Chay hinatan wakin soltero iñiqmasikuna piensanku. Llapanchismi ichaqa yachanchis Bibliaq kamachisqanta, chaypin niwanchis “Señorpi iñiqwanpuni” casarakunanchista. Chaymi bautizasqa Testigollawan casarakunanchis (1 Cor. 7:39). Ichaqa, ¿imaraykun wakin Testigokuna piensanku mana Testigo kaqwan casarakuyta?

Wakinqa chay hinata piensanku pisilla soltero Testigokuna kasqanraykun, solterakunataq askha. Corea nacionpin llapa testigokunamanta kuskan más warmikuna kanku, Colombia nacionpitaq aswan askharaq. Chay hinan askha nacionkunapipas.

Wakin nacionkunapin costumbranku ususinkurayku nishu qolqe mañakuyta, karu valeq regalokuna chaskiytapas. Chaymi kapuqnillankuwan kawsaq cristianokunaqa chay regalokuna qoyta mana atinkuchu. Astawanqa mana Testigo tayta-maman sinchita mañakunman, chaymi cristiana ususinqa ninman “manachus hina haykˈaqpas casarakusaqchu”, nispa. *

Jehová Diosqa yachanmi chay hinapi tarikusqaykita, entiendesunkitaqmi (2 Crón. 6:29, 30).

Chaywanpas paypi iñiqllawanpuni casarakunaykitan munan. ¿Imarayku? Allinniykita munasqanrayku,  payllan yachan imas allin qanpaq imas mana allin chayta, payqa manan munanchu ñakˈarinaykita. Nehemiaspa tiemponpin Diosta serviqkuna casarakurqanku mana iñiq warmikunawan, chaymi Nehemiasqa yuyarichirqan Salomonpa chay hina ruwasqanta. Jehová Diosqa munakurqanmi Salomonta, paymi ichaqa mana kasukuspa mana judío warmikunawan casarakurqan, hinan paykuna huchallichirqanku (Neh. 13:23-26). Jehová Diosqa allinnillanchistan munan chaymi llapa cristianokunata niwarqanchis Testigonkunallawan casarakunanchispaq (Sal. 19:7-10; Is. 48:17, 18). ¡Maytan agradecekunchis chhayna consejokunamanta! Payta kasukuspan rikuchinchis paypi confiasqanchista (Prov. 1:5).

Sichus Diospi mana iñiq runawan casarakunki chayqa iñiyniykitan waqllichipunqa. Chaytaqa manapunin munawaqchu, ¿riki? (2 Cor. 6:14.) Jehová Diospa niwasqanchisqa allinninchispaqpunin, askha iñiqmasinchiskunan chayta kasukuspa iñiqmasinkuwan casarakurqanku. Huk iñiqmasikunan ichaqa mana chayta kasukurqankuchu.

Australia nacionmanta Maggy * iñiqmasinchismi willakun mana iñiq qhariwan reqsinakusqanmanta, ninmi: “Askha huñunakuykunamanmi mana riqchu kani paywan lloqsinayrayku, hinan Jehová Diosmanta karunchakapusharqani”, nispa. India nacionmanta Darica sipaspas estudiaqmasinwanmi reqsinakurqan. Chay waynaqa Daricaraykullan Bibliata estudiayta qallarisqa. Qhepamanmi Darica sipasqa chay waynawan casarakunanrayku Jehová Dios serviyta saqepurqan huk religionniyoqtaq kapurqan.

Camerún nacionmanta iñiqmasinchis Marian 19 watanpi kashaspa mana iñiq qhariwan casarakurqan. Chay waynaqa Mariatan prometesqa Testigo kasqanta mana harkˈakunanpaq. 2 semana casarakusqanku qhepamanmi ichaqa mana munapusqachu huñunakuykunaman rinanta. Marian willakun: “Mana piniyoqmi rikukurqani waqaykuqtaqmi kani, vidayqa manañan vidayñachu karqan, tukuy tiempotaqmi chay hinapi tarikusqaymanta huchachakurqani”, nispa.

Yaqapaschá niwaq: “Wakin Testigokunaqa mana Testigo kaqwanmi casarakurqanku, chay runakunaqa sumaq sonqoyoqmi kanku”, nispa. Ichaqa mana Testigo kaqwan casarakuwaq chayqa, ¿allinpichu Jehová Dioswan tarikuwaq? ¿Thakchu kawaq Diospa consejonta mana kasukuspa? Astawanqa, ¿kusisqachu Jehová Dios kanman? (Prov. 1:33.)

Askha iñiqmasikunan Jehová Diospa consejonkunata kasukuspa iñiqmasinkuwan casarakurqanku manataqmi pesapakurqankuchu. Hinaspapas Jehová Diospa sonqontan kusichirqanku. Chaytan ruwarqan Japón nacionmanta Akira sutiyoq cristianapas, paytaqa familianmi tanqarqan mana Testigo runawan casarakunanpaq chay tiempopitaq amigankuna Testigokunawan casarakusharqanku paytaq sapallanraq kasharqan. Chaykunan paypaq sasa karqan, ¿iman payta yanaparqan? Paymi nin: “Sapa pˈunchaymi yuyariq kani cheqaq kusikuyqa mana casarakuypichu nitaq soltero kaypichu kasqanta, aswanpas Jehová Diosta serviypi kasqanta”, nispa (1 Tim. 1:11). Nillarqantaqmi: “Sichus casarakuyta munanki manataq allin cristianota tarinkichu chayqa, suyakuyraq, Jehová Diosqa yachanmi imachus munasqaykita”, nispa. Tiempowanmi Akiraqa allin Testigowan casarakurqan kusisqataqmi tarikun Jehová Diosta kasukusqanmanta.

Wakintaq suyakurqan paykunapaq hina iñiqmasiwan casarakunankupaq. Chaymi pasarqan Australia nacionmanta Bill sutiyoq iñiqmasiwan. Paymi willakun mayninqa mana Testigo warmikunata sonqonpi munapayasqanta, ichaqa sonqonta mana suwachikunanraykun mana paykunawan parlata tupachiqchu. Billqa casarakuyta munaspan wakin cristianakunata parlapayarqan, paykunan ichaqa mana munarqankuchu. 30 wata qhepamantaq Diosta serviypi pay hina yuyaykuq cristianawan casarakurqan. Paymi nin:  “Manan pesapakunichu casarakunaypaq chhaytukuy tiempo suyakusqaymanta. Anchatan gustawan esposaywan kuska predicasqay, Bibliata estudiasqayku, Jehová Diosta kuska servisqaykupas. Hinaspapas amigonkunan amigoykuna kapunku, llapaykutaqmi Diospa llaqtanpi kashayku. Sichus ima sasachakuypipas tarikuyku chayqa, iskayniykun Bibliaq nisqanman hina allichayku”, nispa.

Diospa kamachikuyninta kasukusqaykirayku manaraq casarakunkichu chayqa, Jehová Diospa sonqontan kusichishanki. Chaytaqmi yanapasunki suyakushanallaykipaq (1 Sam. 15:22; Prov. 27:11). Hinaspapas Jehová Diosman imayna tarikusqaykita willakusqaykin yanapasunki (Sal. 62:8). Sichus Jehová Diosta servinaykirayku imaymana tentacionkunata atipashanki chayqa, paywanmi aswan amigontin kanki. Diospaqqa ancha valorniyoqmi kanki, chaymi makilla kashan imachus necesitasqaykita qonasuykipaq. Payqa manan qosata otaq esposata qonasuykipaqchu prometesunki, ichaqa yanapasunkin kusisqalla kanaykipaq (Sal. 145:16; Mat. 6:32).

Mayninpiqa yaqapaschá David hina tarikuwaq, paymi nirqan: “Señor Diosníy, uyariykamullawayña, wañunayashaniñan. Ama uyaykita pakaykuwaychu”, nispa (Sal. 143:5-7, 10). Chay hinapi tarikuspaqa ama pisipaychu, aswanpas Jehová Diospi suyakuy, paymi yanapasunki. Bibliata leey chaypitaq piensay. Chay hinapin yachanki imaynatas Jehová Dios ñawpa tiempopi seviqninkunata yanaparqan, imatas ruwanaykita munan chaytapas. Chaykunan yanapasunki paypi confianaykipaq kasukunaykipaqpas.

¿Imatawanmi ruwashawaq? Jehová Diosman astawan achhuykunaykipaq kallpachakuy, hukkunaq allin qhawarisqan kanaykipaqpas. Hukkunawan allinta kawsay, hinaspapas qoykukuq, allin llankˈaq, Jehová Diospaq huntˈaq sonqo kanaykipaq tukuy imata ruway. Chaykunan yanapasunki casarakuqtiyki sumaqta kawsanaykipaq (Gén. 24:16-21; Rut 1:16, 17; 2:6, 7, 11; Prov. 31:10-27). Tukuy yuyaywan iñiq tˈaqaykipi yanapakuy, predicacionpipas llankˈay; chaykunan yanapasunki Jehová Diosta kasukunaykipaq. Bill iñiqmasipas chaytan ruwarqan, paymi nin: “Precursor kasqayraykun tukuy yuyaywan llankˈasharqani chaymi mana repararqanipaschu watakunaq pasasqanta”, nispa.

Soltero, soltera iñiqmasikuna kasukuychis Jehová Diospa kamachikuyninta. Chhaynapin payta hatunchanki kusisqataq kankipas. Biblian nin Jehová Diosta sonqomanta kasukuqqa wiñaypaq kusisqa kawsananta (Sal. 112:1, 3). Chhaynaqa, ¡Jehová Diospa testigollanwan casarakuy!