SO KERDIAS iek rastafari te shinel le bal ai te parhuvel pesko traio ai pesko gindo karing le manush parne? Sostar alosardias iek manush terno kai bikinelas draba chorhe te mekel godo traio? Dikhas so phenen amenge.

“Parhudem murho gindo” (HAFENI NGHAMA)

BORSH: 34

THEM: ZAMBIA

PA LESTE: SAS RASTAFARI

SAR SAS MURHO TRAIO: Pala o marimos, murhi dei trobusardias te zhaltar anda Namibia ai thodiaspe ande Organizacion katar o Foro anda o Suroeste anda e África (SWAPO). Kacha organizacion ai le manush kai amperetsinas ande Namibia marenaspe ande godia vriama. Pala godia murhi dei aresli ande iek kimpo anda e Zambia, kai beshen le manush kai mekle pesko them, ai me arakhadilem kotse.

Le pervo 15 borsh anda murho traio simas ande but kimpuria anda e SWAPO. Kako grupo kai marelaspe te skepil e Namibia, sikavenas kal terne pa e politika ai te vurhitsin kal manush parne.

Kana sas man 11 borsh kamlem te sikavau ande khangeri ke simas kristiano, pala godia gelem ka iek pastor kai zhanas manush kai sas catolicuria, luteranuria ai anglicanuria ai aver religionuria. Numa chi meklias man te sikavau ke simas kristiano. Thode man defial tristo ai pala godia chi mai kamlem te pakiau ando Del. Kana sas man 15 borsh, plachalas man defial zurales e muzika reggae ai kamavas te azhutiu le manushen kale anda e África te na mai jan kino. Pala godia thodem man le manushentsa rastafari kai marenaspe pala kako. Kerde mange rastas andel bal, sar si ka but rastafari, astardem te piau tsigeri dile, meklem te jau mas ai kerdilem iek manush kai marelpe sa peske ilesa pala le manush kale. Numa chi meklem uni dieli sar murho traio bimalado, te dikhau peliculi, kietri, kai marenaspe ai te phenau lazhave.

SAR E BIBLIA PARHUDIAS MURHO TRAIO: Ando 1995, kana sas man 20 borsh, astardem te gindiu so sas te kerau murhe traiosa. But vriama chitosardem sa le publikasionuria katar le rastafari, makar uni denas duma pa e Biblia so phenenas chi pherenas man. Pala godia astardem te chitou e Biblia korkorho.

Iek amigo rastafari, dias man iek libro katar le marturia le Jehovaske. Ande fuga astardem te chitou les ai te dikhau ke malavelas la Bibliasa. La vriamasa astardem te dau duma le Marturentsa ai te sikiuau lentsa. Numa mai anglal parhudem but dieli anda murho traio.

Nas mange vushoro te mekau le tsigeri ai te piau but pimos (2 Korintiana 7:1). Parhudem sar lavas pe mande, shindem le rastas, meklem te dikhau kietri kai marenaspe ai marime, ai parhudem sar davas duma (Efisiana 5:3, 4). La vriamasa parhudem murho gindo pa le manush parne (Le Apostolengo 10:34, 35). Numa te shai parhuvau, chi mai ashundem muzika kai delas duma nasul pa aver vitsi ai meklem ka murhe amiguria kai chi azhutinas man.

Porme te mekau godola prame kai nas vorta, rodem e rig kai kidenpe le marturia le Jehovaske. Kothe si kana astardem te sikiuau pa e Biblia. Kana phendem ka murhi familia ke sas te boldiuvau, nas lenge drago. Murhi dei phendias mange te kerdiuvau anda fersavi religion “cristiana” numa te na kerdiuvau Marturo. Pala so alosardem, iek anda murhe kak kai kerelas buki ande politika, chi delas duma mishto pa mande.

Makar murhi familia asalas mandar ai nas lenge drago te luvudiu ka o Jehova, shai rhevdisardem pala so sikilem anda o ejemplo katar o Jesus. Zhanavas chachimasa ke le Marturia sas e religion chachi, ke so sikavenas ai so phenel e Biblia malavelas. Keren so phenel o Del ande pesko Suato, pala godo ningeren le lashe viesti le manushenge (Mate 28:19, 20; Le Apostolengo 15:14). Ai chi thonpe ande politika (Psalmo 146:3, 4, E Nevi Viasta ai o Psalmo; Iovano 15:17, 18).

SAVO LASHIMOS LEM: Te lau man pala le zakonuria le Devleske azhutisardias man but. Chi mai piau tsigeri dile, vareso kai kerelas mange te jau but love. Chi mai kerdion mange dieli kai nai, ai aliarau o stato ai e gogi mai mishto.

Akana si man o traio kai kamavas de tsinorhara. Numa e prama mai bari si ke aliarau man mai pasha o Del (Iakov 4:8).

“Sikilem te na joliavau” (MARTINO PEDRETTI)

BORSH: 43

THEM: AUSTRALIA

PA LESTE: BIKINELAS DRABA CHORHE

SAR SAS MURHO TRAIO: De tsinorhara murha familiasa mukisas amen but. Pala godia beshliam ande but foruria tsinorhe ai vi ande iek foro baro, ai tsirha vriama ande iek rig kai trainas le aborigenes anda e Australia. Serau lashe dieli pa murhe veri ai murhe kak kana traivas lentsa. Kerasas prame sar bumeranes ai astarasas mashe ai animaluria.

Murho dat sas boxeador pala godia sas mange drago te marau man. De tsinorhara sikadias man te marau man. Kana barilem astardem te piau pimos andel birturia. Ka murhe amiguria ai mange, sas drago te maras amen but. Sas amen shuria ai bates anda o beisbol te maras amen bute manushentsa, univar sas mai but de bish manush.

Te avel man love bikinavas draba chorhe ai dieli chordane kai denas man te bikinau. Keravas buki le bare manushenge kai bikinenas draba chorhe, zhavas te lau le love kai kamenas lenge ai te daravau len iekhe pistolosa. Me phenavas: “Mundarau vai merau”. Kamavas te avau iek manush kai mundarel avren.

SAR E BIBLIA PARHUDIAS MURHO TRAIO: Serau ke de tsinorhara ashundem pal marturia le Jehovaske. Kana sas man tsirha mai but de 20 borsh, pushlem katar murhi dei pa lende. Dui giesa mai angle, iek Marturo kai bushelaspe Dixon mardias murho vudar, diam duma ai akhardias man te zhau kai kidenpe. Godia sas e pervo data kai gelem ai de atunchara nakhle 20 borsh ai chi mai meklem te zhau. Sas mange drago ke suako prama kai pushavas denas anglal la Bibliasa.

Sikade man ke o Jehova si leske pala le manush, vi pala godola kai chi respetin les (2 Petri 3:9). Vi sikilem ke si iek lasho Dat kai sas te arakhel man makar le kolaver manush mekena man korkorho. Dias man pacha te zhanau ke te parhuvava, vo iertil sa murhe bezeja! Iek texto la Bibliako kai azhutisardias man but sas: Efisiana 4:22-24, kothe phenel “te shuden tumaro phurano traio” ai te “len pe tumende o nevo traio, kai si kerdo te miazol po Del”.

Nas mange vushoro te parhuvau murho traio. Shai nakhenas but giesa ai chi piavas draba chorhe, numa kana getolas o kurko ai simas murhe amigonentsa pale peravas. Dem po gor ke nashtivas te parhuvau murho traio te avava lentsa, pala godia alosardem te mekau palpale godola amiguria ai te traiu ande aver foro. Uni anda lende kamle te aven mantsa po drom ai phendem lenge te aven. Numa po drom astarde te pen tsigeri dile ai dine man te piau. Phendem ke me chi mai kamavas te piau, ai mai anglal te aresas von geletar pe iek rig ai me pe kolaver. Porme ashundem ke gele te choren iek banco iekha pushkasa.

SAVO LASHIMOS LEM: Kana meklem ka murhe amiguria, sas mange mai vushoro te parhudiuvau. Boldilem sar Marturo ando 1989. La vriamasa boldile murhi phei ai murhe dada.

De 17 borsh kai sim ansurime ai si man trin shave. Agies sikilem te na joliavau makar kamena te joliaren man. Vi sikilem te kamau sa le manushen makar avena anda aver vitsa vai dena duma aver shib (Sicharimos [Apokalipsis] 7:9). Aliarau ke so phendias o Jesus kerdilo chacho mantsa, kai phenel: “Te kerena so godi phenel murhi vorba, tume san chache murhe disipluria. Ai tume zhanena o chachimos, ai o chachimos skepisarela tumen” (Iovano 8:31, 32).

[Suato anda e patrin]

Numa te parhudiuvau, chi mai ashundem muzika kai del duma nasul pa aver vitsi

[Suato anda e patrin]

Ka murhe amiguria ai mange sas amenge drago te maras amen but. Sas amen shuria ai bates anda o beisbol te maras amen bute manushentsa, univar sas mai but de bish manush