Tala a Mātua

A o tuputupu aʻe lau fanau, e faapefea ona e fesoasoani iā i latou ina ia iloa e tāua le usiusitaʻi? E faapefea ona e aʻoaʻoina i latou i tomai e aogā a o faasolo ina avea ma tagata matutua? Seʻi mātau faamatalaga a nisi o mātua mai atunuu eseese.

TOMAI E FEAGAI AI MA ISI MA LE FAIA O FEʻAU I LE AIGA

“Pe a matou aai faatasi ma talatalanoa i mea na tutupu i le aso, ua aʻoaʻoina ai e la ma fanau le auala e faalogologo lelei ai. Pe a vāai mai o ma faalogologo atu ma le onosaʻi, e latou te iloa foʻi ona faaaloalo i le isi ma iā i latou lava.”—Risati, Peretania.

“E ese le faamāfanafanaloto i le vaai atu i la ma fanau o faaaloalo le tasi i le isi, ma foʻia o latou lava feeseeseaʻiga e aunoa ma la ma fesoasoani. E latou te talanoa atu foʻi ma le mautinoa i tagata matutua.”—Ioane, Aferika i Saute.

“E lē o aʻu o se tagata e lelei atoatoa, ma o nisi taimi ou te faatigā ai i faalogona o laʻu fanau e aunoa ma loʻu iloa. Pe afai e tupu lenā mea, e tāua tele loʻu faatoese atu mo loʻu sesē.”—Janelle, Ausetalia.

“E ma te toleniina la ma fanau i le faia o feʻau i le fale. O le aʻoaʻoina o i latou ina ia galulue mo le lelei o isi ua mafai ai ona sologa lelei mea uma i totonu o le aiga, maua ai le filemu, ma fiafia ai le fanau ona o mea ua latou faataunuuina.”—Clive, Ausetalia.

“E tāua tele le aʻoaʻo o le fanau ina ia malamalama, faaaloalo, ma faamagalo atu i isi, e ui lava e lē faigofie ona faia faapea.”—Yuko, Iapani.

TUMAMĀ MA LE SOIFUA MĀLŌLŌINA

“A o lāiti la ma fanau, sa ma aʻoaʻoina i latou ina ia taeele i latou lava ma faia ni mea e fiafia i ai, e pei o le faaaogā o le fasimoli e fai ai ni tamaʻi faatagata, o fagu uu ulu o loo iai ata komi, ma omomi e faia e foliga e pei o ni tamaʻi manu.”—Edgar, Mekisikō.

“Ina ua matou nonofo i se vaipanoa e leai ni vaipaipa, sa ou faamautinoa i taimi uma o loo iai se fasimoli ma se apa vai i se nofoaga e faigofie ona ō atu e fufulu ai lima, pe a matou ō mai i le fale.”—Endurance, Nigeria.

“E ma te avatu i la ma fanau i aso uma meaʻai e maua ai le soifua mālōlōina, ma faamatala atu le māfuaaga e manaʻomia ai ona ʻai i meaʻai paleni. E fia iloa e laʻu fanau ituaiga o mea eseese o loo ave i le meaʻai, o lea ou te faatonuina ai i latou e ō mai e fesoasoani iā te aʻu i le faiga o le meaʻai. O taimi e matou te kuka ai, e faaleleia ai foʻi le auala e matou te talatalanoa ai.”—Sandra, Peretania.

“E tāua le faamalositino, ma e tatau ona faataatia e mātua le faaaʻoaʻoga. E fiafia la ma fanau pe a matou tāmoʻemoʻe, feʻausi, tenisi, pasiketipolo, po o le tiʻetiʻe uila faatasi o se aiga. Ua latou iloa ai, e lē gata e tāua le faamalositino ae e maua ai foʻi le fiafia.”—Keren, Ausetalia.

“E sili ona tāua i tamaiti le taimi e latou te iai faatasi ma o latou mātua. E lē mafai e tupe, meaalofa, po o tafaoga ona suitulaga i lenā mea. E na o le taeao ou te faigaluega ai a o iai laʻu fanau i le aʻoga. I le aoauli, ou te faifaimea faatasi ai ma i latou.—Romina, Italia.

AʻOAʻIGA

“Ua ma iloa, e lē tasi se auala e sili ona lelei e avatu ai aʻoaʻiga, ae e faalagolago lava i le tulaga o mea. I nisi taimi, o le avatu o aʻoaʻiga e aofia ai talanoaga loloto ma uigā, a o nisi taimi e manaʻomia ona faasā le tamaitiiti mai i le faia o se mea e fiafia i ai.”—Ogbiti, Nigeria.

“E ma te fai atu i la ma fanau e toe taʻu mai iā i maʻua a ma faatonuga sa fai atu iā i latou, ina ia faamautinoa o loo latou malamalama. E ma te tausisi i a ma faatonuga. Pe afai e ma te mananaʻo ia faalogo la ma fanau i a ma faatonuga, e tatau la ona ma tausisi i le avatu o faasalaga pe afai e latou te lē usiusitaʻi.”—Clive, Ausetalia.

“Ou te iloa e sili atu ona aogā le faafesagaʻi pe a aʻoaʻi laʻu fanau. E fesoasoani lenā mea e uaʻi totoʻa mai ai i latou. E mafai ona latou vāai mai i oʻu foliga ma iloa ai le mea lea ou te manaʻo i ai.”—Jennifer, Ausetalia.

“E tusa lava pe e saʻo i maʻua, ae e ma te taumafai e ʻalofia le faapea atu, ʻE lē taitai ona e faalogo.’ E ma te lē aʻoaʻia foʻi se tasi o la ma fanau pe afai o loo iai le isi vaega. E ma te musumusu i ai pe e ave foʻi i latou i se isi mea e talanoa ai na o i matou.”—Rudi, Mozambique.

“E taaʻinagofie mafaufau o tamaiti ma e mananaʻo e faataʻitaʻi i isi. Ona o lenā tulaga, e manaʻomia ona fesoasoani i a tatou fanau ina ia teena aafiaga leaga mai i tamaiti i le aʻoga, o faasalalauga, ituaiga o siʻomaga o loo ola aʻe ai, ma fesoasoani i fanau ina ia faia amioga tatau e faavae mai i tapulaa o le Tusi Paia. O le iai o ni tapulaa lelei tau amio e mafai ona fesoasoani iā i latou ina ia ʻalofia so o se mea e lamatia ai.”—Grégoire, Democratic Republic of the Congo.

“O aʻoaʻiga e manaʻomia ona maumauaʻi ma talafeagai. E tatau ona malamalama le fanau i āuga e oo iai pe a latou faia se mea sesē, ma pe afai e latou te lē usiusitaʻi, o le a e avatu le faasalaga e pei ona e fai atu ai.”—Owen, Egelani.

 [Faamatalaga faaopoopo i le itulau 14]

“Aua le faaonoono i a outou fanau, ina neʻi lotovaivai i latou.”—Kolose 3:21

 [Pusa/Ata i le itulau 15]

TALAAGA O LE AIGA

Auala e Taulau ai o se Matua Nofo Toʻatasi

O se faatalatalanoaga ma Lucinda Foster

O le ā le mea e sili ona faigatā iā te oe o se matua nofo toʻatasi?

O se mea faigatā le avea ma matua, ae i le avea ma matua nofo toʻatasi, e sili atu ona faigatā le taumafai e faasoasoa loʻu taimi ma le malosi. E tele se taimi e alu i le aʻoaʻoina o taʻiala ma tapulaa, ma maua pea se avanoa e mālōlō ma toē faatasi ai. E masani ona faataulaga le taimi ou te mālōlō ai e faauma ai a matou feʻau i le fale.

E faapefea ona faatumau pea le lelei o le auala e te talanoa ai ma lau fanau teine?

Ina ua ma teteʻa ma laʻu tane, na lagona e le fanau le lē malupuipuia ma le lē fiafia. Na ou iloa, pe a iai se faafitauli e tulaʻi mai, e sili atu le talanoa saʻo iā i laʻua ma i se leo malū. Ou te faatali seʻi toʻafilemu uma i matou, ona ou taumafai lea e faamatala atu loʻu manatu e aunoa ma le soona faamamafa o le mataupu. Ou te fesili atu mo ni o la manatu, faalogologo lelei, ma faailoa atu loʻu faatāuaina o o la faalogona. Ou te fesoasoani i a la meaaʻoga ma faamalō iā i laʻua mo mea ua la faia. E matou te aai faatasi i se siʻomaga e filemu ma toʻafimālie. E faaauau foʻi ona ou faailoa atu ou te alofa iā i laʻua.

E faapefea ona e avatu aʻoaʻiga?

E manaʻomia e le fanau tapulaa ma tulafono manino, ma e tāua le tausisi i ai. Ou te taumafai e faaalia le agalelei ae ia maumauaʻi foʻi. E manaʻomia ona ou talatalanoa ma laʻu fanau ma faamatala i ai māfuaaga patino e sesē ai nisi o amioga. Ou te taumafai foʻi e fesili atu ina ia iloa ai mea o loo la mafaufau i ai a o leʻi aʻoaʻia i laʻua, ina ia ou iloa ai le māfuaaga o a la gaoioiga. O se faaaʻoaʻoga, ou te faatoese atu pe afai ua ou sesē ona o loʻu lē malamalama i le mea na tupu.

E faapefea ona e aʻoaʻoina lau fanau ina ia faaaloalo i isi?

Ou te faamanatu i ai le mea na aʻoaʻo mai e Iesu, ina ia fai le mea e tatou te mananaʻo i isi e fai mai iā i tatou. (Luka 6:31) Ou te faalaeiau laʻu fanau teine ina ia foʻia e i laʻua lava o la feeseeseaʻiga i le tele e mafai ai, ma ou te aʻoaʻo iā i laʻua le tāua o le tali atu ma le agamalu ma le faaaloalo, pe afai e iai se mea o loo la lē fiafia ai.

O ā mea e tou te faia pe a mālōlō?

E lē o taimi uma e mafai ai ona ō e tafafao, o lea e matou te vaai ai i le nusipepa mo ni nofoaga taugofie e mafai ona matou ō i ai. E matou te ō i se tafaoga po o le savalivali foʻi e matamata i laau o loo totō i se nofoaga o loo faafailele ai. E matou te totō laau faamanogi meaʻai i lo matou togālaau, ma filifili po o ā laulaau e faaaogā i a matou meaʻai. E tāua le iai o se taimi e mālōlō ai, e tusa lava pe e na o le ō i le paka e tafafao ai.

O ā faamanuiaga ma taui ua e mauaina?

E ui e faigatā mo i matou le iai i se aiga e toʻatasi le matua, ae o lea ua māfana le faiā a le tasi ma le isi, ma ua aʻoaʻoina le faaalia o le lototalisapaia i mea lelei ua faia e le Atua mo i matou. Ou te fiafia e vaai atu i auala o loo atiaʻe ai uiga o laʻu fanau. O le taimi lenei e la te mananaʻo ai e matou te faifaimea faatasi, ma ou te talisapaia lo la faatasi mai. E la te iloa taimi ou te fiafia ai ma taimi ou te faanoanoa ai, ma e la te opo aʻu ma faalototele mai. O le faaalia mai o lo la alolofa ua ou matuā fiafia ai. O le mea e sili ona tāua, ua matou lagonaina le alofa o Lē na faia mea uma, ma lana fesoasoani mai iā i matou i le tele o taimi e faigatā ai le tulaga o mea. Ua fesoasoani le Tusi Paia iā te aʻu ia maua le malosi e taumafai ai pea e faaauau ona avea ma matua lelei.—Isaia 41:13.

[Ata]

O Lucinda ma lana fanau teine o Brie ma Shae