma̱a̱ xúgíʼ estaca+ dí tri̱ga̱ náa mbájndi rexo̱o̱.
Mbaʼa nota
^ Náa ajngáa hebreo naʼthí, “ajtsú gúʼxúʼ”.
^ Náa ajngáa hebreo naʼthí, “100 gúʼxúʼ”.
^ Náa ajngáa hebreo naʼthí, “100 gúʼxúʼ”.
^ O “oeste”.
^ Náa ajngáa hebreo naʼthí, “50 gúʼxúʼ”.
^ O “este”.
^ Náa ajngáa hebreo naʼthí, “50 gúʼxúʼ”.
^ Náa ajngáa hebreo naʼthí, “15 gúʼxúʼ”.
^ Náa ajngáa hebreo naʼthí, “15 gúʼxúʼ”.
^ Náa ajngáa hebreo naʼthí, “20 gúʼxúʼ”.
^ Náa ajngáa hebreo naʼthí, “witsu gúʼxúʼ”.
^ Náa ajngáa hebreo naʼthí, “e̱jna̱ rí niʼni ginuu”.
^ O “tribu”.
^ O “nagui̱i̱”.
^ Náa ajngáa hebreo naʼthí, “100 talentos ga̱jma̱a̱ 1,775 siclos”.
^ Náa ajngáa hebreo naʼthí, “100 talentos”.
^ Náa ajngáa hebreo naʼthí, “mbá talento”.
^ Náa ajngáa hebreo naʼthí, “70 talentos ga̱jma̱a̱ 2,400 siclos”.
