Skip to content

Skip to table of contents

Se Taimi Tāua o Loo O‘u Faatalitali i Ai

Se Taimi Tāua o Loo O‘u Faatalitali i Ai

 Se Taimi Tāua o Loo Oʻu Faatalitali i Ai

E IAI se taimi tāua o loo oʻu faatalitali i ai. O aʻu o se tinā talavou Sepania ma ou te fia faamatala atu le māfuaaga o loo oʻu faatalitali ai i lea taimi tāua.

E leʻi maua le filemu ma le fealofani i loʻu aiga. Na matuā mafatia lo matou aiga ina ua maliu loʻu tuagane laʻitiiti e fā tausaga i se faalavelave mataʻutia. O uiga lē lelei foʻi o loʻu tamā na faigatā ai i loʻu tinā ona maua le fiafia i le la faaipoipoga. Peitaʻi, e leʻi avea na tulaga faigatā ma mea na taofia ai loʻu tinā mai le aʻoaʻoina o loʻu tuagane matua ma aʻu i amioga lelei.

Na ou faaipoipo, faapea foʻi loʻu tuagane. E leʻi umi ae iloa ua maua loʻu tinā i le kanesa, lea na oo ina maliu ai. A o leʻi maliu o ia, na ia tuuina mai iā i maʻua se mea tāua.

Na talanoa atu iā te ia se tasi o ana uō i le faamoemoe o le toetū mai le Tusi Paia ma na talia e loʻu tinā se suʻesuʻega o le Tusi Paia. O le faamoemoe mai le Tusi Paia, na ia maua ai aogā o le olaga ma fesoasoani ai iā te ia e maua le fiafia i toe taimi o lona ola.

Talu ai ua ma molimauina le aogā o le feʻau o le Tusi Paia i lo ma tinā, o lea na faia ai foʻi ma suʻesuʻega o le Tusi Paia ma loʻu tuagane. Na ou papatiso o se Molimau a Ieova ae toe tasi le masina oʻu fanau i laʻu tama lona lua, o se teine aulelei na ou faaigoa iā Lusia.

Na matuā tāua iā te aʻu le aso o loʻu papatisoga. O se tasi o māfuaaga, ua avea aʻu ma auauna a Ieova, e auauna iā te ia seʻia oo i le oti. O le isi māfuaaga, ua mafai ona ou aʻoaʻoina laʻu fanau i mea ua ou talitonu ai.

Peitaʻi e leʻi umi loʻu fiafia ona ua afāina laʻu tama teine i se maʻi. I le fā o tausaga o Lusia, na fai ma tigā tutui lona manava. Ina ua uma ni suʻesuʻega, na faapea mai le fomaʻi faaata, ua iai se tuma e pei o le telē o se moli i autafa o lona ate. Na faapea mai le fomaʻi ua maua o ia i le maʻi e taʻua o le neuroblastoma, o se tuma ua kanesa ma e vave lona sosolo. O le amataga lea o tausaga e fitu na tauivi ai Lusia ma le kanesa, lea e aofia ai se taimi umi o nofo i le falemaʻi.

E Lē Manatu Tau Lava o Ia

E masani ona māfanafana loʻu loto i fusi ma sogi a Lusia i ia taimi faigatā. Na maofa foʻi le ʻaufaigaluega a le falemaʻi i le auala na feagai ai o ia ma lona maʻi. E fiafia lava o ia e galulue faatasi ma teine tausimaʻi, e fesoasoani iā i latou e tufa yogurt, vaiinu e fai mai i fualaau ʻaina, ma isi mea a tamaiti o loo mamaʻi i isi vaega o le falemaʻi. Na tuuina atu foʻi e teine tausimaʻi iā te ia se ofu paʻepaʻe ma se pine e faailoa ai o ia o se “fesoasoani a teine fomaʻi.”

Na faapea mai se tasi e faigaluega i le falemaʻi: “E ese loʻu alofa iā Lusia. E ese le tiotio, e lelei lona mafaufau, ma e fiafia e vali ata. E tautalatala ma e faatagata matua foʻi ana mea e fai.

Na maua e Lusia le malosi ma le filemu mai i le Afioga a le Atua. (Epe. 4:12) Na ia mautinoa le folafolaga a le Tusi Paia e faatatau i le lalolagi fou, “e lē toe iai se oti, po o se faanoanoa, po o se tagiauē, e lē toe iai foʻi se tigā.” (Faaa. 21:4) Na ia faaaogā avanoa uma e faailoa atu ai le feʻau a le Tusi Paia ona o lona naunau fiafia i isi. O le mautinoa maumaututū o Lusia i le faamoemoe o le toetū, na aogā lea iā te ia e pulea ai pea ona faalogona ma fiafia e ui ina foliga mai e lē toe foʻi lona maʻi i se  lelei. (Isa. 25:8) Na iā te ia pea lea uiga seʻia oo i le aso na maliu ai i le kanesa.

O le aso lenā na ou faia ai se tuutuuga tāua. Na tau lē mafai ona matala mata o Lusia. Na uu e lona tamā le isi ona lima ae oʻu uu le isi ona lima. Na ou musumusu atu: “Aua e te popole, ou te lē tuua oe, mānava lemū. Pe a e ala aʻe, o le a e malosi. E te lē toe tigā ma o le a ou iai faatasi ma oe.”

O lea e ao ona ou faatalitali i lenā taimi tāua. Ou te iloa e lē faigofie le taimi e faatalitali ai. Ae ou te iloa foʻi a ou faatuatua pea iā Ieova ma faaauau ona ou faamaoni iā te ia, o le a ou iai pe a toe foʻi mai Lusia i le toetū.

Se Mea na Alu Lusia ae Tuu

Na iai se aafiaga tele i laʻu tane, o lē e lē talitonu i mea ou te talitonu i ai, ona o le faataʻitaʻiga lelei o le lototele o Lusia, faapea foʻi ma le lagolago a le faapotopotoga. I le aso na maliu ai Lusia, na faapea mai laʻu tane iā te aʻu o le a ia toe mafaufau i mea. I ni vaiaso na mavae ai, na ia talanoa i se toeaina i le faapotopotoga e fai sana suʻesuʻega o le Tusi Paia. E leʻi umi ae auai laʻu tane i sauniga uma. O le fesoasoani a Ieova na taofia ai lana ulaula, o se mea e leʻi mafai ona ia faia muamua.

E leʻi mou atoatoa atu loʻu faanoanoa ona o le maliu o Lusia, ae ou te matuā faafetai iā Ieova ona o le mea na tuuina e Lusia. E ma te fefaamāfanafanaaʻi ma loʻu toʻalua i le faamoemoe o le toetū, e ma te faaataina i o ma mafaufau le taimi e ma te toe vāai ai iā Lusia, i ona foliga tiotio, o ona mata lapotopoto ma ona foliga mataʻataʻata.

Na ootia foʻi se tasi e nofo i lo matou vaipanoa i le mea na tupu i laʻu tama. I se tasi Aso Toonai timu lava, na sau ai se tinā na aʻoʻoga faatasi lana tama tama ma Lusia i lo matou fale. Ua maliu le isi ana tama tama e 11 tausaga i le maʻi lava lea e tasi. Ina ua ia iloa le mea ua tupu iā Lusia, na maua e lea tinā le mea matou te nonofo ai ma sau ai i lo matou fale. Sa ia fia manaʻo e iloa po o ā mai aʻu talu ona maliu Lusia ma faapea mai e mafai ona faavae se ma faalapotopotoga e faamāfanafana ai isi tinā o ē ua oo ai ia tulaga.

Na ou fai atu iā te ia, ua ou maua le faamāfanafanaga moni i se tasi o folafolaga a le Tusi Paia, lea e sili atu nai lo se faamāfanafanaga e aumaia e tagata. Na uaʻi mai o ia a o oʻu faitau atu iā te ia le faamoemoe i upu a Iesu o loo tusia i le Ioane 5:28, 29. Na talia e ia se suʻesuʻega o le Tusi Paia ma e leʻi umi ae ia lagona le filemu o le mafaufau mai i le Atua. (Fili. 4:7) Pe a ma suʻesuʻe faatasi ma laʻu tane le Tusi Paia, e masani ona ma faaataina i maʻua lava i le faiga fou, a o faafeiloaʻi ē pele i le toetū.

Ioe, e ui ina puupuu le olaga o Lusia ae ua iai se mea tumau. O lona faatuatua ua fesoasoani i lo matou aiga e auauna faatasi ai i le Atua, ma ua faateleina ai loʻu maumauaʻi i laʻu faaiʻuga e faaauau ona ou tutumau i le faatuatua. E mautinoa o loo faatalitali i latou uma, ua maliliu nisi e pele iā i latou, i se taimi tāua.

[Ata i le itulau 20]

Le ata o le parataiso e pei ona tusia e Lusia