Kaha Baiseraele e ne e le litloholo tsa motho a le mong, e leng Jakobo, kapa Iseraele, e ne e le “bara ba motho,” litho tsa lelapa le le leng. Ha ba ne ba bokana meketeng Jerusalema, ho ne ho le “hotle” ’me ho ‘khahlisa.’ Joaloka bona, kajeno malapa a mangata a labalabela ho ba hammoho le ho thabela nako e monate ka Keresemese.

Buka e ’ngoe e bitsoang Encyclopedia of Christmas and New Year’s Celebrations, e re: “Hangata likhohlano tse nyenyane tse bang teng har’a selemo li baka lintoa ha lelapa le kopana matsatsing a Keresemese.”

‘Le ’ne le lefe puseletso e loketseng ho batsoali le batsoali ba batsoali ba lōna.’ (1 Timothea 5:4) Haeba ho khoneha, leka ho etela beng ka uena nako le nako. Haeba beng ka uena ba lula hōle haholo u ntse u ka khona ho buisana le bona kamehla. U ka ba ngolla lengolo, ua ba letsetsa, ua ba romella e-mail kapa la bua ka Inthanete. Ho buisana kamehla ho fokotsa likhohlano.

“Le patisane hoo ho seng sebaka leratong la lōna le mofuthu. . . . Le atolohe.” (2 Bakorinthe 6:12, 13) Ho kopana hanngoe ka selemo ho etsa hore malapa a qetelle a se a sa tsebane ’me sena e ba bothata, haholo-holo ho bana. Bana ba bang ba nka hore ha ba na kamano le bo-nkhono le bo-ntate-moholo ba bona kapa beng ka bona ba bang. Kahoo khothalletsa bana ba hao hore ba “atolohe” ’me ba bontše lerato le ho beng ka bona ba hōlileng. * Bana ba qetang nako e ngata le batho ba hōlileng ba ba le kutloelo-bohloko haholoanyane ’me ba ananela batho ba baholo.

“Ho bua lentsoe le nepahetseng ka nako e nepahetseng ho thabisa hakaakang.” (Liproverbia 15:23, New Century Version) U ka qoba hore ho se utloisisane le likhohlano li se ke tsa baka mathata a maholo joang? Tsela e ’ngoe ke hore u khethe “nako e nepahetseng” ea ho buisana ka lintho tse u tšoenyang e le kannete. Haeba le buisana kamehla, ho tla ba bonolo ho atamela setho sa lelapa moo le leng bang e le hore le khone ho rarolla mathata leha e le afe ’me le tla thabela linako tse “monate” ha le kopana.