Skip to content

Skip to table of contents

Fesili Mai le ʻAufaitau

Fesili Mai le ʻAufaitau

Aiseā na tagi ai Iesu a o leʻi faatūina Lasalo e pei ona faamatalaina i le Ioane 11:35?

E masani ona tatou fetagisi pe a maliu sē e pele iā i tatou, auā o le a misia le mafutaga. E ui i le alofa o Iesu iā Lasalo, peitaʻi e leʻi maligi ona loimata ona o le maliu o Lasalo. Na tagi Iesu ona o lona alofa i uō ma tauaiga o Lasalo, e pei ona faamatalaina i le tusi a Ioane.​—Ioa. 11:36.

E leʻi vave ona alu Iesu e faamālōlō Lasalo ina ua ia faalogo o loo maʻi o ia. Ua faapea mai le Ioane 11:6, “ina ua ia faafofoga o loo maʻi o ia, ona ia nofo ai pea lea i le mea o loo iai mo aso e lua.” Na iai se māfuaaga na faatuai ai Iesu. Na ia fetalai: “E lē iʻu lenei maʻi i le oti, ae e iʻu ina faamamaluina ai le Atua, ina ia faamamaluina ai le Alo o le Atua i lenei mea.” (Ioa. 11:4) O le oti e lē o le ʻiʻuga’ o le maʻi o Lasalo. Na faanaunau Iesu e faaaogā le maʻi o Lasalo e “faamamaluina ai le Atua.” E faapefea? Na faia e Iesu se vavega mataʻina e ala i le toe faatūina o lana uō pele o Lasalo.

Ina ua talanoa Iesu ma ona soo e faatatau i le mea na tupu, na faatusa ai e Iesu le oti i le moe. O le māfuaaga lea na ia fetalai ai i le Ioane 11:11, e ʻalu e fafagu Lasalo auā o loo moe.’ E taitutusa le faatūina e Iesu o Lasalo ma le fafaguina e se matua o se tamaitiiti o loo moe. O lea, e leai se māfuaaga na faanoanoa ai Iesu ina ua maliu Lasalo.

Aiseā na tagi ai Iesu? E maua le tali i le faamatalaga a le mau. Ina ua silasila Iesu i le fetagisi o Maria le tuafafine o Lasalo ma isi tagata, ona “ōi ai lea ma ua ootia lona finagalo.” Na “ōi” pe na matuā tigā faalogona o Iesu, ma o le māfuaaga lea na ia tagi ai. Na matuā faanoanoa Iesu ina ua silasila atu i le mafatia ma le faavauvau o ana uō pele.​—Ioa. 11:33, 35.

E faaalia mai i lenei mea na tupu e naunau Iesu e faatutū mai i se tulaga mālōlōina ē pele ua maliliu i le lalolagi fou, ma e iā te ia le mana e faia ai faapea. E faailoa mai ai foʻi le tigā alofa o Iesu mo i latou ua maliliu ē pele iā i latou, ona o le oti tuufaasolo mai iā Atamu. O se tasi lesona e aʻoaʻoina mai ai, e tatau ona tatou tigā alofa pe a faanoanoa isi ona o le maliliu o ē pele iā i latou.

Na silafia e Iesu o le a ia toe faatūina mai Lasalo. Peitaʻi na ia tagi ona o lona tigā alofa i ana uō. E faapena i tatou, o le tigā alofa e māfua ai ona tatou “fetagisi faatasi ma ē o loo fetagisi.” (Roma 12:15) O le faaalia o le faanoanoa o se tasi pe a maliu sē e pele iā te ia, e lē faapea ai ua leai sona faatuatua i le faamoemoe o le toetū. O lea, maʻeu se faaaʻoaʻoga lelei na faataatia e Iesu, o le faaalia o le tigā alofa ina ua maligi ona loimata, e ui na mafai ona ia toe faatūina Lasalo.