BIBLIAN nin: “Diospa qosqanmi wawakunaqa, paypa saminchanmi naceqkunaqa”, nispa (Sal. 127:3). ¡Chaychá cristiano tayta-mamakunaqa anchata kusikunku wawanku naceqtin!

Kusikunapaqña wawaykichispa nacesqan chaypas, yachanaykichismi imayna uywayta. Wawaykichis qhali wiñananpaqqa allintan mikhuchinaykichis. Allin iñiyniyoq kanankupaqpas chay hinatan necesitanku Diosmanta yachachinaykichista yanapanaykichistapas. Kallpachakunaykichismi Diospa kamachikuyninkunata yachachinaykichispaq (Prov. 1:8). Ichaqa, ¿hayk’aqmantapachan chayta ruwanaykichis? ¿Imaynatan chayta ruwawaqchis?

Yachasun Manoa runamanta, payqa Israelpi Dan ayllumantan karqan Zora llaqtapitaq tiyarqan. Huk p’unchaymi Diospa angelnin willarqan esposan wawayoq kananta, manaña wiksallikuyta atirqanchu chaypas (Juec. 13:2, 3). Chayta yachaspaqa anchatachá kusikurqanku, ichaqa llakikurqankuchá imayna uywanankumanta. Chaymi Manoaqa Diosta rogakurqan: “Señorníy, warmiyman kachamusqayki runata wakmanta kachamuwayku, hinaspa willaykuwayku nacemuq wawawan imatachus ruwanaykuta”, nispa (Juec. 13:8). Manoapas esposanpas allintan uywayta munarqanku Sansón wawankuta. Chaymi tukuy atisqankuta ruwarqanku Diospa kamachikuyninkunata yachachinankupaq, Diostaqmi chay ruwasqankumanta samincharqan, Biblian nin: ‘Diospa espirituntaq Sansonta kallpacharqan’, nispa. Sansonqa Israelpin juez karqan, Diospa atiy qosqanwantaqmi imaymanakunata ruwarqan (Juec. 13:25; 14:5, 6; 15:14, 15).

¿Hayk’aqmantapachan tayta-mamakuna wawankuman yachachinanku? Timoteotaqa ‘wawa kasqanmantapachan’ maman Eunice, abuelan Loidapas ‘Diospa Simin Qelqakunamanta’ yachachirqanku, chaytan Biblia willan (2 Tim. 1:5; 3:15). Chaypi nisqan hinan, Timoteotaqa wawa kasqanmantapachan Diosmanta yachachirqanku.

Cristiano tayta-mamakunaqa Diospa yanapaynintan mañakunanku, qhawarinankutaqmi imaynatas wawankuta huch’uychankumantapacha yachachinqaku chayta. Proverbios 21:5 texton nin: “K’uchi runaq yuyaykusqankunaqa allinmankaman tukun”, nispa. Manaraq wawanku naceshaqtinmi tayta-mamakunaqa qhawarinanku imayna uywanankuta. Yaqapaschá huk listata ruwakunanku kanqa wawa uywanankupaq imakuna necesitasqankumanta. Ichaqa astawanmi qhawarinanku imaynatan wawankuta Diosmanta yachachinqaku chayta. Kallpachakunankun wawaq nacesqan qhepallata yachachiyta qallarinankupaq.

Wawakuna imayna wiñasqanmanta willaq libro nisqan hina, wawaq nacesqan qhepamanmi, huk pisi tiempo wawaq ñosqhonnin astawan ima yachasqantapas usqhaylla hap’in. Chaymi tayta-mamakunaqa chay tiempopi wawankuman yachachinanku Diosmanta kamachikuyninkunamanta ima.

Huk precursora regularmi ususinmanta nin: “Huk killachallayoq kashaqtinmi wawayta predicacionman apaq kani. Payqa manachá reparaqpaschu imayna predicasqaykuta, ichaqa allinninpaqmi chay ruwasqayqa karqan. Iskay watayoq kaspaqa payllamantan runakunaman tratadokunata qoq”, nispa.

Huch’uychankumantapacha wawakunata yachachiyqa allinpunin. Ichaqa askha tayta-mamakunan reparanku wawakunaman Diosmanta yachachiyqa mana facilchu kasqanta.

Wawakunaqa manan qasillaqa kankumanchu, chaymi tayta-mamakunapaq sasa kanman paykunata yachachiy. Wawakunaqa tukuy rikusqankumantan yachayta munanku, chaymi mana hukllamanqa yuyayninkuta churayta atinkuchu. Chhaynaqa, ¿imatan ruwawaqchis yachachisqaykichisman wawaykichis tukuy yuyayta churananpaq?

Deuteronomio 6:6, 7 textopin Moisés nirqan: “Sonqoykichispi waqaychaychis tukuy kay kamachisqaykunata, yachachillaychispuni wawaykichiskunaman, chaykunamanta rimapayallaychispuni wasipi kashaspa, purishaspapas, hinallataq puñuykushaspa, hatarishaspapas”, nispa. “Yachachillaychispuni” nispaqa nisharqan sapa kutilla kuti-kutirispa yachachiymantan. Imaynan huk sach’ata sapa kutilla qarpana, chhaynallatataqmi wawakunatapas sapa kutilla yachachina. Kuti-kutirispa imatapas uyarisqankun kurakkunata yanapan imatapas umankupi hap’inankupaq, wawakunata chay hinata yachachisqaykichismi ichaqa astawanraq yanapanqa.

Wawaykikunaman Diosmanta yachachinaykipaqqa tiempotan horqonayki. Kay tiempopi runakunaqa nishu ruwanayoqmi kanku, chaymi chayta ruwayqa sasa. Pablon niwanchis imakunachus Diospa llaqtanpi ruwananchiskunawan hunt’ananchispaq ‘tiempota ama usuchinapaq’ (Efes. 5:15, 16). ¿Imaynatan chayta ruwawaqchis? Huk umalliqpan imaymana ruwanankuna kan, esposanpas precursora regular kasqanraykun imaymana ruwanayoq  tarikun. Chay umalliqa tiempotan t’aqanan ususinta yanapananpaq, iñiq t’aqapi ruwanankunapaq, llank’ananpaq ima. ¿Imaynatan tiempota aypachikunku wawankuta yachachinankupaq? Qosanmi nin: “Sapa p’unchaymi manaraq llank’aq ripushaspay esposaywan kuska Bibliamanta willakuq librota leepuyku otaq Diospa Siminta Sapa P’unchay T’aqwisun qelqatapas. Manaraq puñupushaspapas huk chikantawanmi leepuyku. Predicaq rispapas paytawanmi pusayku. Huch’uychanmantapachan imaymanata yachachiyta munayku”, nispa.

Llapa tayta-mamakunan munanku wawanku wiñaspanku allin runa kanankuta. Ichaqa tukuy sonqowan Diosta munakunankupaqmi astawanqa yachachinanku (Mar. 12:28-30).

Salmo 127:4 texton nin: “Awqa-tinkuqpa hap’isqan wach’ikuna hinan wayna kashaqtin naceq wawakunaqa”, nispa. Chaypin wawakunata rikch’anachikun huk runaq makinpi wach’ikunawan. Chay runaqa allintan yachanan mayman wach’inanta, wach’ita kacharisqan qhepamanqa manañan kutichimuyta atinqachu. Tayta-mamakunapas manan tukuy tiempochu wawankuwan kuska kanqaku. Chayraykun tukuy atisqankuta ruwananku wawankuq sonqonman yuyayninman ima Diospa kamachikuyninkunata churanankupaq.

Apóstol Juanmi yachachisqan runakunamanta nirqan: “Ñoqaqa iñiypi wawaykunaq cheqaq-kaypi purisqanta uyarispaymi tukuy imamantapas aswantaqa kusikuni”, nispa (3 Juan 4). Cristiano tayta-mamakunapas chhaynatan sientekunku wawanku “cheqaq-kaypi” puriqtin.