¿Llapa religiontachu Dios allinpaq qhawarin?

¿Imaninkun runakuna?

▪ Askhan ninku: “Llapan religionmi Diosman chayachiwanchis”, nispa.

▪ Nillankutaqmi: “Ima religionpiña kaspapas, tukuy sonqowan Diosta servinki chayqa, chaskillasunkin Diosqa”, nispa.

¿Imaniranmi Jesús?

▪ Jesuspa nisqanman hinaqa, manas llapa religionchu Diosmanqa chayachiwasunman. Khaynatan niran: “K’illku punkunta haykuychis. Hatun punkunta haykuspa hatun ñanninta riqkunaqa infiernomanmi [otaq wañuymanmi] askhallaña rishanku. K’illku punkunta haykuspa ñañu ñanninta kawsayman riqkunaqa pisillan kanku”, nispa (Mateo 7:13, 14).

▪ Chaymantapas paypa nisqanman hina, askhas payta ninqaku: “¡Señor! ¡Señor! ¿Manachu qanmanta willakurqayku, sutiykipi supaykunatapas qarqorqayku, sutiykipi askha milagrokunatapas ruwarqayku?” nispa. Chaysi payqa paykunata ninqa: “Manapunin reqsiykichischu, qayllaymanta anchhuriychis mana allin ruwaqkuna”, nispa (Mateo 7:22, 23). Chaypi nisqan hina, payqa manan llapan: “Jesuspa qatikuqninmi kayku”, nispa niqkunatachu chaskinqa.

ASKHA runakunan religionkuq yachachisqanman costumbrenkuman ima yachasqa kashanku. Ichaqa, sichus mana Bibliaq yachachisqanman hinachu kanman chayri, ¿allinchu kanman chay religionkunaq yachachisqan? Manan. Jesuspa tiemponpi religionta umalliqkunapas runaq yachachisqallantan ruwaqku, chaymi Jesusqa niran: “Chay hinatan ñawpa runakunaq yachachisqanta ruwaspa Diospa kamachikuyninta p’akinkichis”, nispa. Chaymantataq paykunaman yuyarichiran Diospa nisqanta. Khaynatan Dios nisqa: “Kay runakunaqa simillanwanmi yupaychawan, sonqonkutaq ichaqa ñoqamanta karupi kashan. Yanqanpaqmi yupaychawanku, yachachikuyninkupas runaq yachachikuynillanmi”, nispa (Mateo 15:1-9; Isaías 29:13).

Chhaynaqa imapi creesqanchispas Diospa yachachisqanman hinan kanan, astawanqa yachachisqanman hinan kawsananchis. Bibliaq nisqan hina, kanmi “Diosta reqsiyku” niq runakuna, “ichaqa ruwayninkuwanmi Diosta neganku” (Tito 1:16). Chaymantapas nillantaqmi kay tiempo runakuna imayna kanankumanta. Khaynatan nin: “Dios munakunankutaqa aycha kusichiyllapin puriyta munanqaku, Dios sonqo runamanmi rikch’akunqakupas, kawsayninkuwantaqmi ichaqa Dios sonqo-kaytapas ‘manan valenchu’ ninqaku”, nispa. Chaymi niwanchis: “Chay hina runakunamanta t’aqakuy[chis]”, nispa (2 Timoteo 3:4, 5).

Chaymantapas yaqapaschá nisunman: “Ñoqaqa tukuy sonqoywanmi Diosman hap’ipakuni” nispa; ichaqa manan chayraykullachu Diosqa chaskiwasunman. ¿Imarayku? Tukuy sonqowanña imatapas ruwasunman chaypas, manapaschá Diospa nisqanman hinachu ruwashasunman. Chayraykun allintapuni yachana Diospa imachus munasqanta (Romanos 10:2, 3). Chaymantapas paypaq hina imatapas ruwanapaqqa allintan Bibliata estudiana, chayman hinataqmi kawsanapas (Mateo 7:21). Chhaynaqa Diospa munasqanman hina servinapaqqa, tukuy sonqowanmi imatapas ruwana, paypa yachachisqallanta yachachina, munasqanman hinataqmi kawsanapas. Chaypaqmi ichaqa sapa p’unchay Diospa munayninta ruwana (1 Juan 2:17).

Sichus Diosmanta astawan yachayta munanki chayqa, Jehová Diospa testigonkunan mana qolqellapaq Bibliamanta yachachisunkikuman.

[10 paginapi willakuy]

Diospa munasqanman hina servinapaqqa tukuy sonqowanmi imatapas ruwana, paypa yachachisqallantan yachachina, munasqanman hinataqmi kawsanapas