O le ā se Fesili E te Fia Fesili ai i le Atua?

E IAI ni fesili tāua o loo fia fesili ai le toʻatele o tagata i le lalolagi e uiga i le olaga. Ae ā oe? O le toʻatele o tagata ua fesili atu i faiaʻoga faalelotu, ae e leai ni tali faamalieloto na latou maua mai ai. O isi, ua mafaufau loloto i latou lava e uiga i nei fesili. Ua tatalo nisi mo se faasino ala. Pe e mafai moni ona e maua ni tali mai le Atua e uiga i mataupu o loo faafaigatā ona e malamalama i ai? O nisi nei o fesili ua faapea mai le toʻatele o loo fia fesili atu ai i le Atua.

Le Atua e, o ai ea oe?

Ua taaʻina le auala o loo manatu ai tagata i le Atua i a latou aganuu, i le lotu a o latou mātua, ma atonu i a latou lava filifiliga. Ua faaaogā e nisi tagata se igoa mo le Atua; ae o nisi ua na ona taʻua lava o ia o le Atua. Pe e afāina ea lea tulaga? Pe e iai moni se Atua e toʻatasi o lē na te faaalia mai o ia ma lona suafa iā i tatou?

Aiseā ua tele naʻuā ai puapuaga?

Afai e faaleagaina e le olaga soonafai ma amioga leaga a se tasi lona soifua mālōlōina pe oo ai ina mativa, atonu o le a ia faitio. Ae e tatau ona ia iloa lelei le pogai ua mafatia ai o ia.

Ae peitaʻi, ua oo mafatiaga tugā i le toʻatele o isi tagata, ma e lē tuuaʻia ai i latou. Ua maua nisi i maʻi faaumiumi. A o isi, o loo tauivi ma le anoanoaʻi o tulaga lē manuia ina ia maua se fale e nonofo ai, ma maua ni meaʻai e lava mo le tausiga o o latou aiga. E faitau miliona ua lavevea fua i solitulafono, taua, le lē faatuaoia o faiga sauā, o mala faalenatura, po o faiga lē tonu a i latou o loo i tulaga pule.

E letioa lava a fesili le toʻatele o tagata e faapea: ‘Aiseā ua matuā taatele ai na tulaga? Aiseā ua faataga ai e le Atua nei mafatiaga uma?’

 Aiseā ua ou ola mai ai? O le ā le fuafuaga o le olaga?

O fesili nei e masani ona mapuna mai i se tagata ua lagona le lē fiafia ona o le lē faamalieina i ana gaoioiga i aso faisoo, ma o le lagona foʻi lenā o le toʻatele o tagata. Ua talitonu le faitau miliona o isi tagata e faapea, ua uma ona tuupōina e le Atua olaga o tagata taʻitoʻatasi. Pe e saʻo lenā manatu? Afai e iai moni se fuafuaga faapitoa a le Atua mo oe, e lē taumatea o le a e fia iloa po o le ā lenā fuafuaga.

I tusi uma lava o loo iai i le lalolagi, e tasi lava le tusi e manino o loo faapea mai e faagaeeina e le Atua. E pei ona e faatalitalia le iai o se feʻau e sau moni mai le Atua mo tagata uma lava, ua maua ai lenei tusi i le tele o gagana na i lo o se isi lava tusi na tusia. O le Tusi Paia lea. I lenei tusi, ua faailoa mai ai e le Atua, o Lē na Foafoaina le lagi ma le lalolagi po o ai o ia, ma o ai foʻi lona suafa. Pe e te iloa lenā suafa? Pe e te iloaina le mea o fai mai ai le Tusi Paia e faatatau i uiga o le Atua? Pe e te iloa le mea o fai mai ai e uiga i mea e manaʻomia e le Atua mai iā te oe?

 [Faamatalaga i Ata i le itulau 2]

FAAVAA: Chad Ehlers/Index Stock Photography

[Faamatalaga i Ata i le itulau 3]

Mauga: Chad Ehlers/Index Stock Photography