Éxodo 19:1-25
19 Ajtsú igu̱nʼ nda̱wa̱á dí nigájnún náa ku̱ba̱ʼ ndrígóo Egipto, ikha̱á má mbiʼi, israelitas niguáʼnú náa ku̱ba̱ʼ mijxooʼ* ndrígóo Sinaí.
2 Nigájnún náa Refidim,+ niguáʼnú náa ku̱ba̱ʼ mijxooʼ ndrígóo Sinaí ga̱jma̱a̱ nigi̱ʼi̱i̱n ikhí, náa mijngii kúbá.+
3 Moisés nitsimuu mu maxnájximinaʼ náa inuu Dios bi̱ gajkhun. Ikhú Jeobá nindxa̱ʼóo asndu náa kúbá,+ niʼthúu̱n: “Rígi̱ rí mbaʼyóoʼ marathu̱u̱n bi̱ kúwá náa goʼwóo Jacob ga̱jma̱a̱ rí marathu̱u̱n israelitas:
4 ‹Mínáaʼla má ikháanʼ ndi̱ya̱a̱ ga̱jma̱a̱ idala rí niniu̱u̱n xa̱bu̱ egipcios.+ Ni̱ni̱ rígi̱ mu ma̱ʼkhá kaguáanʼ asndu xóo náa inuu xpíjpiúu bi̱yú mu ma̱ʼkhá kaguáanʼ náa ikhúún.+
5 Xúgíinʼ xa̱bu̱ kaʼyoʼ ikhúún,+ mú i̱ndó ikháanʼla muʼgua̱nú mani̱ndxa̱la mbá xuajin kiejuunʼ* náa xúgíʼ xuajin dí rígá náa tsu̱du̱u̱ ku̱ba̱ʼ,+ mu ma̱ndoo marigá rígi̱, mbaʼyóoʼ mu̱ni̱mbala kájxi̱ rí gátala ga̱jma̱a̱ muyejxí nga̱jua̱la rí nimbánulú.
6 Ikháanʼla muʼgua̱nú mani̱ndxa̱la ndrígóʼ ikhúún, mbá xuajin kaʼwu, náa makuwá reyes bi̱ ni̱ndxu̱ún ndxajkun›.+ Xúgíʼ rígi̱ gíʼmaa marathu̱u̱n israelitas”.
7 Moisés nigajta̱a̱, nigímbíin xúgíinʼ bi̱ kuya̱ edxu̱ún náa xuajin ga̱jma̱a̱ niʼthún xúgíʼ rí Jeobá niʼthúu̱n.+
8 Nda̱wa̱á dí rúʼko̱, xúgíinʼ xa̱bu̱ xuajin niriʼña ga̱jma̱a̱ xúgíʼ a̱jkiu̱ún: “Kúwáanʼxu̱ xawii munimbaníí xúgíʼ rí Jeobá niʼthí”.+ Mbá nacha̱, Moisés ni̱jkha̱ gáʼthúu̱n Jeobá rí niriʼña xa̱bu̱.
9 Jeobá niʼthúu̱n Moisés: “Atayáá, ma̱ʼkhá náa ikháán náa awúu̱n mbá du̱u̱n skuniʼ mu xúʼko̱ xa̱bu̱ xuajin mudxawunʼ índo̱ gátamíjná ga̱jma̱á ni̱ndxa̱a̱ʼ ma̱ngaa mu xúʼko̱ munimbu̱ún kuyaaʼ”. Ikhú Moisés niʼthúu̱n Jeobá rí nithi xa̱bu̱.
10 Nda̱wa̱á Jeobá niʼthúu̱n: “Ayuʼ náa kúwíi̱n xa̱bu̱ xuajin, atani̱ kaʼwíín xúgi̱ ga̱jma̱a̱ gájtsíí, ikhiin mbaʼyóoʼ mujñáa xtíñún.
11 Índo̱ gáʼni ajtsú e̱jkha̱ʼ mbaʼyóoʼ makuwá xawii, numuu dí Jeobá magajtaa náa kúbá Sinaí náa inúún xúgíinʼ xa̱bu̱ xuajin.
12 Mbaʼyóoʼ matriga rí marikhún xa̱bu̱ náa mbájndi níxtuun kúbá ma̱ngaa mbaʼyóoʼ marathu̱u̱n: ‹Xútsímala náa kúbá ní xújngupríga náa nagi̱ʼdu̱u̱ kúbá. Asndu tsáá bi̱ gáʼga mijngii náa kúbá gíʼmaa makhañúu.
13 Mú xurugua̱a̱la bi̱ gaʼni rúʼko̱, mbaʼyóoʼ muxna̱a̱la ga̱jma̱a̱ itsí o muxna̱a̱ ga̱jma̱a̱ mbá flecha. Tséʼniuu á mu nindxu̱u̱ xujkhúʼ o xa̱bu̱, gíʼmaa makhañúu›.+ Mú, índo̱ gáwáán chi̱jyu̱u̱ʼ mugu̱,+ ikhú ma̱ndoo muʼgua mijngii náa kúbá”.
14 Nda̱wa̱á Moisés nigajta̱a̱ náa kúbá ga̱jma̱a̱ nigíʼdu̱u̱ niʼni kaʼwi̱ín xa̱bu̱ xuajin ga̱jma̱a̱ ikhiin nijñáa xtíñún.+
15 Moisés niʼthún: “Gákuwáanʼ xawii índo̱ gáʼni ajtsú mbiʼi. Xúbala gajmiála gu̱ʼya̱la”.*
16 Índo̱ niʼni ajtsú mbiʼi, miʼcha̱ nirmidá a̱jkhu̱u̱n* ga̱jma̱a̱ nixpíbínʼ. Mbá du̱u̱n skuniʼ+ nirugoo kúbá ga̱jma̱a̱ niwáán gakhi̱i̱ wéñuuʼ aʼwóo chi̱ji̱ʼ. Xúgíinʼ xa̱bu̱ bi̱ gíi̱nʼ nigíʼdi̱i̱ niguíʼiin.+
17 Ikhú Moisés niguwíin xa̱bu̱ xuajin mu magún náa inuu Dios bi̱ gajkhun, ikhú ikhiin nigún gudrigi̱i̱n náa nagi̱ʼdu̱u̱ kúbá.
18 Náa kúbá Sinaí asndu náá gíʼ ragájnuu gúní, numuu rí Jeobá nigajtaa ikhí náa tapo̱o̱ aguʼ.+ Gúní rí nagájnuu nindxu̱u̱ xóo gúní rí nagájnuu náa mbá horno ga̱jma̱a̱ kúbá niʼba̱a̱n gakhi̱i̱ wéñuuʼ.+
19 Aʼwóo chi̱ji̱ʼ ni̱jkha̱ rawáán itháan gakhi̱i̱, Moisés naʼthí, Dios bi̱ gajkhun nariʼña̱a̱.
20 Ikhú Jeobá nigajtaa náa inuu kúbá Sinaí. Nda̱wa̱á Jeobá niʼthúu̱n Moisés dí matsimuu náa inuu kúbá ga̱jma̱a̱ Moisés nitsimuu.+
21 Jeobá niʼtáñajuun Moisés: “Arajta̱a̱ʼ gárathu̱u̱n xa̱bu̱ xuajin mu xúnimijna̱ matsimún mbuyáá Jeobá numuu rí mbaʼin migamíi makhañún.
22 Ndxajkun bi̱ nagún tsejtsí náa inuu Jeobá ndaʼyóoʼ muni̱ kaʼwumíjnáá, mu xúʼko̱ Jeobá xágudíin”.+
23 Moisés niʼthúu̱n Jeobá: “Xa̱bu̱ xuajin xátsimún má náa kúbá Sinaí numuu dí ikháán niratá dí xáʼyóoʼ muni̱, índo̱ nirathúnʼ: ‹Atadríga rí marikhún xa̱bu̱ náa mbájndi níxtuun kúbá ga̱jma̱a̱ atani̱ dí maʼni mitsúʼkháan›”.+
24 Nda̱wa̱á Jeobá niʼthúu̱n: “Aratháán mi̱dxa̱ʼ ga̱jma̱a̱ Aarón. Mú xátatsiʼñáʼ rí ndxajkun ga̱jma̱a̱ xa̱bu̱ xuajin manújngún náa tri̱ga̱ tsinaʼ mu matsimún gúyáá Jeobá, mu ikhaa xágudíin”.+
25 Moisés nigajtha̱a̱ náa gíi̱nʼ xa̱bu̱ xuajin ga̱jma̱a̱ niʼthún.
