Diciembre killa 2009 watapin Rusia nacionmanta Tribunal Supremo nirqan Taganrog llaqtapi Jehová Diospa testigonkuna amaña kanankupaq, huñunakunanku wasipas qechusqa kananta, 34 qelqanchiskunatataq qhawarichirqanku cheqnikuyta paqarichiq hinata. Internetpi Jehová Diospa testigonkunaq direccionninpipas lloqsimurqanmi chhaynapi tarikusqankumanta. Chaypin lloqsimurqan iñiqmasikunaq foton, wawakunaqpas.

Pisi killa qhepallamanmi, Rusia nacionmanta Centro Administrativo de los Testigos de Jehová nisqa chaskirqan huk paqueteta huk cartatawan, chay sasachakuymanta leespanmi Queensland (Australia) nacionmanta huk Testigo familia chayta apachimusqa. Chaypin nirqan: “Munasqa wawqe-panaykuna: Rusia nacionpi cristianokunaq iñiyninmanta sasachakuyninmantapas yachasqankun Cody, Larissa wawaykunaq sonqonman chayarqan. Chaymi qelqamushanku regalokunatapas apachimushanku Taganrog wawakunapaq. Kay karu llaqtakunapipas kanmi hunt’aq sonqowan Diosta serviq wawakuna, paykunapas Rusia nacionmanta wawakunapin yuyaykushanku, chayta yachanaykichistan munanku. Tukuy munakuyninkutan apachimushanku”, nispa.

Chay regalokunata chaskispan Taganrogmanta wawakunaqa agradecekuspa chay familiaman apachirqanku dibujokunayoq cartakunata. Wawakunaq kallpachayninmanta kusikuspan Cody, Larissa wawakunaman Rusia sucursalmanta huk iñiq kayta qelqarqan: “Hatunña huch’uyña kanchis chaypas pipas yanqamanta mana allinta ruwawaqtinchisqa, ¿llakikunchismi riki? Taganrog llaqtapi iñiqkunaqa llakisqan kashanku, mana imamanta huñunakuna wasinkuta qechusqankumanta. Ichaqa anchatan kusikunqaku huk nacionkunapipas paykunapi yuyaykusqankumanta yachaspa. ¡Anchatan agradecekuykichis chhayna munakuyniykichismanta!” nispa (Sal. 8:2).

Pachantinpi iñiqmasikunaqa cheqaqtapunin munanakunchis, chaykunan yanapawanchis sasachakuykunata atipanapaq. Juezkunaqa qelqanchiskunatan qhawarishanku cheqnikuyta paqarichiq hinata, ichaqa Testigo wawakunaqa iñiqmasinkuna munakusqankutan rikuchishanku, paykunaqa manan huk nacionmanta kasqankuraykuchu cheqninakunku, chhaynapin sut’ita rikukun Jesuspa nisqan: “Chhaynapin ñoqaq yachachisqaykuna kasqaykichista llapa yachanqaku qankuna munanakuqtiykichis”, nispa (Juan 13:35).