Pe Fofō Foʻi ma Pepe?

TUSIA E LE TUSITALA O LE ALA MAI! I SEPANIA

O SE tinā talavou mai Nigeria e igoa iā Anita, ua ia faataele lana pepe, ona ia fōfō lemū lea o lona tino. E fiafia uma le tinā ma le pepe e faia faapea. Fai mai Anita, “O se faiga masani lea a tinā i Nigeria i le tausiga o a latou pepe. Sa faia foʻi faapea e loʻu tinā iā i matou ma oʻu tuagane. O se auala lelei tele lea e faamalolosi ai maso o le pepe ma ia lagona ai le sologa lelei. Ou te pese ma ou talanoa i laʻu pepe a o oʻu fōfō pe faasolo lona tino, ma e ʻataʻata mai o ia iā te aʻu. E ese le manaia o lea mea!”

I le tele o atunuu, o se mea masani le faasolo o tino o pepe, ma ua amata foʻi ona faia faapea i atunuu i Sisifo. Ua faapea mai le Faalapotopotoga i Sepania mo le Fofōina o Pepe, o le faia faapea, o se faiga alofa e fesootaʻi ai mātua ma a latou pepe. E faasolosolo mālie ona fofō alofivae ma vae, faapea ma le tua, le fatafata, manava, lima, ma mata.

O le ā le aogā o le fofō i le pepe? O le aogā sili lava, e na te lagonaina ai le alofa faapelepeleina. E moni e manaʻomia e le pepe meaʻai, ae e na te manaʻomia foʻi le alofa o ona mātua. E amata mai lava a o itiiti ona lagonaina e le pepe le paʻi atu, o lea pe a faasolo o ia e ona mātua, e na te lagona lo la alolofa iā te ia. E tele mea o le a ia lagonaina ai. O lea, e aogā le fōfō ia faamautūina ai le alofa i le va o mātua ma le pepe, mai lava i le taimi e fanau mai ai.

E lē gata i lea, e lagonaina ai foʻi e le pepe le sologa lelei, lea atonu e lelei ma umi ai lana moe. E aogā foʻi le fofō e faamalolosi ai maso ma gasolo lelei ai lona toto, le faiga e faamalūina ai meaʻai, ma lana mānava. Ua fai mai nisi, e aogā foʻi i le tino auā le puipuia ai mai faamaʻi. E olaola ai lagona o le pepe e iai le paʻi, le tilotilo, ma le faalogo, o lea, atonu foʻi e aogā i lona manatuaina ma le aʻoaʻoina o mea.

Ua iai falemaʻi ua suʻesuʻe i le aogā o le fōfō o le tino o pepe. O se faataʻitaʻiga, na iloa mai i se tasi suʻesuʻega, o pepe e fanau lē au ae na fofōina, e oo atu i le aso lona fitu ua mafai ona vave teʻa mai le falemaʻi, pe a faatusatusa atu i pepe e leʻi fofōina, ma e tusa ma le 47 pasene le faaopoopoga o o latou pauna.

E lē na o tagata matutua la e aogā i ai le fofō! O le mea moni, e tāua tele le fofō i pepe. O se faailoaga o le alofa, e ala i le paʻi atu o lima ma tamatamaʻilima māfana, faapea ma se ʻataʻata manaia.