JESU o ile a ruta batho ho hlompha Lentsoe la Molimo, Bibele. Ntlha ena e pakoa ke tsela eo a ileng a araba ka eona ha Diabolose a mo leka. (Matheu 4:4-11) Ka mohlala, Jesu o ile a etsa joang ha Satane a mo leka ka hore a fetole majoe mahobe? Jesu o ile a qhela teko eo ka ho qotsa mantsoe a Moshe a bululetsoeng, ao u ka ipallang ’ona ho Deuteronoma 8:3. Hona Jesu o ile a arabela joang ha Diabolose a mo tšepisa bobusi ba mebuso eohle ea lefatše haeba feela a ka mo etsetsa ketso e le ’ngoe ea borapeli? O ile a hana, a qotsa molao-motheo oa Mangolo oo u ka u fumanang ho Deuteronoma 6:13.

Hopola, le hoja Jesu e ne le mora oa Molimo, ha a ruta o ne a itšetleha ka Bibele, hobane o ne a e nka e le buka e ka tšeptjoang. ’Me ka sebele ha aa ka a tlohela Lentsoe la Molimo eaba o khomarela meetlo ea batho. (Johanne 7:16-18) Leha ho le joalo, boholo ba baeta-pele ba bolumeli ba mehleng ea Jesu ba ne ba sa hlomphe Lentsoe la Molimo joaloka eena. Hobane’ng? Ba ne ba nka meetlo ea batho e le ea bohlokoa ho feta Mangolo a Halalelang. Ha Jesu a toba taba o ile a re ho banna bao ba bolumeli: “Ka lebaka la moetlo oa lōna he, le fetotse taelo ea Molimo lefeela. Baikaketsi ting! Esaea o porofetile hantle ka lōna, ha a re: ‘Sechaba sena se ntlhompha ka melomo ea sona feela, empa lipelo tsa sona li hōle le ’na; se nkhumamella lefeela, empa se ruta lithuto tseo e leng litaelo tsa batho.’”—Matheu 15:6-9, BPN.

Malumeli a mangata a lefatše a bolela hore a hlompha Bibele, ebang ke a Bokreste kapa hase a Bokreste. Leha ho le joalo, ke malumeli  a makae ao u a tsebang a tlohelang ho latela meetlo ea batho ha a lemoha hore e thulana le seo Lentsoe la Molimo le se rutang? Nahana feela ka mehlala e ’meli.

SEO BIBELE E SE RUTANG: Jesu o ile a nyatsa baeta-pele ba bolumeli ba mehleng ea hae hobane ba ne ba rata ho bitsoa ka litlotla tse itseng ba bile ba rata maemo a phahameng. O ile a re banna bao ba ne ba rata “litulo tse kapele meketeng, le litulo tse kapele masinagogeng, le ho lumelisoa mapatlelong, le ho bitsoa ke batho: ‘Rabbi!’” Eaba Jesu o re ho barutuoa ba hae: “Lona, le se ke la bitsoa Rabbi, hobane moruti oa lōna o mong, e leng Kreste, ’me lona bohle le bana ba motho a le mong. Le se ke la bitsa motho lefatšeng ntat’a lōna, hobane o mong feela eo e leng Ntat’a lōna, ke ea leng maholimong.”—Matheu 23:1-10, Bibele ea Sesotho.

POTSO: Na baeta-pele ba bolumeli boo ba rata ho tlotloa ka mabitso a itseng a phahameng ’me ba batla ho hlahella ka mahetla sechabeng, kapa na ba mamela taelo ea Jesu ea hore ba qobe see?

SEO BIBELE E SE RUTANG: “U se ke ua iketsetsa setšoantšo se betliloeng, leha e le setšoantšo se le seng sa tse holimo maholimong, leha e le sa tse tlase lefatšeng, leha e le sa tse metsing ka tlase ho lefatše. U se ke ua li khumamela, u se ke ua li sebeletsa.”—Exoda 20:4, 5, Bibele ea Sesotho.

Moapostola Johanne o ile a ngolla Bakreste a re: “Itlhokomeleng melimong ea bohata.”—1 Johanne 5:21, Bibele—Phetolelo e Ncha.

POTSO: Na litho tsa bolumeli boo li hlompha molao oo o hlakileng oa Bibele ka ho qoba ho sebelisa litšoantšo ha li rapela Molimo?

Le hoja kajeno ho e-na le malumeli a mangata a ka ferekanyang motho, u ka fumana bolumeli bo isang bophelong. Ho na le matšoao a mangata a khethollang “borapeli bo hloekileng, bo se nang sekoli mahlong a Molimo.” (Jakobo 1:27, Bibele ea Sesotho) Mangolo a tšohliloeng lihloohong tsena a tšoana le matšoao a ka u thusang hore u fumane bolumeli ba mofuta oo.

Ho ka ba joang ha u ka kōpa Lipaki Tsa Jehova hore li u qaqisetse likarabo tsa lipotso tse botsitsoeng lihloohong tsee? Ha u ntse u nahanisisa ka seo li se buang, latela mohlala o motle oa batho ba neng ba phela lekholong la pele la lilemo motseng oa Berea. Ka mor’a hore ba utloe ha moapostola Pauluse a bolela evangeli, ba ile “ba fuputsa Mangolong . . . ho bona hore na litaba tseo [Pauluse a neng a ba bolella tsona] li joalo” na. (Liketso 17:11, BPN) Haeba joaloka Baberea u hlompha Lentsoe la Molimo u bile u ithuta lona ka tjantjello, u tla fumana tsela e lebisang bophelong. Hore na u tla khetha ho tsamaea ka tsela eo kapa che, ke qeto eo u lokelang ho iketsetsa eona.