Allin ruwayta akllakuy

ASKHA runakunan munanku tukuy ima ruwasqankupas allinkama kananta. Chaymi llank’asqankupi allin kayta munaspa kallpachakunku astawan qhapaqyanankupaq allin reqsisqa kanankupaqpas. Ichaqa pisillan chaymanqa aypanku.

Allinta imatapas ruwanapaqqa kaykunatan ruwananchis: allintan akllananchis imachus ruway munasqanchista, allin yuyaywanmi kallpanchista tiemponchista t’aqananchis, imata ruwanapaqpas manan hukkunaq niwananchistaraqchu necesitananchis.

Askha cristianokunan ancha kusikuyta tarirqanku Diosta servispa. Wayna-sipaskunapas kurakkunapas allin kawsaytan tarirqanku Diosta tukuy tiemponkuwan servispa. Wakinmi ichaqa Dios serviyta mana allinpaq qhawarispa huk ruwaykunaman dedicakunku. ¿Imaraykun chhaynata qhawarinku? Wayna-sipas, ¿imatan ruwawaq aswan allin kaqkunata ñawpaqman churanaykipaq? ¿Imatan ruwawaq ‘tukuy ima ruwasqaykipas allinkama kananpaq’? (Jos. 1:8.)

Estudionkumanta samasqanku qhepaman ruwaykuna

Cristiano wayna-sipaskunaqa manan huk ruwaykunaraykuqa Dios serviyninkuta saqenankuchu. ¿Chaytachu qanpas ruwashanki? Chayta ruwashanki chayqa allinmi; tukuy ima ruwasqaykipas allinkaman kanqa.

Wakinqa estudionkumanta samaruspa hinan huk ruwaykunaman dedicakunku. Chay ruwasqanku manaña huchachu chaypas tapukunankun: “¿Hayk’a tiempon chay ruwaykunapi kani? ¿Imayna runakunawanmi chaypi huñunakuni? ¿Yaqachu chaykunaman sonqollikapuyman?” nispa. Chay ruwaykunaman sonqollikapunkuman chayqa, manan tiemponkupas kallpankupas kanmanchu Diosta servinankupaq. Chaymi allinta qhawarinanku imachus aswan importante kasqanta (Efe. 5:15-17).

Victor waynan chhaynapi tarikurqan. * Paymi nin: “12 wataypi kashaspan voleibol equipopi karqani. Askha premiokunata medallakunatan ganarqani, chaypi pukllaspayqa allin reqsisqachá kayman karqan”, nispa. Ichaqa reparakurqanmi Dios serviyninpi pisiyapusqanta. Sayk’usqa kaspan Biblia leesqanpi puñurapuq, manataqmi tukuy sonqowanchu predicaq. Chaymi nirqan: “Pukllasqaypin sinchita sayk’uq kani, Diosta munakusqaypas chiriyapusharqanmi. Manan tukuy kallpaywanchu Diosta servisharqani”, nispa.

¿Estudianaykichu universidadpi?

Bibliaqa ninmi cristianokuna familiankuta uywananku kasqanta (1 Tim. 5:8). Ichaqa, ¿universidadpiraqchu estudianayki chay kamachikuyta hunt’anaykipaq?

Chaypaqqa ñawpaqtan qhawarinayki imaynatan universidadpi estudiay afectasunki Dioswan allinpi kanaykita. Chaypaq Barucmanta yachasun.

Barucqa profeta Jeremiaspa secretarionmi karqan, chayqa allin llank’aymi karqan. Ichaqa chay llank’ayta pisipaq qhawarispan, aswan allin kaqkunata munapayarqan. Chayta rikuspan Jehová Dios Jeremiaswan kayta willachirqan: “¿Qanqa allin kaqkunallatachu munanki? ¡Ama mañakuychu chaytaqa!” nispa (Jer. 45:5).

 ¿Ima ‘allin kaqkunatan munapayarqan’? Yaqapaschá aswan allin qhawarisqa otaq aswan qolqeyoq kayta munarqan. Imaynaña kaqtinpas payqa qonqapurqanmi Diospaq llank’ay aswan allin kasqanta (Fili. 1:10). Ichaqa uyarikurqanmi Diospa anyasqanta, chaymi Jerusalén thunisqa kaqtin mana wañurqanchu (Jer. 43:6).

¿Imatan chay anyasqanmanta yachanchis? Barucqa kikinpaq allin kaqkunata maskhasqanpin pantasharqan. Chaymi tapukunanchis: “Imapi llank’anaypaqpas preparasqa kashani chayqa, ¿necesitasaqchu tiempota, kallpata, qolqeta gastaspa universidadpi estudiayta? ¿Allinchu kanman tayta-mamayta, familiayta kusichinayraykulla otaq allin qhawarisqa kayta munaspalla estudiay?” nispa.

Gregori waynamanta yachasun. Payqa computadorakunawanmi llank’aq, ichaqa llank’aqmasinkunan kallpacharqanku astawan estudiananpaq. Chaymi manaña tiempon kaqchu Diosta servinanpaq. Paymi nin: “Sayk’usqan tarikurqani. Diospa llaqtanpi huk llank’aykunaman mana aypay atisqaymantataqmi concienciay huchachawaq”, nispa.

Nishu llank’ay

Biblian llank’aqkunata patronkunatapas kallpachan allin llank’aq kanankupaq, ruwanankutapas allinta hunt’anankuta. Pablon nirqan: “Tukuy imatapas runakunapaq ruwaspaykichisqa tukuy sonqowan ruwaychis, Señorpaq hinapuni, ama runakunapaq hinallachu”, nispa (Col. 3:22, 23). Allin llank’aqña kananchis chaypas Kamaqninchiswan allinpi kaymi aswan allinqa (Ecl. 12:13). Llank’ayman nishuta qokusun chayqa Dios serviyninchistan qhepaman saqepusunman.

Hinaspapas manan kallpanchis kanmanchu Diospa llaqtanpi ruwananchista hunt’anapaq familianchista yanapanapaqpas. Rey Salomonmi willarqan ‘askha llank’anayoq kayqa wayraq qhepanta phaway’ hina yanqapaq kasqanta. Chhaynapi tarikuq cristianoqa uma nanaypin rikukunman. Llank’aymi paypaq aswan importante kapunman hinaspa sinchi sayk’usqa kaspa mana kallpan kanmanchu imata ruwananpaqpas. Chhaynapi rikukuspaqa manan tarinqachu ‘kusikuyta [...] tukuy llank’asqanpi’ (Ecl. 3:12, 13; 4:6, NM). Manan kallpan kanqachu Diosta servinanpaq familianta yanapananpaqpas.

Europa orientalpi tiyaq Janusz waynan plantakuna vendeyman nishuta qokurqan. Paymi nin: “Runakunaqa allintan qhawariwaqku llank’anaywan allinta hunt’asqayrayku  ñoqallamanta imatapas ruwasqaymantawan, ichaqa iñiyniypin pisiyapusharqani. Pisi-pisimantan manaña predicaq lloqsipurqanichu qhepamantaq huñunakuykunata saqepurqani. Allintan umallikunapas yuyaychawarqanku ichaqa hatunchakuqman tukupuspan mana kasukurqanichu. Hinan Diospa llaqtanmanta karunchakapurqani”, nispa.

Allintan imatapas ruwawaq

Kaykaman kinsa sasachakuykunamanta yacharqonchis. ¿Chaymanta mayqellanpas hark’ashasunkichu? Chhayna kaqtinqa kallpachaykikun qatimuqpi textokunata, tapukuykunata, willakuykunata t’aqwirinaykipaq, chaykunan yanapasunki ima ruwasqaykipas imayna kashasqanta yachanaykipaq.

 Estudioykimanta samasqayki qhepaman ruwaykuna. ¿Nishutachu huk ruwaykunaman qokushanki? ¿Diosta servinayki tiempopichu chaykunata ruwashanki? ¿Manañachu iñiqmasikunawan huñunakushanki? Chhayna kaqtinqa David hinan Diosmanta mañakuwaq: “Maynintachus purinayta yachachiway, tukuy sonqo asuykamusqayrayku”, nispa (Sal. 143:8).

¿Imatan ruwarqan Victor cristiano? Huk umallin payta nirqan: “Ñawiykiraqmi k’ancharin voleibol pukllaymanta rimaqtiyki”, nispa. Victormi nin: “Chay niwasqanmi yuyayniyman kutichiwarqan. Chayraqmi reparakurqani nishuta pukllayman qokusqayta. Chaymi pukllaqmasiykunamanta t’aqakapuspa Diospa llaqtanpi amigokunata maskharqani”, nispa. Kunanqa tukuy sonqonwanmi Diosta servishan, ¿imaninmi wayna-sipaskunata? Ninmi: “Amigoykikunata, tayta-mamaykita, umalliykikunata tapuy: ‘Qhawariwasqaykiman hina, ¿ima ruwaypas Diosmanta karunchawashanchu?’” nispa.

Umallikunamanmi willawaq imapipas yanapakuy munasqaykita. Yaqapaschá yuyaq cristianokunata yanapawaq wasipi ruwanakunawan otaq rantipuq rispa. Hayk’a watayoqña kanki chaypas, kusichiq willakuykunata runakunaman apaspan tukuy tiempoykiwan Diosta serviwaq.

Universidadpi estudiaymanta. Jesusmi nirqan ‘hukkunaq hatunchawananchista maskhayqa’ mana allinchu kasqanta (Juan 7:18). Chaymi manaraq universidadpi estudiayta qallarishaspa ‘aswan allin kaqtapuni akllakunayki’ (Fili. 1:9, 10). ¿Chaytachu ruwashanki?

Gregori cristianon imachus ruwasqanmanta nin: “Umallikunaq yuyaychawasqantan kasukurqani, kallpachakurqanitaqmi imachus kaqnillaywan kawsanaypaq. Manañan necesitarqanichu astawan estudiayta. Estudiashallayman chayqa manachá tiempoypas kallpaypas kanmanchu hukkunata ruwanaypaq”, nispa. Chaymantapachan astawan Diospa llaqtanpi yanapakurqan, qhepamantaq Escuela de Entrenamiento Ministerial (kunanqa Soltero Qharikunapaq Escuela) nisqaman rirqan. Payqa Diosta servinanraykun ‘tiemponta mana usuchirqanchu’ (Efe. 5:16).

Llank’aymanta. ¿Tuta p’unchaychu llank’ashanki? ¿Kanchu tiempoyki familiaykiwan rimanaykipaq? ¿Hunt’ashankichu Diospa llaqtanpi llank’aykunawan? ¿Kallpachakushankichu discurso otaq demostración tupasuqtiyki allinta ruwanaykipaq? ¿Hukkunata kallpachanapaq hinachu rimanki? Ama qonqaychu Bibliaq kay nisqanta: “Diosta manchakuy, kamachikuyninkunatapas hunt’ay”, nispa. Chayta kasukunki chayqa Diosmi saminchasunki ‘llank’asqaykiwanpas kusikunkin’ (Ecl. 2:24; 12:13).

¿Qhapaqyarqanchu Janusz cristiano negocio ruwasqanpi? Manan. Aswanmi mana qolqeyoq askha manukunayoq rikukapurqan. Chaymi Diospa yanapayninta maskhaspa kawsayninta allichapurqan. Kunanqa precursor regular umallitaqmi kashan. Paymi nin: “Imachus necesitasqallaywanmi kawsani kallpachakunitaqmi hukkunata iñiyninkupi yanapanaypaq, chaymi kunanqa thak sonqoyoq kawsani”, nispa (Fili. 4:6, 7).

Wayna-sipas, imachus aswan importante kasqanpi hinallataq imaraykuchus imatapas ruway munasqaykipi yuyaymanay. Yuyariy, Diosta serviymi aswan allinqa ima ruwaymantapas.

Yaqapaschá ima ruwasqaykitapas saqenayki kanqa otaq pisiyachinayki kanqa. Chhaynapin Diospa ‘allin, sumaq, hunt’asqa’ munayninta ruwaspa saminchayninta rikunki (Rom. 12:2). Diosta tukuy almaykiwan servinki chayqa ‘tukuy ima ruwasqaykipas allinkaman kasunki’.

[Uranpi willakuy]

[31 paginapi foto recuadropiwan]

‘Allinkaq’ ruwayta akllakunapaq yanapaykuna

Kay tiempopi imaymana ruwanayoqña kanki chaypas, ¿iman yanapasunki aswan allin kaqkunata ruwanaykipaq? Yuyaymananaykin imarayku imatapas ruway munasqaykipi. Chaypaq kaykunata tapukuy:

ESTUDIOYKIMANTA SAMASQAYKI QHEPAMAN

▪ ¿Imakunatan chaypi yachamushani?

▪ ¿Hayk’a horan chay ruwaykunapi kani?

▪ ¿Yaqachu chaykunaman sonqollikapushani?

▪ ¿Diosta servinay tiempopichu chaykunata ruwani?

▪ ¿Mana allin runakunawanchu huñunakushani?

▪ ¿Mana iñiq runakunawanchu astawan huñunakushani?

UNIVERSIDADPI ESTUDIAYMANTA

▪ Imapi llank’anaypaqpas preparasqa kashani chayqa, ¿necesitasaqchu tiempota, kallpata, qolqeta gastaspa universidadpi estudiayta?

▪ ¿Titulotaraqchu necesitani kawsanaypaq?

▪ ¿Afectanqachu universidadman risqay huñunakuyman rinayta?

▪ ¿‘Aswan allin kaqtapunichu akllakushani’?

▪ ¿Astawanchu Jehová Diospi hap’ipakunay kashan?

LANK’AYMANTA

▪ ¿Llank’asqay qhepaman kanchu tiempo huk ruwaykunapi ‘q’ochukuyta’ tarinaypaq

▪ ¿Llank’asqay qhepata kanchu kallpay Diosta servinaypaq familiayta yanapanaypaqpas?

▪ ¿Manañachu tiempoy kan familiaywan rimanaypaq?

▪ ¿Sinchita llank’asqayraykuchu iñiyniypi pisiyapushani?

▪ ¿Manañachu ñawpaqpi hina discursokunata demostracionkunatapas ruwashani?

[30 paginapi dibujo]

Jehová Diosmi Baructa nirqan allin kaqkuna munapayaymanta ayqenanpaq