Ia Mafuta Atu i le Atua

“Le Atua o Faamāfanafanaga Uma”

2 Korinito 1:3, 4

E TELE mea i le olaga—e pei o mafatiaga, faamoemoega lē taulau, ma le faavauvau—e aumaia ai le faanoanoa ma oo ina faavaivai ai. O taimi faapena e te ono taumānatu ai, ‘O fea o le a ou maua ai se fesoasoani?’ I upu a le aposetolo o Paulo o loo maua i le 2 Korinito 1:3, 4, o loo faasino atu i le puna e lē gata mai o faamāfanafanaga—o Ieova le Atua.

I le fuaiupu e 3, o loo taʻua ai le Atua, “o le Tamā o le alofa mutimutivale.” O le ā lona uiga? O le upu Eleni ua faaliliuina ai le “alofa mutimutivale,” o loo faatatau atu i ni lagona alofa ona o mafatiaga o isi. * Ua taʻua e se tasi o lomifefiloi o le Tusi Paia, o lenei faaupuga e ono uiga atu i le “mutimutivale o lona alofa” po o le “manatu mamafa i ai.” O le alofa mutimutivale o le Atua e uunaʻia ai o ia e gaoioi. O le iloaina o lenei vala o uiga o le Atua, e faaosofia ai lo tatou mananaʻo e fia mafuta atu iā te ia.

O loo faasino atu foʻi Paulo iā Ieova, o ia “o le Atua o faamāfanafanaga uma.” O loo faaaogā ai e Paulo se upu e aofia ai “le faia o se gaoioiga e fesoasoani ai pe faalaeiau ai lē o loo mafatia pe faanoanoa.” Ua faamatala mai e le Interpreter’s Bible e faapea: “E tatou te faamāfanafana atu i lē o mafatia pe a tatou avatu iā te ia le lototele ina ia onosaia ai ona tigā.”

Atonu e te ono fesili ifo, ‘E faapefea ona faamāfanafanaina i tatou e le Atua, ma aumai iā i tatou le lototele e onosaia ai tigā?’ E tele lava ina ia faia faapea e ala mai i lana Afioga le Tusi Paia, faapea ma lana meaalofa o le tatalo. Ua taʻu mai e Paulo iā i tatou, ua foaʻi mai ma le alofa e le Atua lana Afioga ina ia ‘tatou maua ai le faamoemoe e ala i le faamāfanafana mai o Tusitusiga Paia.’ E lē gata i lea, o tatalo e faia ma le lotoatoa, e tatou te lagona ai le “filemu mai le Atua, lea e silisili i mea uma lava e manatu i ai.”—Roma 15:4; Filipi 4:7.

O le ā le tele o loo faamāfanafana ai e Ieova ona tagata? Ua faapea mai Paulo o le Atua e “na te faamāfanafanaina i tatou i o tatou puapuaga uma.” (2 Korinito 1:4) E tusa lava po o ā omiga, o faanoanoaga ma mafatiaga e ono tutupu mai, e foaʻi mai e Ieova le faatuatua ma le malosi talafeagai e tatou te fesagaʻia ai. Pe e lē o se faamāfanafanaga ea lenā mea?

E lē gata faamāfanafanaga a Ieova iā i latou o loo mauaina. Ona na faapea atili mai Paulo, e faamāfanafana e le Atua i tatou uma, “ina ia mafai foʻi ona tatou faamāfanafana atu i ē ua oo i ai so o se puapuaga, i le faamāfanafanaga ua faamāfanafanaina ai i tatou e le Atua.” O le mauaina o faamāfanafanaga mo o tatou mafatiaga, e fesoasoani lenā iā i tatou e malamalama ai i lagona o isi ma uunaʻia ai e faalautele atu le fesoasoani iā i latou o manaʻomia.

I le avea ai ma “Atua o faamāfanafanaga uma,” e lē faapea ai o le a aveesea e Ieova o tatou faafitauli ma tigā. Ae o le mea e tatou te mautinoa: Afai tatou te liliu atu iā te ia mo faamāfanafanaga, o le a ia faamalosia i tatou ina ia lavatia so o se faanoanoaga ma faafitauli i le olaga. Ua tatau ona tatou viia ma tapuaʻia lea Atua e tele lona alofa.

[Faaopoopoga i lalo]