‘Na Latou Talanoa e Uiga i le Agalelei ma le Alofa’

I NAI tausaga e leʻi leva tele atu, na avea ai Molimau a Ieova i Falani ma autū o se tauiviga vilivilitaʻi ina ia faalumaina i latou i ni tuuaʻiga sesē. Sa faia ai e i latou na tetee ni tala lē saʻo ma ni tala e lē matuaʻi saʻo atoatoa ina ia taʻusesēina ai i latou i luma o le lautele. I le amataga o le tausaga e 1999, na tufatufaina atu ai e Molimau a Ieova i Falani atoa le 12 miliona kopi o se sāvali o lona matua e faapea, People of France, You Are Being Deceived! (Tagata Falani e, ua Faasesēina Outou!). I lenei sāvali, o loo teena ai e Molimau a Ieova ia faamatalaga o tuuaʻiga sesē na faia faasaga ia i latou.

I ni nai aso ina ua uma le tauiviga, na auina atu ai e le susuga a Jean Bonhomme, o se fomaʻi ma sa avea muamua foʻi ma sui o le Palemene, se tusi faalauaʻitele i se nusipepa i le atunuu. Na ia tusia ai e faapea: “I nisi taimi, e ō mai ai Molimau a Ieova i loʻu fale. E latou te ō mai e talanoa mai ia te aʻu e uiga i le agalelei ma le alofa i le lalolagi aoao. . . . E latou te lē ō mai faamalosi e aunoa ma se faatagaga. E latou te faailoa mai i latou i se auala filemu ma faalogologo ma le agaalofa i oʻu manatu lē mautinoa.”

I le tautala e uiga i manatu faaleagaga o Molimau a Ieova, na faapea mai ai le susuga a Bonhomme: “I lo latou lava tulaga, e lē afaina lo latou lē atamamai i mataupu faalelalolagi. I le isi itu, o le leai o se poto i mataupu faalelalolagi o nisi fai polotiki, e matuā sili atu ona faamataʻuina ai le filemu o tagatanuu ma le tulaga maopoopo o le olaga o tagata.”