Selemo se seng le se seng, ho sakhoa lifate tse libilione e le hore ho hlekeloe sebaka sa ho lema. Hoo e ka bang halofo ea meru eohle e fumanehang libakeng tse chesang moo pula e nang haholo, e ile ea fela ho tloha lilemo tse 75 tse fetileng.

Ha moru o sakhoa, melemo eohle ea oona ea fela.

Hoa makatsa hore ebe meru e ileng ea sakhoa e khona ho hlaha hape ha nako e ntse e e-ea ebile e ka hlaha e le meholo le ho feta. Litsebi li makatsoa ke kamoo meru e sakhiloeng e khonang ho itlhahisa le ho atleha kapele kateng. Nahana ka mehlala e latelang:

• Bafuputsi ba ile ba sheba hore na ho tla etsahala’ng ka sebaka seo ho ileng ha sakhoa moru ho sona e le hore ho hlekeloe ho lema. Ho ile ha hlahlojoa libaka tse 2 200 Amerika le Afrika e Bophirimela eaba ho fumanoa hore pele lilemo tse leshome li feta, moru o ka qala ho mela hape.

• Ho latela liphuputso tse tlalehiloeng makasineng o bitsoang Science, ho hakanngoa hore lilemong tse ka bang lekholo, libakeng tse joalo ho ka mela lifate tse ngata tse sa tšoaneng le limela tse ling tse hlahang merung.

• Bo-rasaense ba Brazil ba ile ba bapisa hore na meru e itlhahisa kapele hakae libakeng tse ileng tsa sakhoa eaba lia tloheloa le tseo batho ba ileng ba leka ho li tsosolosa.

• Ha National Geographic e bua ka liphuputso tsa bo-rasaense e re: “Ba ile ba thaba ha ba fumana hore ba ne ba sa hloke ho lema lifate hape.” Ka mor’a lilemo tse hlano, ho ne ho se ho e-na le lifate tse ngata tse itlhahisitseng.

Lefatšeng lohle, batho ba etsa lintho tse ngata ho leka ho sireletsa meru e setseng le e seng e sakhiloe boholo. Ka lebaka la sena, mokhatlo oa Machaba a Kopaneng o ile oa re: Ka lilemo tse 25, “sekhahla sa meru e sakhoang se fokotsehile ka liphesente tse 50.”

Leha ho le joalo, boiteko bona ha boa lekana. Mokhatlo oa Global Forest Watch o re: “Le hoja ho etsoa boiteko, meru e libakeng tse chesang moo pula e nang haholo e ntse e senyeha ho ea pele.

Likhoebo tse sakhang lifate ntle ho tumello ebe li rekisa mapolanka li etsa chelete e ngata, kahoo li ba meharo ebe li senya meru e mengata.

“Jehova a Molimo a melisa lifate tsohle tse ntle le tseo litholoana tsa tsona li ka jeoang.”—Genese 2:9.

Jehova o entse hore le hoja batho ba ka senya meru, e khone ho itlhahisa hape. Kahoo, e lula e le teng ebile e tsoela batho molemo. O batla hore meru le lintho tse phelang ka har’a eona li lule li le teng.

Bibele e re Molimo a ke ke a lumella batho ba meharo ho senya lefatše le lintho tse phelang ho lona. Sheba sehlooho se reng: “Molimo o Tšepisa Hore Lefatše le Tla Lula le le Teng” leqepheng la 15.