Selemo le selemo, palo e itseng ea bahlanka ba Jehova ba tšebeletsong e khethehileng ea nako e tletseng, ba hlahang libakeng tse fapaneng lefatšeng ba memeloa ho ea Sekolong sa Bibele sa Gileade sa Watchtower. Sekolo sena se tšoareloa Setsing sa Thupelo sa Watchtower se Patterson, New York. a Sekolong sena, bahlanka ba Molimo ba ithuta kamoo ba ka sebetsang ha molemo kateng mesebetsing e fapaneng eo ba e etsang ka mokhatlong oa Molimo. Thupelo eo ba e fuoang moo, e ba thusa hore ba matlafatse le ho khothatsa liphutheho le makala lefatšeng lohle.

 Gileade ke sekolo sa machaba. Mohlala, sehlopheng sa bo-147 sa 2019, ho ne ho e-na le baithuti ba 56 ba hlahang linaheng tse 29. Ho baithuti bao, ba bang bona e ne le ba hlahang Bethele, ba bang e le bapotolohi, barumuoa ha ba bang bona e ne e le bo-pula-maliboho ba khethehileng.

 Ho lokisetsoa sekolo le pele tlelase ea pele e qala. Mohlala, Lefapha la Maeto le Ntlo-kholo le rekela baithuti ba menngoeng litekete tsa sefofane. Bakeng sa sehlopha sa bo-147, moithuti ka mong ea hlahang naheng e ’ngoe o ile a patalloa chelete e ka bang M16 620 ho tla Patterson le ho khutla. Baithuti ba hlahang Solomon Islands, ba ne ba lokela ho palama lifofane tse ’nè e le hore ba tle ba fihle Patterson. Ha ba khutla ba ne ba lokela ho palama tse tharo. Ka kakaretso, ba ne ba tla be nkile leeto la lik’hilomithara tse 35 400. Leeto leo kaofela le ne le bitsa chelete e ka bang M35 500. Ntho eo lefapha la maeto le e etsang bakeng sa ho boloka chelete ke ho sebelisa lenaneo la k’homphieutha e le hore le fumane lifofane tse litjeho li tlaase. Leha ba se ba behelelitse tekete ea sefofane, lenaneo la k’homphieutha leo ba le sebelisang le lula le ntse le batlana le litekete tse seng turu.

 Baithuti ba bangata ba hloka tumello e le hore ba kene United States. Karolong eo, Lefapha la Molao le Ntlo-kholo ke lona le thusang Baithuti ho fumana litokomane tse ba lumellang ho kena United States. Litokomane tseo le ho ngolisa li ka bitsa chelete e ka bang M7 900 bakeng sa moithuti ka mong.

 Re rua molemo joang koetlisong eo Baithuti baa ba e fumang? Ntate Hendra Gunawan ke moholo Asia e ka boroa bochabela. O phuthehong e le ’ngoe le banyalani ba tsoang Gileade. Ntate Hendra o re: “Qalong, phutheho ea rona e ne e se na bo-pula-maliboho ho hang. Empa ka mor’a hore banyalani bana ba fihle, batho ba ile ba latela mohlala oa banyalani bao ba neng ba cheseha ebile ba na le moea oa boithaopo. Hamorao, morali e mong oa bo rona o ile a ba a ea Sekolong sa Baevangeli ba ’Muso.”

 Ntate Sergio Panjaitan o sebetsa Bethele e ka boroa bochabela Asia le barali ba bo rona ba bane le mora oa bo rona ba tsoang Gileade. Ntate Sergio o re: “Thuto eo ba e fumaneng ke tlhohonolofatso ho bona le ho rona. Hona le lintho tse ngata tseo ba ithutileng tsona. Ho e-na le hore ba etse eka ba betere ho feta batho ba bang, ba arolelana le bona seo ba ithutileng sona. Kahoo rea khothatsana le ho khothatsa ba bang.”

Mokhatlo o koahela litšenyehelo tsa sekolo see joang? O sebelisa monehelo o etsoang lefatšeng lohle o ntšoang ka donate.jw.org. Re leboha menehelo ea lona e ntšitsoeng ka seatla se bulehileng e tšehetsang sekolo se koetlisang baithuti ba hlahang likarolong tse ngata tse lefatše.