Ho Baheberu 3:1-19
3 Ka lebaka leo, bana beso ba halalelang ba bitseditsweng ho ya phela lehodimong,+ nahanang ka moapostola le moprista ya phahameng eo re bolelang hore re na le tumelo ho yena e leng Jesu Kreste.+
2 O ne a tshepahalla Modimo ya mo kgethileng+ jwalo ka ha Moshe le yena a ne a tshepahalla Modimo ha a ne a sebetsa ntlong ya hae.+
3 Jesu o nkwa a tshwanelwa ke tlotla+ e fetang ya Moshe feela jwalo ka ha motho ya hahang ntlo a hlomphuwa ho feta ntlo ka boyona.
4 Ntlo e nngwe le e nngwe e hahwa ke motho ya itseng empa ya hahileng dintho tsohle ke Modimo.
5 Moshe e ne e le mohlokomedi ya tshepahalang wa ntlo ya Modimo. Mosebetsi oo a o entseng e ne e le bopaki ba dintho tseo Modimo a neng a tla di bua ha morao.
6 Empa Kreste e ne e le mora ya tshepahalang+ ya okametseng ntlo ya Modimo.+ Re ntlo ya Modimo haeba re dula re ena le sebete sa ho bua ebile re dula re ena le tshepo ho fihlela qetellong mme re le motlotlo ka yona.
7 Ka lebaka lena, moya o halalelang o re:+ “Haeba le mamela lentswe la ka kajeno,
8 le se ke la ba manganga jwalo ka baholoholo ba lona mohla ba neng ba nkgalefisa haholo le jwalo ka mohla ba neng ba nteka lefeelleng.+
9 Baholoholo ba lona ba ile ba nteka le hoja ba bone mesebetsi ya ka ka dilemo tse 40.+
10 Ka lebaka lena, ke ile ka nyonya moloko oo yaba ke re: ‘Setjhaba sena se dula se ntlhanohela ka dipelong tsa sona. Ha se tsebe ditsela tsa ka.’
11 Ka hoo, ka ikana ke halefile ka re: ‘Ba ke ke ba phomola le nna.’”+
12 Hlokomelang bana beso hore ho se ke ha eba le ya bang le pelo e mpe e se nang tumelo ka lebaka la ho suthela hole le Modimo ya phelang.+
13 Le kgothatsane letsatsi le letsatsi ha feela ho sa na le letsatsi le bitswang “kajeno”+ e le hore ho se ke ha eba le eo pelo ya hae e thatafalang ka lebaka la ho thetswa ke sebe.
14 Re tla fuwa seo Kreste a ileng a se fuwa haeba feela re dula re ena le tshepo ho fihlela qetellong e leng tshepo eo re neng re ena le yona ho tloha qalong.+
15 Mangolo a re: “Haeba le mamela lentswe la ka kajeno, le se ke la ba manganga jwalo ka baholoholo ba lona mohla ba neng ba nkgalefisa haholo.”+
16 Ke bomang ba utlwileng lentswe la Modimo yaba ba mo halefisa ho ntse ho le jwalo? Na ha se bohle ba ileng ba tswa Egepeta ba etellwa pele ke Moshe?+
17 Hape ke bomang bao Modimo a ileng a ba nyonya ka dilemo tse 40?+ Na ha se ba ileng ba etsa sebe, ba ileng ba shwella lefeelleng?+
18 Ke bomang bao Modimo a ileng a ikana hore ba ke ke ba phomola le yena? Na ha se ba ileng ba hana ho mo mamela?
19 Re a bona hore ba hlotswe ho phomola le Modimo hobane ba ne ba se na tumelo.+
