Éxodo 29:1-46
29 Mu ikhiin ma̱ndoo mani̱ndxu̱ún ndxajkun ndrígióʼ, mbaʼyóoʼ matani̱ rígi̱ mu matani̱ kaʼwi̱ín. Atríya̱a̱ʼ mbáa a̱ʼdá xédí bi̱ májáanʼ xúʼko̱ má a̱jmi̱i̱n mugu̱ e̱jmba̱a̱ bi̱ mi̱jíinʼ.*+
2 Ga̱jma̱a̱ harina dí itháan májánʼ ndrígóo trigo matani̱ pan dí ragíʼdoo levadura, xúʼko̱ má pan dijndi dí ragíʼdoo levadura maguma ga̱jma̱a̱ aceite ma̱ngaa galleta rí mbawiʼ dí ragíʼdoo levadura magu̱u̱ aceite.+
3 Matandríyáʼ náa mbá canasta+ ga̱jma̱a̱ mbóó gátaxnajxíi̱ ga̱jma̱a̱ a̱ʼdá xédí ma̱ngaa a̱jmi̱i̱n mugu̱.
4 Mi̱dxu̱ʼ jcháa Aarón gajmíi̱n e̱ji̱i̱n náa riejuun guʼwá xtíin náa nagimbíi̱n+ ga̱jma̱a̱ marathu̱u̱n dí muna.+
5 Nda̱wa̱á maraxna̱a̱ magiʼ xtíñuu+ Aarón xtíin mbi̱jua̱ dí gíʼdoo ñawúunʼ, xúʼko̱ má xtíin mbi̱jua̱ rí nda̱a̱ ñawúunʼ dí maʼga agoo efod, ma̱ngaa efod* ga̱jma̱a̱ xtíin* rí magiʼma tso̱xto̱o̱. Xúʼko̱ má xtíin rí maxtoʼóo smídúu rí mbóó kajua̱a̱ ga̱jma̱a̱ efod matruʼwa̱a̱ jxa̱ʼ náa mbájndi smídúu.+
6 Ma̱ngaa náa edxu̱u̱ matagrígu xtíin rí kiejuunʼ, náa xtíin rúʼko̱ matagíʼma diadema* rí mitsúʼkháan.+
7 Ikhú mataxidírámáá aceite rí naxtaʼwíin ga̱jma̱a̱+ náa edxu̱u̱, mu xúʼko̱ maxtaʼwíi.+
8 Nda̱wa̱á marathu̱u̱n e̱ji̱i̱n rí maguwáʼ kanuu ga̱jma̱a̱ maraxnu̱u̱n maguwúúnʼ xtíin mbi̱jua̱ dí gíʼdoo ñawúunʼ+
9 ga̱jma̱a̱ matagiwánʼ xtíin náa mbájndi smídúún xó má Aarón gajmíi̱n e̱ji̱i̱n ma̱ngaa matrígu xtíin náa edxu̱ún. Ikhaa gajmíi̱n e̱ji̱i̱n mani̱ndxu̱ún ndxajkun. Rígi̱ nindxu̱u̱ mbá kiʼtáñajunʼ dí mbaʼyóoʼ mambanúu asndu kámuu.+ Xúʼko̱ gátani mu mataʼgíiʼ Aarón gajmii e̱ji̱i̱n mu mani̱ndxu̱ún ndxajkun ndrígióʼ.+
10 Nda̱wa̱á mi̱dxu̱ʼ jcháa a̱ʼdá xedi̱ náa inuu guʼwá xtíin rí nagimbíi̱n, Aarón gajmíi̱n e̱ji̱i̱n mbaʼyóoʼ muta̱ma̱ʼ ñawúúnʼ náa edxu̱u̱ a̱ʼdá xédí.+
11 Ataxíyáa xedi̱ náa inuu Jeobá, náa riejuun guʼwá xtíin rí nagimbíi̱n.+
12 Ga̱jma̱a̱ a̱ʼdióo ñawáanʼ mataxtajmáá chíʼgíiʼ* eʼdi náa chi̱jyu̱u̱ʼ dí nakarámáʼ tsigijñaʼ.+ Nda̱wa̱á eʼdi rí gapíduunʼ mataxidíríga náa rajkhúu dí nakarámáʼ tsigijñaʼ.+
13 Mbaʼyóoʼ matani̱ wajíi̱ sébúu+ rí kagu̱u̱ náa chámbóo xúʼko̱ má sébúu rí kagu̱u̱ náa xkígóo, ma̱ngaa mbá nájma̱ riñón ga̱jma̱a̱ sébúu rí gíʼdoo ikhí. Xúgíʼ rígi̱ matatsikha mu maʼni gúniúu náa nakarámáʼ tsigijñaʼ.+
14 Mú xuyuuʼ xedi̱, xtóo ga̱jma̱a̱ ambóo mbaʼyóoʼ mi̱kha náa rawuunʼ dí kuwáanʼla. Xedi̱ mani̱ndxu̱u̱ mbá tsigijñaʼ rí mixnájxi ga̱jma̱a̱ numuu aʼkhá.
15 Ikhú matatuwiin mbáa mugu̱, Aarón gajmíi̱n e̱ji̱i̱n muta̱ma̱ʼ ñawúúnʼ náa edxu̱u̱ mugu̱.+
16 Mataxíyáa mugu̱ ga̱jma̱a̱ náa mbájndi níjniúu dí nakarámáʼ tsigijñaʼ mataxtijyááʼ ga̱jma̱a̱ eʼdiuu.+
17 Nda̱wa̱á matrujturíga̱a̱ mugu̱, marajña chámbóo+ ga̱jma̱a̱ xuwiʼ xtiyuu, dí gúturiga mbá kaʼyoo má gatadrámáʼ ga̱jma̱a̱ edxu̱u̱.
18 Ga̱jma̱a̱ matatsika̱a̱ mbá kañiiʼ mugu̱ mu maʼni gúni náa nakarámáʼ tsigijñaʼ. Rígi̱ nindxu̱u̱ mbá tsigijñaʼ gamajkhu rí mikarámáʼ náa inuu Jeobá rí mitsaanʼ* ndataun eʼyoo ikhaa.*+ Nindxu̱u̱ mbá tsigijñaʼ gamajkhu rí mi̱kha náa inuu Jeobá.
19 Xúʼko̱ má gatatuwiin imba̱a̱ mugu̱, Aarón gajmíi̱n e̱ji̱i̱n muta̱ma̱ʼ ñawúúnʼ náa edxu̱u̱ mugu̱.+
20 Mataxíyáa mugu̱ e̱jmba̱a̱ ga̱jma̱a̱ mbá chíʼgíiʼ eʼdi mataxtajmáá náa riʼyu̱u̱ cháʼwun mújúunʼ Aarón gajmíi̱n e̱ji̱i̱n, xúʼko̱ má náa a̱ʼdióo ñawúunʼ mújúunʼ rí mba̱a̱ ga̱jma̱a̱ a̱ʼdióo rajkhúu mújúunʼ rí mba̱a̱. Ma̱ngaa mataxtijyááʼ náa xúgíʼ níjniúu rí nakarámáʼ tsigijñaʼ ga̱jma̱a̱ eʼdi.
21 Ma̱ngaa mbá chíʼgíiʼ eʼdi dí grígu náa nakarámáʼ tsigijñaʼ ga̱jma̱a̱ mbá chíʼgíiʼ aceite rí naxtaʼwíin ga̱jma̱a̱,+ mataxtíjyaaʼ Aarón ga̱jma̱a̱ xtíñuu, xúʼko̱ má e̱ji̱i̱n ga̱jma̱a̱ xtíñún ikhiin. Mu xúʼko̱ ikhaa gajmíi̱n e̱ji̱i̱n ma̱ngaa xtíñún maʼga̱nú mani̱ndxu̱u̱ mikaʼwu.+
22 Nda̱wa̱á matríyaʼ sébúu mugu̱ e̱jmba̱a̱, xúʼko̱ má sébúu dí gíʼdoo náa tsiyúuʼ, sébú rí gíʼdoo náa chámbóo, sébú rí gíʼdoo náa xkígóo, náa a̱jma̱ riñón ndrígóo ga̱jma̱a̱ sébú dí rígá ikhí,+ xúʼko̱ má rajkhú mújúunʼ ma̱ngaa, numuu rí nindxu̱u̱ mbáa mugu̱ bi̱ nijuixnáxi̱i̱ náa muda ñajunʼ ndxajkun.+
23 Ma̱ngaa mbi̱ya̱ mbá pan dijndi xúʼko̱ má i̱mba̱ pan dijndi rí gíʼdoo aceite ga̱jma̱a̱ mbá galleta mbawiʼ dí kajti náa canasta, náa kajti pan dí ragíʼdoo levadura rí frígu náa inuu Jeobá.
24 Marajxna̱a̱ xúgíʼ rígi̱ mbayá Aarón gajmíi̱n e̱ji̱i̱n ga̱jma̱a̱ matani̱ rí ikhiin mubajngaa gi̱i̱ ñuʼún numuu rí nindxu̱u̱ mbá tsigijñaʼ rí mubajngaa náa inuu Jeobá.
25 Nda̱wa̱á madrígúu xúgíʼ rígi̱ náa ñawúunʼ ga̱jma̱a̱ matatsikha náa nakarámáʼ tsigijñaʼ, náa tsu̱du̱u̱ tsigijñaʼ dí najuixnájxi̱ dí nakarámáʼ. Rígi̱ nindxu̱u̱ mbá tsigijñaʼ gamajkhu rí mi̱kha náa inuu Jeobá, mbá tsigijñaʼ rí mitsaanʼ ndataun gáʼyoo Jeobá.
26 Náa mugu̱ bi̱ nijuixnáxi̱ náa ndiyá ñajunʼ Aarón xóo ndxajkun,+ marajtuun xuwiʼ tso̱xto̱o̱ matabajngaa gi̱i̱ ñuʼún xóo tsigijñaʼ rí naʼmbajngaa náa inuu Jeobá. Rígi̱ mani̱ndxu̱u̱ ndrígáaʼ ikháánʼ.
27 Mbaʼyóoʼ matani̱ wájíiʼ xóo mbá rí mitsúʼkháan, rajkhúu ga̱jma̱a̱ xuwiʼ tso̱xto̱o̱ mugu̱ bi̱ nijuixnáxi̱ índo̱ Aarón gajmíi̱n e̱ji̱i̱n nida ñajunʼ xóo ndxajkun rí niʼbajngaa náa inuu Dios.+
28 Rígi̱ mani̱ndxu̱u̱ ndrígóo Aarón gajmíi̱n e̱ji̱i̱n. Nindxu̱u̱ mbá kiʼtáñajunʼ rí bi̱ israelitas mbaʼyóoʼ munimbaníí asndu kámuu, rígi̱ nindxu̱u̱ mbá rí mitsúʼkháan ikha jngóo maʼga̱nú mani̱ndxu̱u̱ mbá rí mitsúʼkháan rí muxnajxi̱ israelitas.+ Rígi̱ nindxu̱u̱ mbá rí mitsúʼkháan rí mixnájxi̱i̱ Jeobá xóo mbá tsigijñaʼ dí tsímáá.*+
29 Xtíin kiejuunʼ rí mitsaanʼ+ rí kaʼyoo Aarón mugíiʼ e̱ji̱i̱n+ nda̱wa̱á rí ikhaa, índo̱ ikhiin gáxtaʼwíin mu mani̱ndxu̱ún ndxajkun.
30 Índo̱ mbáa a̱ʼdióo Aarón gakhánúu ñajunʼ mu mani̱ndxu̱u̱ ndxajkun nda̱wa̱á rí anu̱u̱* ga̱jma̱a̱ índo̱ gáto̱ʼo̱o̱ náa guʼwá xtíin dí nagímbíin mu maʼni ñajunʼ náa rí mikaʼwu, ikhaa mbaʼyóoʼ majmuu xtíin rígi̱ mbá juwan mbiʼi.+
31 Mugu̱ e̱jmba̱a̱ bi̱ mixnájxi̱i̱ náa muda ñajunʼ ndxajkun, xuyuuʼ mbaʼyóoʼ matajíi náa guʼwá xtíin rí mikaʼwu.*+
32 Aarón gajmíi̱n e̱ji̱i̱n mbaʼyóoʼ mu̱phu̱+ xuyuuʼ mugu̱ ga̱jma̱a̱ pan rí kajti náa canasta náa riejuun guʼwá xtíin rí nagímbíin.
33 Ikhiin mbaʼyóoʼ mu̱phu̱ rí nijuixnáxi̱ mu majngudi̱i̱ aʼkhúun mu xúʼko̱ ma̱ndoo mudrigú ñajunʼ mani̱ndxu̱ún ndxajkun ma̱ngaa mu ma̱ndoo maguma kaʼwi̱ín. Imba̱a̱ xa̱bu̱ kaníí* xándoo mikhu rígi̱ numuu dí nindxu̱u̱ mikaʼwu.+
34 Á mu i̱mba̱ néjtsuu napídu̱ún xóó xuwiʼ rí nijuixnáxi̱ xóo tsigijñaʼ náa muda ñajunʼ ndxajkun o napídu̱ún pan, mbaʼyóoʼ mi̱kha.+ Nimbáa xáʼyóoʼ mi̱khu̱, numuu rí nindxu̱u̱ mikaʼwu.
35 Xúʼko̱ gátani̱ ga̱jma̱a̱ Aarón ma̱ngaa gajmíi̱n e̱ji̱i̱n, matani̱ xúgíʼ xó má nitañájuanʼ. Mbá juwan mbiʼi mbaʼyóoʼ maraxtaa ga̱jma̱a̱ʼ mu maraxna̱a̱ tsiaki̱i̱ índo̱ gágruigú ñajunʼ xóo ndxajkun.+
36 Mámbá mbiʼi mbaʼyóoʼ maraxnajxí tsigijñaʼ ga̱jma̱a̱ numuu aʼkhá, mbaʼyóoʼ maraxnajxíi mbáa xedi̱ mu xúʼko̱ majngudi̱i̱ aʼkhá ga̱jma̱a̱ xúʼko̱ maguma kaʼwi̱i̱ aʼkhúun náa nakarámáʼ tsigijñaʼ. Ma̱ngaa mbaʼyóoʼ mataxidirámááʼ aceite mu mani̱ndxu̱u̱ mitsúʼkháan náa nakarámáʼ tsigijñaʼ.+
37 Mbá juwan mbiʼi mbaʼyóoʼ maraxnajxí tsigijñaʼ mu xúʼko̱ majngudi̱i̱ aʼkhúun náa nakarámáʼ tsigijñaʼ, mbaʼyóoʼ matani̱ mitsúʼkháan mu maʼga̱nú mani̱ndxu̱u̱ mikaʼwu náa nakarámáʼ tsigijñaʼ.+ Asndu tsáa bi̱ gáxkajma náa nakarámáʼ tsigijñaʼ mbaʼyóoʼ mani̱ndxu̱u̱ mikaʼwii.
38 Rígi̱ gáʼyóoʼ mataxnajxí náa nakarámáʼ tsigijñaʼ. Mámbá gájtsi, mbaʼyóoʼ maraxnajxíin a̱jmi̱i̱n mugu̱ bi̱ mbá tsigúúnʼ.+
39 Timbáa mugu̱ mbaʼyóoʼ maraxnajxíi miʼcha̱, imba̱a̱ mbaʼyóoʼ maraxnajxíi wakíʼ.*+
40 Índo̱ gáraxnajxíi timbáa mugu̱ mbaʼyóoʼ maraxnajxí mbá kilo* harina dí itháan májánʼ rí matandáwa̱a̱ʼ mbá litro* aceite ndrígóo oliva. Ma̱ngaa mataxidirámááʼ mbá litro vino mu mani̱ndxu̱u̱ xóo tsigijñaʼ dí nagadírámuuʼ.
41 Bi̱ maʼni raga̱jmi̱i̱n mugu̱ mbaʼyóoʼ maraxnajxíi wakíʼ mbóó gáraxnajxíi ga̱jma̱a̱ tsigijñaʼ rí tsígáʼ ma̱ngaa tsigijñaʼ dí nagadírámuuʼ xó má rí majuixnáxi̱ rí miʼcha̱. Xúgíʼ rígi̱ mani̱ndxu̱u̱ mbá tsigijñaʼ rí mitsaanʼ ndataun, mbá tsigijñaʼ gamajkhu rí mi̱kha náa inuu Jeobá.
42 Mani̱ndxu̱u̱ mbá tsigijñaʼ rí mikarámáʼ dí ikháanʼ mbaʼyóoʼ muxnajxíla tsétsí mbiʼi náa xúgíinʼ bi̱ gáguwáʼ rakúwá nda̱wa̱á náa riejuun guʼwá xtíin rí nagímbíin náa inuu Jeobá, ikhí masngajmámina’ ikhúún mu matamíjná ga̱jma̱á ni̱ndxa̱a̱ʼ.+
43 Ikhí masngajmámina’ ikhúún náa inún israelitas ga̱jma̱a̱ tsiaki̱i̱ ndrígóʼ dí marigá ikhí maʼni kaʼwi̱i̱ mbaaʼ rúʼko̱.+
44 Ma̱ni̱ kaʼwi̱i̱ guʼwá xtíin ga̱jma̱a̱ náa nakarámáʼ tsigijñaʼ, ma̱ngaa ma̱ni̱ kaʼwi̱i̱ Aarón gajmíi̱n e̱ji̱i̱n+ mu mani̱ndxu̱ún ndxajkun ndrígióʼ.
45 Ikhúún maxtáá náa majñu̱únʼ israelitas ga̱jma̱a̱ mani̱ndxu̱ʼ Dios ndrígu̱ún.+
46 Ikhiin gajkhun mbuyáá dí ikhúún nindxu̱ʼ Jeobá Dios ndrígu̱ún, bi̱ niguwíin náa ku̱ba̱ʼ ndrígóo Egipto mu maxtáá náa majñu̱únʼ ikhiin.+ Ikhúún nindxu̱ʼ Jeobá Dios ndrígu̱ún.
Mbaʼa nota
^ O “bi̱ itháan xtangún”, “bi̱ itháan kuitsúunʼ”.
^ O “tsinaʼ rí nasngájma dí nixnájximinaʼ”.
^ O “lajuíin”.
^ O “nagui̱i̱”.
^ Náa ajngáa hebreo naʼthí, “mitsaanʼ eʼni a̱jkiu̱u̱n”.
^ O “tátée”.
^ Náa ajngáa hebreo naʼthí, “náa rí mikaʼwu”. Mbáa rígi̱ nandoo gáʼthúu̱n náa rexo̱o̱ guʼwá xtíin.
^ Xóo muʼthá, mbáa xa̱bu̱ bi̱ tséʼkha̱ náa goʼwóo Aarón.
^ Náa ajngáa hebreo naʼthí, “náa a̱jma̱ wakíʼ”.
