Pe e Iai se Aogā o Lenei Olaga?

O LE toʻatele o tagata ua fesili e faapea: “Pe e iai ea se aogā o le olaga?” Ae po o le ā lava lo latou manatu e uiga i le olaga, e iā i latou le lagona lea o loo taʻua e Viktor E. Frankl, o se fomaʻi faapitoa, “e leai se aogā po o se uiga o le olaga.”

Aiseā ua manatu ai faapea tagata? O se tasi o māfuaaga, ona e faitau miliona tagata i le lalolagi o loo ola i tulaga leaga ma faigatā. Ua avea le mativa, faamaʻi, faiga ma pulega sauā, ma mea masani i o latou olaga. Ua ʻtumu o latou olaga i le atuatuvale,’ e pei ona taʻua e Iopu e uiga i mafatiaga o tagata. (Iopu 14:1) E pau lava lo latou naunautaʻiga ia aulia le isi aso.

E faitau miliona tagata o loo ola i se olaga e lelei le tamaoaiga, ma e foliga mai o loo latou mauaina mea uma e manaʻomia i le olaga. Ae e lē o le tulaga lenā o le toʻatele. Aiseā? Ona o loo feagai pea ma “faafitauli ma mea e tigā ai,” e pei o faafitauli tau tupe, o puapuaga e pei o le maliu o se tamaitiiti, ma ua mou atu ai o latou moomooga ma faamoemoega.​—Salamo 90:10.

O loo iai se isi māfuaaga ua atili ai ona manatu tagata ua “leai se aogā po o se uiga o le olaga.” Ona ua puupuu tele le olaga. I le toʻatele o tagata, e leai se uiga o le tele o mea e mafai ona fai e tagata, ae e puupuu sina taimi e ola ai. E latou te lē o malamalama i le mea moni e faapea, e tusa lava pe e tatou te lē aafia i puapuaga o le olaga, ae pe a tatou feoti ua lē aogā mea uma.​—Failauga 3:19, 20.

Po o le a Faatauvaa Pea ma lē Aogā le Olaga?

Na faamatalaina ma le manino e le tupu o Solomona lea tulaga. Na ia vaaia galuega mamafa a tagata i le faaaogāina o o latou tomai ma taleni i le totōina, galueaʻiina o faatoʻaga, fausia o fale ma le tausia o o latou aiga, e pei lava ona tatou faia i aso nei. E peiseaʻī o fesili  mai: ʻO le ā le aogā o nei mea uma?’ Na taʻua e ia, o mea uma lava e faia e tagata, “e faatauvaa ia ma le ʻai a le matagi.”​—Failauga 2:17.

Ae pe na talitonu ea le tupu o Solomona o le a ʻfaatauvaa pea ma ʻai a le matagi’ mea uma lava e faia e tagata? E leai. Ua na ona ia faamatala mai le mea moni o loo tupu i lenei lalolagi agasala. Peitaʻi, ua faamautinoa mai i le Tusi Paia, o le a lē tumau ai pea faapea le olaga.

E faapefea ona e maua lenei faamautinoaga? E lelei la ona e faitau i isi mataupu e lua o loo sosoo mai. E lē taumatea o le a aogā iā te oe e iloa māfuaaga ua peiseaʻī ai e leai se aogā o le olaga, le vaifofō o lea tulaga, ma le auala e manuia ai lou olaga i le taimi nei.