“Atonu o le a Suia o Ia”

O ROSA * o se tamaʻitaʻi e tiotio, e aulelei ma e toʻafā lana fanau, sa ia faaipoipo atu i se fomaʻi tipitipi e aloaʻia tele i Amerika i Saute. Ua ia faapea mai: “O laʻu tane e ese le faaaloalo i tamaʻitaʻi, ma e fiafia foʻi i ai tamāloloa.” Ae peitaʻi, o loo iai se uiga leaga o le tane a Rosa, e lē o iloaina e a la uō ia e latou te masani lelei. “I le fale, e amio faamanu (seʻi tulou). E mataʻutia le fuā.”

E taʻu mai i foliga o Rosa le popole a o faaauau lana faamatalaga. “Na amata mai le faafitauli i le na o ni nai vaiaso lava talu ona uma ona ma faaipoipo. Sa asiasi mai oʻu tuagane ma loʻu tinā iā i maʻua, ma sa manaia lava la matou feiloaʻiga, sa matou talatalanoa ma taliē. Ae ina ua latou ō ese, na sau laʻu tane ma togi atu aʻu i luga o le sofa, ma le matuā ita tele. Sa ou lē talitonu i le mea ua tupu.”

E faanoanoa, ona ua na o se amataga lenā o puapuaga o Rosa, ona i le tele o tausaga, sa fasi faamoʻamoʻa ai pea o ia. O nei faiga leaga e foliga e faifai pea. E fasi lava Rosa e lana tane, ona matuā faatoese foʻi lea ma folafola atu na te lē toe faia lava lenei mea. Ona agaʻi lea ina feoloolo lana amio—mo sina taimi. Ona toe amata foʻi lea ona tupu le mea lava lea e tasi. Ua faapea mai Rosa: “Ou te mafaufau lava pea, atonu o le a suia o ia. E tusa lava pe ou te sola ese, ou te toe foʻi mai lava iā te ia.”

E fefe Rosa ona e faapea e iai lava se aso o le a faateteleina ai le sauā o lana tane. Ua ia faapea mai: “Sa ia faafefe e fasiotia aʻu, o tamaiti, faatasi ai ma ia. Sa iai se taimi na ia tuu mai ai se seleulu i loʻu faaʻī. Ae o le isi taimi na ia faafefe ai aʻu i se fana, sa taʻi mai i loʻu taliga, ma toso le amoti! Ae o le mea e lelei ai, sa leai se pulu, ae na toetoe lava a pē loʻu fatu i loʻu fefe.”

Se Tulaga Fifilemu

I le pei o Rosa, e faitau miliona fafine i le lalolagi atoa o loo pagatia i faiga sauā a tamāloloa. * O le toʻatele o i latou o loo tumau lava ona fifilemu i o latou puapuaga. E latou te manatu faapea o le lipotia o le mataupu e mautinoa lava e lē aogā. O le mea moni lava, o le toʻatele o tane sauā e latou te faafitia le  moliaga i le faapea mai “O le lē toʻa lava o laʻu avā” po o le “Ua ia soona faatelē lava.”

E faanoanoa ona e toʻatele fafine o loo ola ma le fefefe i taimi uma i le fasia o i latou i le nofoaga e tatau ona sili atu ona latou lagonaina ai le saogalemu—i o latou lava aiga. Ae peitaʻi, o loo masani lava ona faaalia lagona alofa iā i latou o loo faia faiga sauā na i lo le tagata ua āfaina fua. O le mea moni, e lē talitonu nisi faapea e mafai e se tagata e aloaʻia tele ona fasia lana paaga. Seʻi manatu i le mea na tupu iā Anita ina ua ia faamatalaina e faatatau i faiga leaga sa faia iā te ia e lana tane lea e aloaʻia tele. “Sa faapea mai se tagata e ma te masani ai: ‘E faapefea ona e tuuaʻia se tane e ese le lelei?’ Sa faapea mai se isi e foliga mai o loo oʻu faaʻonoʻono iā te ia! E ui lava ina faamaoniaina laʻu tala e uiga i laʻu tane, ae sa amata ona ʻalofia aʻu e aʻu uō. Sa latou manatu faapea sa tatau lava ona ou onosai ona ‘o uiga masani lava ia o tamāloloa.’”

E pei ona faaalia i le mea na tupu iā Anita, o le toʻatele o tagata e faigatā lava ona malamalama moni i faiga leaga o loo faia i paaga. Aiseā ua māfua ai le sauā o se tamāloa i se fafine na ia faapea mai e alofa i ai? E faapefea ona fesoasoani i ē ua āfaina fua i faiga sauā?

[Faaopoopoga i lalo]

[Pusa/Ata i le itulau 4]

Ituaiga Eseese o Faiga Sauā i Aiga

E tusa ai ma le Faasilasilaga a Malo Aufaatasi i le Tafiesea o Faiga Sauā i Fafine, o le faaupuga “faiga sauā i fafine” e mafai ona faasino atu i “so o se gaoioiga sauā e faia i le tagata o le isi itupā e iʻu ai, po o le ono māfua ai o le āfaina i le tino, faiga sauā faaleituaiga po o le mafaufau po o le puapuagatia ai o fafine, e aofia ai ma le faamataʻuina i na gaoioiga, le pule malosi, po o le aveesea o le āiā e saʻoloto ai, pe tupu i nofoaga lautele po o totonu o le aiga.” O lenei faiga sauā e aofia ai ma isi mea e pei o le “sauā i le tino, i faiga faaleituaiga ma faalemafaufau i totonu o aiga ma le lautele, e aofia ai le fasi faamoʻamoʻa, le faileagaina faaleituaiga o teineiti, faiga sauā e māfua i aganuu tau i faaipoipoga, le faamalosi o feusuaʻiga ma paaga faaipoipo, le peritomeina e faaleaga ai fafine, ma isi tū ma aganuu e faaleagaina ai fafine.”