ЛЕКЦИЈА 24
Со вакерела и Библија башо ангелија?
О Јехова мангела те запознајна лескере фамилија сој ко небо. Ки адаја фамилија вклучиме тане о ангелија коленге со и Библија вакерела кај тане „е Девлескере чхаве“ (Јов 38:7). Со вакерела и Библија панда башо ангелија? Сар влијајнена о ангелија упро мануша? Хем дали тане са о ангелија дело тари е Девлескири фамилија?
1. Кој тане о ангелија?
О Јехова створинѓа е ангелен англедер те керел и Пхув. Исто сар о Јехова, ола да тане невидлива хем живинена ко небо (Евреите 1:14). Иси бут милиоња ангелија хем секова јекх лендар тано посебно личност (Откровение 5:11). Ола „керена адава со [о Јехова] вакерела хем шунена лескере заповедија“ (Псалм 103:20). Понекогаш о Јехова ко пурано време бичхалела сине пле ангелен те вакерен несаво хабери, те поможинен хем те спасинен лескере народо. Авдиве, о ангелија водинена е христијанен ко мануша со мангена те сикљовен повише башо Девел.
2. Кој тане о Сатана хем лескере демонија?
Несаве ангелија на ачхиле верна е Јеховаске хем бунинѓе пе. О прво ангели со керѓа адава тано окова „со викинела пе Бенг хем Сатана, кова со завединела цело свето“ (Откровение 12:9). О Сатана мангља те владинел упро јавера. Адалеске ов влијајнѓа упро Адам хем и Ева хем упро јавера ангелија ола да те бунинен пе против о Јехова. Адала бунтовна ангелија викинена пе демонија. О Јехова фрдинѓа лен таро небо теле ки Пхув хем ола ка овен уништиме. (Читин Откровение 12:9, 12.)
3. Сар о Сатана хем о демонија мангена те ховавен амен?
О Сатана хем о демонија ховавена буте манушен преку о демонизам или спиритизам, со значинела те родел пе контакт е лошна духонцар. На пример, несаве мануша керена адава аѓаар со џана ко астролозија, ко окола со дикхена ко фали хем ко мануша со керена магие. Или палем јавера, те шај те сасљовен таро несаво насвалипе, џана ко бајачија или родена јавера медицинска третманија коленде со иси спиритизам. Исто аѓаар, о Сатана хем о демонија ховавена е манушен аѓаар со керена те верујнен кај о мануша шај те керен лафи е муленцар. Ама, о Јехова предупрединела амен: „Ма џан околенде со вакерена кај керена лафи е духонцар хем ма роден совет околендар со вакерена со ка овел ки иднина“ (3. Мојсеева 19:31). Ов дела амен акава предупредување те шај те заштитинел амен таро Сатана хем о демонија. Ола тане е Девлескере душмања хем мангена те керен аменге штета.
ДОЗНАЈН ПОВИШЕ
Сикљов повише башо шукар буќа со керена о ангелија, башо адава кобор тано опасно о спиритизам хем сар шај те заштитина амен таро Сатана хем таро демонија.
4. О ангелија поможинена е манушенге те запознајнен е Јехова
Е Девлескере ангелија на проповединена лично е манушенге. Наместо адава, ола поможинена аменге те реса џи ко мануша кола со мангена те запознајнен е Девле. Читин Откровение 14:6, 7, а пало адава керен лафи башо акала пучиба:
-
Соске ваљани аменге помош таро ангелија те проповедина?
-
Сар осетинеа тут адалеске со џанеа кај о ангелија водинена тут ко мануша со мангена те сикљовен баши Библија?
5. Наш таро спиритизам!
О Сатана хем о демонија тане е Јеховаскере душмања. Ола тане хем амаре да душмања. Читин Лука 9:38-42, а пало адава керен лафи башо акава пучибе:
-
Со керена о демонија е манушенге?
Амен на мангаја о демонија те влијајнен упри аменде. Читин 5. Мојсеева 18:10-12, а пало адава керен лафи башо акала пучиба:
-
Ко кола начинија о демонија мангена те авен аменцар ко контакт? Кола таро акала буќа тане вообичаена ко тхан коте со живинеа?
-
Со мислинеа, дали тано шукар адава со о Јехова забранинела о спиритизам хем соске?
Дикх о ВИДЕОКЛИПИ, а пало адава керен лафи башо акала пучиба:
-
Со мислинеа, дали и амајлија со чхивѓа и Палеса пле чхајаке сине опасно хем соске?
-
Со ваљани сине те керел и Палеса те шај те заштитинел пе таро демонија?
О чачутне христијања секогаш противинена пе сине е демоненге. Читин Дела 19:19 хем 1. Коринќаните 10:21, а пало адава керен лафи башо акава пучибе:
-
Ако иси тут несаве буќа сој поврзиме е демоненцар, соске тано важно те уништине лен?
6. Победин ки борба против о Сатана хем лескере демонија
О демонија тане водиме таро Сатана, ама о верна ангелија тане водиме таро архангел о Михаел, кова сој тано јавер анав башо Исус. Кобор моќно тано о Михаел? Читин Откровение 12:7-9, а пало адава керен лафи башо акала пучиба:
-
Кој тано помоќно, о Михаел хем лескере ангелија или о Сатана хем лескере демонија?
-
Со мислинеа, дали е Исусескере следбеникија ваљани те даран таро Сатана хем лескере демонија?
Ту шај те победине ки борба против о Сатана хем лескере демонија. Читин Јаков 4:7, а пало адава керен лафи башо акава пучибе:
-
Сар шај те заштитине тут таро Сатана хем лескере демонија?
НЕСАВЕ ШАЈ ВАКЕРЕНА: „Нане ништо погрешно ко адава те кхеле видео-игре или те дикхе филмија коте со иси спиритизам. Адава тано само баши забава“.
-
Соске асавко стави тано опасно?
СО СИКЛИЛЕМ
О верна ангелија поможинена аменге. О Сатана хем о демонија тане е Јеховаскере душмања хем ола користинена о спиритизам те ховавен е манушен.
Сар ка одговорине?
-
Сар е Јеховаскере ангелија поможинена е манушенге те запознајнен ле?
-
Кој тане о Сатана хем лескере демонија?
-
Соске ваљани те циде тут таро спиритизам?
ИСТРАЖИН
Читин башо доказија со сикавена кај о Исус тано о архангел Михаел.
Дознајн котар џанаја кај о Бенг тано чачутни личност.
Читин сар јекх манушни ослободинѓа пе таро е демоненгоро влијание.
„Таа ја пронашла смислата на животот“ (Стражарска кула таро 1 јули 1993)
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
