Agllashca temata ricungapaj

Temacunata ricungapaj

Testigo de Jehovacuna

Idioma quichua (imbabura)

Jehovatapash paipa Reinotapash apoyashunchi

Jehovatapash paipa Reinotapash apoyashunchi

‘Paicunaca na cai pachamandachu.’(JUAN 17:16)

CÁNTICO 18, 54

1, 2. a) ¿Imamandata Jesusta catijcunaca cai mundopi gentecunapa fiñanajuicunapica na chapurinchi? (Callari dibujota ricupangui.) b) Cai mundopi ashtaca gentecunaca ¿imatata yan? c) Gentecuna shina pensashcamandaca ¿ima llaquicunata tian?

JESUSTA catijcunaca Jehová Diostallami juyasha, cazusha nishpami paiman mingarishcanchi (1 Juan 5:3). Chaimandami ñucanchicunaca imashina viñashca cashpapash, maijan llactamanda cashpapash ima costumbrecunata charishpapash tucui horas Jehovata cazunchi, paipa Reinotapash apoyanchi. Cai mundopi gentecunapa fiñanajuicunapi, macanajuicunapica na chapurinchichu (Mat. 6:33, Is. 2:4; Juan 17:11, 15, 16, liingui).

2 Cai mundopi gentecunaca pensanmi, paicunapa llactacuna, costumbrecuna o pugllana equipocunami ashtahuan mejor can nishpa. Gentecuna shina pensashcamandami manllanai jatun fiñanajuicuna, huañuicunapash tiashca. Chashna mundopi causanajuimandami ñucanchi familiacunapash, ñucanchicunapash cuidarina canchi. Huaquinbica yangamanda llaquichijpimi ñucanchipash imatapash rurangapaj munanchi (Gén. 1:27; Deut. 32:4). Gobiernocuna imapash nalita rurajpica nalicachishpachari ñucanchipash  gobiernopa contra tucushpa imatapash rurangapaj munanchiman. Shinapash cai mundopi na chapurishcataca ricuchinami canchi.

3, 4. a) ¿Imamandata Jesusta catijcunaca cai mundopa fiñanajuicunapica na chapurinchi? b) ¿Imatata cai temapica yachajupashun?

3 Cunan punllacunapi politicocunaca gentecuna paicunapa lado tucuchun obligangapami munan. Shinapash Jesusta catijcunaca ni maijan politicopa lado na tucunchichu, guerracunamanbash na rinchichu (Mat. 26:52). Diablo mandajuj mundopi huaquin cosascuna chaishuj cosascunamanda ashtahuan ali cashcataca na pensanchichu (2 Cor. 2:11). Cai mundopa cosascunapi na chapurina cashcamandami ni maijan lado na tucunchi (Juan 15:18, 19, liingui).

4 Shinapash juchayucuna caimandaca shuj lado gentecunataca ashata nalicachishpachari catinchi (Jer. 17:9; Efes. 4:22-24). Chaimandami cai temapica chai yuyaicunata mishangapaj huaquin ayudacunata yachajushun. Shinallata Jehová Dios shina, Jesús shina shujcunata ricushpa paipa Reinota apoyangapaj imata ruranatami yachajushun.

¿IMAMANDATA CAI MUNDOHUANGA NA CHAPURINCHI?

5, 6. a) ¿Imashinata Jesusca paipa punllacunapi gentecunapa yuyaita na catishcata ricuchirca? b) ¿Imamandata Jesusca gentecunapa yuyaitaca na catirca?

5 Cai mundopa cosascunapi na chapurina shinlli cajpica tapuripai: “¿Imatashi Jesusca ruranman carca?” nishpa. Jesuspa punllacunapica Judea llactamanda, Galilea llactamanda, Samaria llactamanda gentecunaca randimandami na ricui usharin carca (Juan 4:9). Fariseocuna, saduceocunaca fiñanajushpallami causan carca (Hech. 23:6-9). Moisesman cushca Leyta estudiashcacunapash, na estudiashca gentecunataca nalicachishpami riman carca (Juan 7:49). Judiocunapash impuestota cobrajcunata, romanocunataca ninandami millanayachin carca (Mat. 9:11). Judiocuna Jehová Dios agllashca llacta cashcata yachashpapash Jesusca nunca na paicunapa problemacunapi chapurircachu. Paipa catijcunamanbash paicuna shujcunamanda ashtahuan ali cashcataca na yachachircachu (Juan 4:22). Ashtahuangarin tucuilla gentecunata juyanatami yachachirca (Luc. 10:27).

6 Jesuspaca tucui gentecunami igual carca. ¿Imamandata tucuicuna igual carca? Adán y Evata Jehová Dios rurashpaca, paicuna huahuacunata charishpa cai Alpapi tucui clase gentecunata jundachichunmi rurarca (Gén. 1:27, 28). Chaimandami Jehová Diosca maijan llactamanda gentecunatapash, ima shimita parlaj gentecunatapash tucuicunata igual ricun. Maijandapash ashtahuan alicachishpaca na ricujunllu. Jesuspash shinallatami can (Hech. 10:34, 35; Apoc. 7:9, 13, 14). Chaimandami ñucanchicunapash paicunapa ejemplota catina canchi (Mat. 5:43-48).

7, 8. a) ¿Imapita seguro cana capanchi? b) Cai mundopi llaquicunamandaca ¿imatata ali yachapanchi?

7 Cai Alpapi ni shuj gobiernota na apoyashpapash Diospa Reinota apoyanataca seguromi cana canchi. ¿Imamandata seguro cana canchi? Yaripai. Jardín de Edenbica Diabloca Adán y Evataca nircami, Jehová Diosca nali mandai ushanllu, ñucami ashtahuan ali mandai ushani nishpa. Chaimandami cunan punllacunapipash pipa lado cashcataca cada uno ricuchina canchi. Shinaca pensaripai: ¿Quiquinga pipa ladota capangui? Quiquinba munaita pundapi churanapa randica ¿Jehovapa lado tucushpa paita cazugringuichu? ¿Diospa Reinolla tucuilla llaquicunata tucuchinataca cringuichu? ¿O gentecunallata ima ali cajta ima nali cajta decidi ushanatachu cripangui? (Gén. 3:4, 5.)

 8 Cai tapuicunapi pensarishpami pipa lado cashcataca ali yachana canchi. Pipa lado cashcata ali yachashpallami gentecuna politicamanda o maijanbash organizacionmanda imacunatapash tapujpica imata ninata yachashun. Huaquin politicocunaca gentecunata ayudana munaihuanmi imacunatapash ruran. Shinapash gentecunapa llaquicunata tucuchitaca na ushangachu. Diospa Reinollami gentecunapa tucui llaquicunataca tucuchita ushanga. Chaimandami Diospa Reinotalla apoyana canchi. Pensaripai, llaquicunata tucuchingapaj munashpa cada uno ñucanchi imata pensashcata rurashpaca ¿nachu ñucanchipurara caiman chaiman separarinchiman?

9. a) Corinto llacta congregacionbica ¿ima llaquita tiarca? b) Ama chashna llaquicuna tiachunga ¿imatata apóstol Pabloca rurarca?

9 Apóstol Pablopa punllacunapipash shuj jatun llaquimi shuj congregacionbica tiarca. Corinto llactamanda huauquicunaca ninajurcami: “Ñucaca, Pablota catijmi cani. Ñucaca, Apolos shuti runata catijmi cani. Ñucaca, Cefas shuti runata catijmi cani. Ñucaca, Cristota catijmi cani” nishpa. Huauquicunapura cashpapash shuj shuj yuyaita charijpimi Pabloca, ¿“Cristoca chaupirishcachu” can? nishpa tapurca. Ashtahuangarin paicuna aliguta pensachunmi nirca: ‘Huauquicuna, panicuna ñucanchi Apunchi Jesucristopa shutipimi cangunataca cashna nipani: Tucuilla shujllashnalla yarishpami parlana canguichi. Cangunapurapica na shicanyarinachu canguichi. Ashtahuangarin alipacha shujlla yuyai tucushpami causana canguichi’ nishpa. Shinaca cunan punllacunapipash tucuilla huauquicunami shujllashna cana canchi (1 Cor. 1:10-13; Romanos 16:17, 18, liingui).

10. Cai mundopa problemacunapi na chapurina cashcata intindichunga ¿imatata apóstol Pabloca nirca?

10 Corinto congregacionmanda ungido huauquicunata ayudangapacarin apóstol Pabloca yarichircami, cangunaca jahua pachamandami canguichi ‘cai pachapi tiajtaca’ na yarinachu canguichi nishpa (Filip. 3:17-20). * Paicunaca ‘Cristopa shimipi randi rimajcuna’ o shuj llactamanda embajadorcuna cuendami carca. Imashinami shuj embajadorta shuj llactapi trabajachun cachajpica na chai llactapa problemacunapi chapurin, shinallatami cunanbi ungidocunapash cai mundopa problemacunapi, politicacunapica na chapurin (2 Cor. 5:20). Cai Alpapi causana esperanzata charijcunapash Diospa Reinopa sirvijcuna cashcamandami cai mundopica na imapipash chapurina can.

ÑAMANDA PREPARARISHUNCHI

11, 12. a) Diospa Reinota apoyangapaj munashpaca ¿imacunatata na pensana capanchi? b) Mirjeta shuti paniguca ¿imatata shuj gentecunamandaca pensan carca? c) Chai paniguca ¿imashinata paipa yuyaicunata mishai usharca?

11 Ashtaca gentecunaca paicunapa llactapuratalla, paicuna parlashca shimitalla, paicuna charishca costumbrecunatallami alicachin. Ñucanchicunapash chashna yuyaicunataca na charinachu canchi. Chaipa randica Jehová Diospa yuyaita charishcata ricuchingapami cunanmandallata prepararina canchi. Shinapash ¿imashinata prepararina canchi?

12 Punda Yugoslavia llactamanda Mirjeta * shuti panigu ima pasashcata ricupashun. Paimanga uchillagumandapachami Serbia llactamanda gentecunata millanayachinata yachachirca. Shinapash paica, tucui gentecuna Jehová Diospa ñaupajpi igual cashcata, Diablopa culpamanda shuj shuj llactamanda gentecuna fiñanajushcatami yachajurca. Chaita yachajushpami paniguca paipa yuyaicunata  cambiangapaj esforzarirca. Jipamanga pai causajuj pushtupica shuj shuj llactacunahuan macanajuimi callarirca. Chaimandami chai panigupa shungumanga serbio gentecunata millanayachina yuyaicuna cutin shamurca. Millanayachimandami serbiocunaman villachitaca na ushan carca. Chaimandami Jehová Diostaca chai yuyaicunata cungangapaj, precursora tucungapaj ayudahuai nishpa mañarca. Paica ninmi: “Villachinapi ashtahuan preocuparinami shujcunata ama millanayachichun ayudahuarca. Villachijushpaca Jehová Dios imashina cashcata yarishpami paipa ejemplota catircani. Shinami shujcunata millanayachina yuyaicunataca ñuca shungumanda llujchi ushashcani” nin.

13. a) ¿Imamandata Zoila paniguca llaquilla sintirirca? b) Shujcuna llaquichijpica ¿imatata Zoilaca rurarca? c) Zoilapa ejemplomandaca ¿imatata yachajupanchi?

13 Cunanga México llactamanda Zoila shuti panigu ima pasashcata ricupashun. Paica Europa llactapimi causajun. Paica ninmi, congregacionbi América Latinamanda huaquin turicuna, ñañacunaca ñuca llactata, ñuca llactapa costumbrecunata, ñuca llactapi tunucunatapash nalicachishpami parlanajun carian. Paicunata uyashpaca ninandami Zoilaca llaquirin carca. Quiquin chaipi cashpaca ¿imashinashi sintiripanguiman carca? Zoila paniguca Jehová Diostami ayudahuai nishpa mañarca. Huaquingunaca paicunapa llactata, costumbrecunata shujcuna nalicachishpa rimajpica na jarcarita ushanllu. Ñucanchicunapash na imacunatapash nishpa o rurashpa shujcunata llaquichinachu canchi. Ñucanchi huauquipanicunata nali sintichishpa congregacionbi huauquipanicunata separajunaca nalichu canman (Rom. 14:19; 2 Cor. 6:3).

14. Jehovapa ejemplota catishpa tucui gentecunata igual ricungapaca ¿imatata rurana capanchi?

14 Huaquinbica ñucanchi familiacuna, rijsicuna yachachijpichari ñucanchi llactami ashtahuan ali can yashpa viñashcanchi. Shinapash Jehovata sirvijcunaca nimamanda na shina pensanachu canchi. Ñuca llacta, ñuca parlashca shimimi ashtahuan ali can nishpa pensanata ñucanchi shungu ucumanda nara llujchi ushashpaca ¿imatata rurana canchi? Chashna yuyaicunamanda Jehová Dios imata pensajta ashtahuan aliguta intindingapami Familiahuan Adorana Tutapi o estudio personalpi tiempota llujchina canchi. Jehovapa ejemplota catishpa tucui gentecunata igual ricungapajpashmi paipa ayudata mañana canchi (Romanos 12:2, liingui).

Llaquicuna ricurijpipash Jehovata cazushcataca ricuchinami capanchi (Párrafo 15, 16ta ricupangui)

15, 16. a) Jesús nishca shinaca ¿imashinata gentecunaca ñucanchita tratanga? b) Huahuacuna Diospa Reinota apoyai ushachunga ¿imashinata taitamamacunaca ayudana capanguichi?

15 Jehovata sirvijcunaca tucuicunami cunan cashpa o caya cashpapash ñucanchi familiacunamanda, vecinocunamanda, cumbacunamanda shican cashcata ricuchina tucushun (1 Ped. 2:19). Jesús nishca shinacarin, huaquingunaca ñucanchita culirangami. Paicunaca Diospa Reino ima cajta nali yachashpami ñucanchicuna imamanda Jehová Diospa Reinotalla apoyajujtaca na intindi ushan.

16 Jehová Diospa Reinota apoyajushcata ricuchingapaj munashpaca pi imata nijujpi, rurajujpipash Jehovatami cazuna canchi (Dan. 3:16-18). Huaquinbica tucuicunallatami shuj gentecunata manllanchi. Shinapash jovengunapami huaquinbica ashtahuan shinlli can. Chaimandami taitamamacuna, quiquinba huahuacunataca ayudana canguichi. Escuelapi, colegiocunapica bandera saludanami can, llactapa fiestacunapi participanami can nishpami huahuacunataca obligangapaj munan. Chaimandami huahuacunamanga paicunallata difindiri ushachun Familiahuan Adorana Tutapica imamanda na participanata,  profesorcunaman imata ninatapash yachachina can (Rom. 1:16). Paicunallata difindirichun yachachishpapash na paicunatalla saquinachu canchi. Minishtirijpica quiquingunallata rishpa profesorcunahuan parlashpami imamanda na participashcata aliguta intindichina capanguichi.

JEHOVÁ DIOSPA SHICAN SHICAN RURASHCACUNAHUAN CUSHIJUSHUNCHI

17. a) ¿Imatata na pensajuna capanchi? b) ¿Imamandata na shina pensajuna capanchi?

17 Ñucanchi llactata, ñucanchi parlashca shimita, micunata, costumbrecunata alicachinaca alimi can. Shinapash ñucanchi llacta, costumbrecunami ashtahuan ali can yajushpaca cuidadota charinami canchi. Jehovapa rurashcacunata yaripai. Jehová Diosca shican shican cosascunata rurashpami ñucanchitaca cushichishca (Sal. 104:24; Apoc. 4:11). Shinaca ¿imamandata ñucanchira pensajuna canchi, ñucapa rurashcacunami ashtahuan ali can nishpa?

18. Jehová Dios shina pensashpaca ¿ima bendiciongunatata charishun?

18 Jehová Diosca tucui llactamanda gentecuna Bibliata yachajushpa para siempre causachunmi munan (Juan 3:16; 1 Tim. 2:3, 4). Chaimandami shuj shuj huauquipanicunapa yuyaicunata uyana canchi. Shinami ñucanchipash shuj mushuj cosascunata yachajushpa tucuilla huauquipanicunahuan shujllashna tandanajushca cashun. Ñucanchica Jehovata juyaimanda, paipa Reinota apoyaimandami cai mundohuanga na chapurinchi. Ashtahuangarin, ñucanchimi ashtahuan ali canchi nishpa jariyajunata, shujcunata mishana yuyaicunataca millanayachinchimi. Tranquilo, aliguta causanata yachachishcamandaca Jehová Diostami tucui shunguhuan agradicinchi. Salmista nishca shinaca, ‘huauquipura juyarishpa tandanajushpa causanaca juyaillagupachami’ can (Sal. 133:1).

^ par. 10 Filipos llactamanda huaquin huauquicunaca romano cangapaj papelcunata charinmi cashca yarin. Chaimandami paicunaca na romano huauquicunamandaca ashtahuan derechocunata charirca.

^ par. 12 Huaquin shuticunata cambiashcanchimi.