1. Huata 66pica ¿imata pasarca? (Callari dibujota ricupangui.)

HUATA 66pica shuj jatun llaquimi Jerusalén llactapica tiarca. Shinapash ¿imamandata chai llaquica tiarca? Roma llactamanda Floro shuti jatun mandajmi Jehovapa templo huasimanda ashtaca culquita japishcarca. Chaimandami judiocunaca ninanda culirashpa Jerusalenbi romano soldadocunataca huañuchishpa saquirca. Chaimanda casi quimsa quillacuna jipallami, Roma llactapa gobernador Cestio Galopash judiocunata huañuchingapaj nishpa 30 mil soldadocunahuan rirca. Jerusalén ladolla llactacunata ña mishajpimi huaquin judiocunaca Jehovapa templo huasipi pacajurca. Romano soldadocuna Jerusalenda muyushpa ña shayarijpicarin tucuilla gentecunami manllarishcapacha carca. Quiquinbash chaipi cashpaca ¿imashinashi sintiripanguiman carca?

2. a) Romano soldadocuna Jerusalenda muyushca shayanajujpica ¿imatata Jerusalenbi Jesusta catijcunaca rurana carca? b) ¿Imamandata Jerusalén llactamanda pacajushpa rita usharca?

² Jerusalenbi llaqui tianamanda parlashpaca Jesusca cashna nishpami advirtirca: ‘Jerusalenda ashtaca soldadocuna chaupipi  churajta ricushpaca tucuchigrinmi yanguichilla. Judea llactapi causajcunaca urcucunapi pacajungapaj richun ninimi. Jerusalenmandapash tucuilla richun” ninimi nishpa (Luc. 21:20, 21). Shinaca romano soldadocuna Jerusalenda muyushca shayanajujpica ¿imashinata judiocunaca salvarita ushana carca? Imashina salvarinata yachachunmi Jesús nirca, ‘llaqui punllacunaca ashata trancaringami’ nishpa (Mat. 24:22, NM). Jesús nishca shinaca, Jerusalenda muyushca shayanajushpapash romano soldadocunaca saquishpa rircallami. Chaita ricushpami Jerusalenbi Jesusta catijcunaca urcucunapi pacajungapaj rirca. * Romano soldadocunaca huata 70pi tigrashpami Jerusalendaca tucuchirca. Shinapash Jesusta cazujcunaca tucuillami salvarirca.

3. a) Cunan punllacunapi Jesusta catijcunapash ¿imatata ñalla ricupashun? b) ¿Imatata cai temapica yachajupashun?

³ Ñucanchicunapash ñallami shuj jatun llaquita charishun. Jatun Manllanai Llaqui Punllacunaca ñallapachami chayamunga (Mat. 24:3, 21, 29). Chaimandami Jesús advirtishca shimicunataca ñucanchipash cazuna canchi. Jatun llaqui punllacuna ñalla chayamuna cajpipash ‘na cuentai ushanalla ashtaca gentecunaca’ salvaringami (Apocalipsis 7:9, 13, 14, liingui). Salvaringapaj munashpaca shamuj punllacunapi ima pasanatami aliguta intindina canchi. Chaimandami cai temapica shamuj punllacunapi ima pasanata Biblia ima nijta, shinallata ñucanchicuna imata rurana cashcatapash yachajushun.

4. Jatun Manllanai Llaqui Punllacunaca ¿imashinata callaringa?

⁴ Jatun Manllanai Llaqui Punllacunaca ¿imashinata callaringa? Bibliapica ninmi, Jatun Manllanai Llaqui Punllacunaca ‘Babilonia shuti jatun pueblota’ tucuchi callarijpimi callaringa nishpa. Apocalipsis libropi intindichishca shinaca, tucuilla panda religiongunatami Babilonia shuti jatun pueblo nin (Apoc. 17:5-7). Cai mundopi gobiernocunahuan chapurishcamandami Babilonia shuti jatun pueblotaca shuj huainayaj huarmihuan chimbapuran. Panda religiongunaca ashtahuan poderta charingapaj munashpami Jesustapash, Jehovapa Reinotapash apoyanapa randica Bibliapi mandashcacunatapash na cazushpa cai Alpapi gobiernocunahuanra chapurishca. Shinapash Jesusta catij ungidocunaca cai mundopa gobiernocunahuan na imapipash chapurishpami jarihuan nara tacarishca cuitsagu cuenda can (2 Cor. 11:2; Sant. 1:27; Apoc. 14:4). Shinaca ¿pita panda religiongunataca tucuchinga? Bibliapica ninmi: ‘Yana puca manllanai animalpa chunga cachucunami’ panda religiongunataca tucuchinga nishpa. ‘Yana puca manllanai animalca’ Organización de las Naciones Unidastami (ONU) ricuchin. Cutin, chai yana puca manllanai animalpa ‘chunga cachucunaca’ ONU nishca organizacionda cunan punllacunapi apoyanajuj gobiernocunatami ricuchin. Jehová Diosca ñallami paimanga tucuilla panda religiongunata tucuchina yuyaita cunga (Apocalipsis 17:3, 16-18, liingui).

5, 6. ¿Imamandata ninchi, panda religionguna tucuchi tucujpica na tucuilla panda religiongunata catij gentecunachu tucuringa nishpa?

⁵ Panda religionguna tucuchi tucujpica ¿panda religiongunata catijuj tucuilla gentecunachu tucuringa? Na. Profeta Zacarías nishca shinaca, panda religiongunapi huaquin yachachijcunaca causanajungarami. Ashtahuangarin cashnami nij tucunajunga: “Ñucaca, Dios ima nishcata villaj runaca na canichu, pambapi tarpushpa causajllami cani.  Ñucaca, chairalla viñaimandapachami pambapi tarpushpa causani” nishpa. ¿Imamandata ‘maquita chugrircangui’ nishpa tapujpica chai runaca ningami: “Ñucapaj ali cumbacunapaj huasipimi chugrichihuarca” nishpa (Zac. 13:4-6).

⁶ Cutin Jehovata sirvijcunaca ¿imata tucunga? Jesusca nircami: “Chai llaqui punllacuna ashatallapash na trancarijpica shujllapash na salvarinmanllu carca. Agllashcacunamandami chai llaqui punllacunaca ashata trancarishca” nishpa (Mat. 24:22, NM). Imashinami ricuparcanchi, huata 66pi jatun llaqui tiashpapash chai llaqui punllacuna ashata trancarishpa tranquiloyajpimi Jesusta catij ungidocuna o paipa ‘agllashcacunaca’ Jerusalenmanda pacajushpa rita usharca. Cunan punllacunapipash ñallami Jatun Manllanai Llaqui Punllacuna callaringa. Shinapash Jehová Diospa agllashcacuna salvarichunmi chai punllacuna callarishca cashpapash asha tiempota trancarishpa tranquiloyanga. Jehová Diosca ‘yana puca manllanai animalpa chunga cachucuna’ paipa ali sirvijcunata tucuchichunga na saquingachu.

7. Panda religionguna tucuchi tucushca jipaca ¿imatata ricuchi ushapashun?

⁷ Panda religionguna tucuchi tucushca jipaca cada unomi ñucanchi shungupi imata charishcata ricuchina canchi. Ashtaca gentecunaca urcucunashna jatun organizaciongunapi pacajungapami paicunapa ayudata mascanga (Apoc. 6:15-17). Shinapash ñucanchicunaca Jehovapimi pacajushun. Cutin huata 66pi ima pasashcata yaripashun. Chai punllacunapica ¿ashtaca judiocuna Jesusta catijcuna tucuchunllu llaqui punllacunaca asha tiempota trancarirca? Na. Jesusta catijcuna Jerusalenmanda rishpa salvari ushachunmi llaqui punllacunaca asha tiempota trancarirca. Shamuj punllacunapipash, Jesusta catijcuna Jehovata juyashcata ricuchichun, ungidocunata apoyajushcata ricuchichunmi Jatun Manllanai Llaqui Punllacunaca asha tiempota trancarishpa tranquiloyanga. Chai punllacunapi ashtaca gentecuna Jehovata sirvijcuna tucuchunga na shuyanachu canchi (Mat. 25:34-40).

8. Shamuj punllacunapica ¿imatata testigo de Jehovacunalla ruranajushun?

⁸ Asha tiempota tranquiloyajpi imalla pasanataca na ali yachanchichu. Shinapash ñucanchi cosascunataca tal vez saquinami tucushun. Huata 66pi Jesusta catijcunaca paicunapa huasitapash, charishca cosascunatapash saquishpa rishpami jipamangarin faltajlla causanajurca (Mar. 13:15-18). Chaimanda tapuripashun: “Ñucaca ¿ñucapa cosascunata saquingapaj prepararishcachu cani? ¿Jehovata tucuipi cazushcata ricuchingapaj listochu cani? nishpa. Chai punllacunapica testigo de Jehovacunallami profeta Daniel cuenda ima llaquicuna ricurijpipash Jehovatalla sirvinajushun (Dan. 6:10, 11).

9. Shamuj punllacunapica ¿imatashi Jehovata sirvijcunaca villachinajushun?

⁹ Jatun Manllanai Llaqui Punllacuna callarishca tiempopica ali villaicunata villachina punllacunaca na cangachu (Mat. 24:14). Diablo mandana punllacunaca tucurijunmi nishpa villachina tiempomi tal vez canga. Bibliapica ninmi, chai villaicunata uyashpami gentecunaca ‘shuj jatun jatun rumi rundu paicunapa jahuapi urmajpishna’ sintirishpa ‘Taita Diostapash nali shimicunata rimanajunga’ nishpa (Apoc. 16:21).

10. Jehová Diosta sirvijcunapa contracunaca ¿imatata rurangapaj munanga?

¹⁰ Nali villaicunata villachijpica ¿imatata contracunaca ruranga? Contracuna imata ruranata yachachunga profeta Ezequielca Magog  llactata mandaj Gogmandami parlarca. Magog llactata mandaj Gogca tandanajushca ashtaca llactacunami can. Ezequielca nircami, Magog llactata mandaj Gogca yajungami: ‘Macanajunata na yachaj llactata llaquichingapami vichai risha. Imatapash na manllashpa, casilla causajcunatami llaquichigrisha. Paicunaca jatun pircacunapash, aldabacunapash, pungucunapash illajmi causanajun. Tucui imatalla charishcacunata apamungapaj, quichungapami shuj llactacunamanda tandachishca gentecunataca llaquichigrisha. Paicunaca charijyanajunmi, cai pacha chaupipimi causanajun’ nishpa (Ezeq. 38:10-12). Jehová Diosta sirvijcuna na shuj gentecunashna cana cashcamandami, cai pacha chaupipimi causanajun nin. Chaita ricushpami Magog llactata mandaj Gogca Jesusta catij ungidocunatapash, shuj llamagucuna nishcacunatapash llaquichingapaj llujshinga.

11. a) Jatun Manllanai Llaqui Punllacunapi ima pasanata Bibliapi parlajpipash ¿imatata yaipi charina capanchi? b) Jahua pachapi señalcunata ricushpaca ¿imashinata gentecunaca sintiringa?

¹¹ Chai jipaca ¿imata pasanga? Bibliapi nishca shinaca ashtaca cosascunami pasanga. Shinapash yaipimi charina capanchi, ashtaca cosascuna pasanata parlashpapash Bibliapica chai cosascuna ima ordenbi pasanataca na ninllu. Huaquin cosascunaca tal vezmi chai tiempopilla pasanga. Na cabal yacharinllu. Shinapash cai pacha tucuri punllacunamanda parlashpaca Jesusca nircami: ‘Indipash, lunapash, luzerocunapash manllanayai tucushpami ricuringa. Mama cuchapash ninanda huacashpami caiman chaiman shitarijunga. Chaimandami cai pachapi causajcunaca ninan llaqui japijpi pandarinajunga. “Cai pachapica manllanayai llaquicunami ashtahuan tiagrin” nishpami gentecunaca ña huañugrijunshna tucunajunga. Ninan ushaihuan jahua pachapi tiajcunapash ninandami cuyunga. Chai jipallami, Runa Aichayu tucushca ñucataca ninan ushaihuan, punchapambata fuyupi shamujujta tucuicuna ricunga’ nishpa (Luc. 21:25-27; Marcos 13:24-26, liingui). Jesuspa chai shimicuna imashina pactarinataca na cabal yachanchichu. Yachangapaca shuyanami canchi. Chai shimicuna imashina pactarina cajpipash Jehovapa contracunaca manllarishcacunapachami canga.

12. ‘Ninan ushaihuan punchapambata’ Jesús shamushpaca ¿imatata ruranga?

¹² ‘Ninan ushaihuan punchapambata’ Jesús shamushpaca ¿imatata ruranga? Tucuipi cazushcacunataca bendiciangami. Cutin Jehovata na cazujcunataca llaquichingami (Mat. 24:46, 47, 50, 51; 25:19, 28-30). Tucuri punllacuna tucurinamanda parlashpaca Jesusca chivocunamanda llamagucunamandami parlarca. Paica nircami: ‘Runa Aichayu tucushca ñucami punchapambata shamusha. Jucha illaj ñuca angelcunapashmi ñucahuan shamunga. Shina shamushpami punchapamba mandangapaj tiarinapi tiarishpa mandajusha. Ñuca ñaupamanmi tucui llactacunapi causajcuna tandanajumunga. Chaipimi llamacunata, chivocunata michij runa agllanshna chai gentecunataca shican shican churasha. Llamacunashna alicunataca ñuca ali ladomanmi churasha. Chivocunashna nalicunataca ñuca lluqui ladomanmi churasha’ nishpa (Mat. 25:31-33). Jesús nishca shinaca, llamagucunata chivocunamanda separashca jipaca chivocunashna nalicunaca tucuchi tucungami. Cutin llamagucunashna ali gentecunaca ‘causaitami causanga’ (Mat. 25:46).

13. Chivoshna nali gentecunata llaquichijujpica ¿imatata Jehovata sirvijcunaca ruranga?

¹³ Bibliapi nishca shinaca, tucuchi tucunata yachashpami chivoshna gentecunaca “ninanda huacanajunga” (Mat. 24:30). Cutin  ungidocuna, shuj llamagucuna nishcacunaca Jesús mandashcata cazushpami ‘quishpichina punlla chayamujujpi shinlli tucushpa’ shayaringa (Luc. 21:28).

14. Magog llactata mandaj Gog, Jehovata sirvijcunata llaquichi callarijpica ¿imata pasanga?

¹⁴ Magog llactata mandaj Gog nishca, Jehovata sirvijcunata llaquichi callarijpica ¿imata pasanga? Bibliapica ninmi, runa aichayu tucushca Jesusmi paipa angelcunata cachamunga. Paicunami Jesuspa agllashcacunataca tucui cai pacha tucuri chuscundi ladomanda tandachinga nishpa (Mar. 13:27; Mat. 24:31). Shinaca ¿ima horata ungidocunataca tandachinga? Ungidocunata tandachinga nishpaca ¿ungidocunata espíritu santohuan chai tiempopi agllanatachu nijun? ¿Cai Alpapi ungidocunata ultimota sellanatachu nijun? Na. Ungidocunaca Jatun Manllanai Llaqui Punllacuna nara callarijpillatami ña ultimota sellai tucushca canga (Mat. 13:37, 38; Apoc. 7:1-4). Shinaca ungidocuna tandachi tucunga nishpaca, cai Alpapi ungidocuna jahua pachaman apai tucunatami nijun (1 Tes. 4:15-17; Apoc. 14:1). Ungidocunaca Magog llactata mandaj Gog llaquichi callarishca jipami jahua cieloman apai tucunga (Ezeq. 38:11). Chai punllacunapimi ungidocunaca Jesús nishca shina, ‘indishna punchapambaguta’ brillanajunga (Mat. 13:43). *

15. ¿Imashinata ungidocunaca jahua pachaman tandachi tucunga?

¹⁵ Jesusta catinchi nij tucushca ashtaca gentecunaca yanmi, gentecunaca paicunapa aichayu cuerpohuanmi jahua cieloman apai tucushun nishpa. Shinallata yanmi, Jesusca gentecuna ricujtami cai Alpamanga tigramunga  nishpa. Shinapash Bibliapica gentecuna ricujta Jesús tigramunataca na ninllu. Bibliapica Jesusca ninmi: ‘Runa Aichayu tucushca ñuca shamunata ricuchinaca jahua pachapimi ricuringa. Fuyu jahuapimi shamusha’ nishpa (Mat. 24:30). Bibliapica ninbashmi, ‘aichandi yahuarndica pipash na Taita Dios mandajuj llactamanga ringachu’ nishpa. Jahua pachaman rijcunapa cuerpoca canchis trompeta huacajuj tiempopimi ñavita ñapash vichashpa pascajpishna ñapash cambianga (1 Corintios 15:50-53, liingui). * Shinaca cai Alpapi causanajuj ungidocunaca ñapash paicunapa cuerpopi cambiai tucushpami jahua pachaman tandachi tucunga.

16, 17. Jesús cazarana nishca boda nara tiajpillata ¿imata pasanga?

¹⁶ Tucuilla 144 mil ungidocuna jahua pachapi cajpica Jesús cazarana nishca bodata segurana tiempomi chayanga (Apoc. 19:9). Shinapash chai cushilla tiempo nara chayajpillata ¿imata cai Alpapica pasanga? Yaripai, ungidocuna cai Alpapi causanajujpillatami Magog llactata mandaj Gogca Diosta sirvijcunata llaquichi callaringa (Ezeq. 38:16). Shinapash Jehovata sirvijcunaca ¿imatata rurana can? Cai shimicunatami cazuna can: ‘Cai macanajuica canguna macanajunaca na canllu. Cangunaca Mandaj Dios ñuca, cangunata imashina quishpichijta ricushpa, casilla shayanajunallami canguichi. Na manllanachu canguichi, na shaijunachu canguichi’ nishpa (2 Crón. 20:17). Imashinami ña yachajurcanchi, Magog llactata mandaj Gog llaquichi callarij tiempopimi ungidocunaca jahua pachaman apai tucunga. Jahua pachaman apai tucujpimi Apocalipsis 17:14pi nishca shinaca, Diospa contracunaca ‘Llamahuan [Jesushuan] macanajunga. Llamami paicunataca mishanga. Diospa agllashcacunapash paita aliguta cazujcunapash’ Diospa contracunata mishangami. Shinaca, Jesuspash 144 mil ungidocunapashmi cai Alpapi Jehovata sirvijcunata Diospa contracuna llaquichichunga na saquinga.

¹⁷ Chaipimi Armagedón nishca jatun macanajui callaringa. Armagedonbimi Jehová Diosca paipa jucha illaj shuti jatunyachinga (Apoc. 16:16). Chai tiempopimi chivocunashna nali gentecunaca tucuchi tucunga. Cutin na cuentai ushanalla ashtaca gentecunaca salvaringami. Chai punllacunapica nalita rurajca pipash ñana tiangachu. Chai tiempopimi, jahua cielopi Jesús cazarana bodapaca tucuilla listo canga (Apoc. 21:1-4). * Cai Alpapi causajcunataca tucuillata juyashpami Jehová Diosca ashtaca bendiciongunata caranga. Chai juyailla punllacunataca chapanajunchimi. Jatunbacha cushijuimi tianga (2 Pedro 3:13, liingui).

18. Jesusta catijcunaca ¿imatata cunanbillata rurajuna capanchi?

¹⁸ Shinaca, chai tucuilla cosascuna pasanata yachashpaca ¿imatata cunanbica rurajuna capanchi? Apóstol Pedroca nircami: ‘Taita Diostalla tucui shunguhuan yariashpami paipalla causana canguichi. Taita Diospa punlla ucha chayamuchun yashpami chapariana canguichi’ nishpa. Ashtahuangarin nircami: ‘Cangunaca chashna tucunata shuyashpami imata cashpapash ucha rurana canguichi. Na mapayashpa, na juchachi tucushpa, casilla ali causanajujta Dios japij shamuchunmi’ shina causana canguichi nishpa (2 Ped. 3:11, 12, 14). Shinaca panda yachachishcacunahuan ama chapurishpa Jehová Diostalla adorashpa, casilla ali causaita cuj Rey Jesusta apoyashunchi.