Ho fumanoe matamo a li-beaver a bophara ba limithara tse 850 le botebo ba limithara tse 5.3. Li-beaver li khona joang ho haha matamo a maholo hakaale?

 Li-beaver li qala ka ho rema lifate tseo hangata li leng botenya ba lisenthimithara tse ka tlase ho 30. Li hloma makala a maholo tlas’a metsi ho etsa lipalo tse emeng ebe li lohella lifate tse nyenyane makaleng ao. Li-beaver li tsitsisa lipalo tsena ka ho beha majoe a maholo kapa lifate holim’a tsona. Holimo moo metsi a hlahang le teng, li koala likarolo tse bulehileng tsa letamo ka lithupa, litlamatlama le seretse. Li boetse li kenya lipalo tse tšehetsang ka lehlakoreng leo metsi a theohelang ho lona e le hore letamo le se ke la senngoa ke metsi a tlang ka sekhahla. Ho feta moo, li etsa liforo mahlakoreng ka bobeli a letamo ho bulela metsi ha a le mangata ’me li atolosa liforo tseo nakong ea lipula tse matla.

 Bafuputsi ba fumane hore mosebetsi oo li-beaver li o etsang oa ho haha matamo, o tsoela tikoloho eo li leng ho eona molemo. Ka mohlala, matamo a li-beaver a etsa hore mobu o se ke oa tsamaea le metsi, a etsa hore metsi a hloeke ’me a eketsa metsi a ka tlas’a lefatše. Ho feta moo, melapo e neng e tloaetse ho psha ka hlabula e qala ho phalla selemo ho pota. Matamo ana a boetse a fokotsa likhohola ka ho etsa hore ho be le libaka tse monyang metsi ha pula e na haholo. Libaka tsena li ka boela tsa thibela mollo hore o se ke oa nama. Leha mollo o ka tuka haufi le tsona, li lula li le tala. Libaka tsena tse mongobo li boetse li hohela liphoofolo tse ngata.

 Phuputsong e ’ngoe, bafuputsi ba ile ba hlokomela hore matamo a li-beaver a tšoana le mehaho e entsoeng ke lienjiniere. Ha e le hantle, bafuputsi ba hahile matamo a mangata a tšoanang le a li-beaver Amerika Leboea. Ke kahoo hangata li-beaver li bitsoang lienjiniere tsa tikoloho.

 U nahana joang? Na bokhoni ba li-beaver ba ho haha bo bile teng ka ho iphetola ha lintho kapa na bo entsoe?