Adolecenciaypi kashaqtiymi iñiyniypi chiriyapurani. Noqaqa colegioypi compañeroykuna jinan kayta munarani. Paykunaqa munasqankutan imatapas ruwaqku, chaymi noqapas paykuna jina kayta munarani. Noqapaqqa tayta-mamaypa nisqanpas Bibliaq nisqanpas sasa junt’aymi karan, chaymi mana munaranichu juñunakuykunaman riytapas, Diosmanta willaq riytapas. Jehová Diospi iñiraniña chaypas manan kusisqachu paytaqa servisharani.

Diosmanta willaq rinaypaqpas manan preparakuqchu kani, chaymi predicashaspaqa mana imaniytapas atiqchu kani. Noqaqa jujkuna allinta qhawariwanallankupaqmi Diosmanta willaqqa lloqsiq kani, chaymi mana pimanpas estudiota qoqchu kani. Manan kusisqachu Diosmantaqa willasharani, aswanpas mana allinkunallapin piensaq kani. Chayraykun mayninpiqa niq kani: “Ñan sayk’upuniña Diosmanta willaytaqa, manan watan-watanqa aguantaymanchu”, nispa.

Wasiymantan ripuytapuni munarani 17 wataypi kashaspa. Chaymi p’achayta aparikuspa Australia nacionman ripurani. Tayta-mamayqa sinchi llakisqan  kasharanku. Ichaqa piensarankun maymanña riqtiypas iñiyniypi kallpachakushanallayta.

Australiapiqa astawanmi iñiyniypi chiriyapurani, juñunakuykunamanpas maynillanpiñan riq kani, chaymantapas iñiq t’aqapi wiñay masiy hermanokunawanmi puriyta qallarirani. Paykunaqa manan allinchu iñiyninkupi kasharanku, juñunakuykunamanña rishaspapas mayninpiqa tusuq machaq iman riqku. Noqapas paykunawan kuskan chaykunata ruwasharani. Kunanraqmi reparani chay ruwasqayqa manapuni allinchu kasqanta.

Iskay wata qhepamanmi juj hermana ejemplonwan yanapawaran. Noqaqa pisqa soltera hermanakunawanmi tiyarani. Paykunawanmi invitarayku watukuq umalliqta Tamara esposantawan wasiykupi juj semana qhepakunankupaq. Watukuq hermano iñiq t’aqapi hermanokunawan kashanankaman mayninpiqa Tamara esposanwan qhepakullaqpuni kayku. Paywanqa kusisqan kasharayku, mayninpiqa pujllaqmi kayku. Hermana Tamaraqa sumaqllan karan. Chhayna kasqanqa anchatapunin yanapawaran.

Hermana Tamaraqa kusisqan runakunaman Diosmanta yachachiq, chaypin repararani payqa anchatapuni Jehová Diosta munakusqanta. Chaymi pay jina kayta munarani. Chaypin yuyarirani Salmos 100:2 textoq nisqanta, chaypin nin: “Señor Diosta kusisqa yupaychaychis, kusisqa takin-takin payman achhuykuychis”, nispa.

Noqaqa hermana Tamara jinan Jehová Diosta serviyta munarani. Ichaqa kallpachakunaymi karan imayna kasqayta cambianaypaq. Sasaña karan chaypas, pisi-pisimantan kallpachakurani. Diosmanta willaq lloqsinaypaqpas allintan preparakuq kani. Wakin killakunapas precursor auxiliar kanaypaqmi kallpachakurani. Chaymi yanapawaran Diosmanta willaspa ama manchakunaypaq. Bibliawan runakunata yanapaspaqa ancha kusisqapunin kasharani. Chayraykun decidikurani sapa killa precursor auxiliar kanaypaq.

Kallpachakullaranitaqmi allin amigokunayoq kanaypaq, amigoykunaqa manan wiñay masiy  hermanokunallachu karanku. Paykunan yanapawaranku allin iñiyniyoq kanaypaq, Bibliatapas allinta estudianaypaq. Chaymi runakunamanpas kusisqa Diosmanta willasharani. Chaymantaqa precursora regularmi kapurani, iñiq t’aqapipas kusisqan hermanokunawan kuska kasharani. Chayraqmi Jehová Diostaqa kusisqa servirani.

Juj wata qhepamanmi Alex hermanota reqsirani, payqa anchatan Jehová Diosta munakuran. Payqa soqta watañan precursor regular kasharan. Chaymantapas iñiq t’aqapin yanapakuq kamachi kasharan. Payqa Malaui nacionpin askha killakuna yanapakusqa, chaypin tukuy tiemponkuwan Diosta serviq hermanokunawan reqsinakusqa. Paykunan yanapasqaku Jehová Diosta tukuy tiemponwan servinanpaq.

Alexwanmi 2003 watapi casarakapurani, kunanqa kuskan tukuy tiempoykuwan Jehová Diosta servishayku. Paywanqa imaymanatan yacharayku, Jehová Diospa bendicionninta iman chaskikurayku.

Timor Oriental nacionpi misionero jina yanapakunaykupaqmi 2009 watapi invitawaranku. Chayqa Indonesia nacionpa ladonpin kashan. Kusisqaña kasharayku chayman rinaykupaq chaypas manchakusharaykun. Ichaqa pisqa killa qhepamanmi chayarayku Dili llaqtaman.

Dili llaqtaman chayaspaqa chaypi tiyaq runakunamanmi yachakunayku karan. Paykunaqa juj simitan rimaranku, jinaspapas mijusqankupas, p’achakusqankupas jujniraymi karan. Chaypi wakin runakunaqa mana estudioyoq mana imayoq wajchan karanku. Chaymantapas wakinqa guerra tiempopi kasqankuta yuyarispan nishuta sufriqku. *

Juj kutinmi Diosmanta willashaspa 13 watachayoq sipaschawan tuparani, paypa sutinmi  karan María. * Payqa sinchi llakisqan kashasqa, chaypin willawaran mamitanpa wañupusqanta, papanwanpas unayñas mana tupasqachu. Chaypiqa askha wawakunan María jina mana tayta-mamayoq karanku. Juj kutinmi Mariaqa waqayuspa willakuwaran imayna kashasqanta. Noqaqa chayraqmi paypa rimasqan simitaqa yachasharani, chaymi mana allintachu niwasqanta entienderani. Ichaqa kaq raton Jehová Diospa yanapayninta mañakurani Mariata kallpachanaypaq. Chay qhepamanqa Bibliapi wakin textokunatan leepurani, jinan Biblia estudiayta qallarirayku. Payqa pisi-pisimantan iñiyninpi wiñariran, jinan bautizakapuran. Kunanqa askha runakunamanmi Diosmanta yachachishan, kusisqataqmi hermanokunawan kuska Jehová Diosta servishan. Hermanokunaqa anchatan payta munakunku.

Jehová Diospa yanapayninwanmi Timor Oriental nacionpiqa astawan Jehová Diosta serviqkuna yapakushan. Wakin hermanonchiskunaqa yaqa chunka watakuna jinallaraqmi bautizasqa kashanku. Chaywanpas wakinmi kanku precursor, iñiq t’aqapi yanapakuq kamachi, umalliq ima. Wakinninkuqa Betel wasipin yanapakushanku, chaypin rimasqanku simiman qelqakunata t’ijraypi yanapakushanku. Anchatapunin kusikuni iñiyninkupi wiñarisqankumanta, juñunakuypi kusisqa takisqankumantapas.

Timor Oriental nacionpi kausayqa manan Australia nacionpi kausay jinachu karan, chaywanpas kusisqan Jehová Diostaqa servirayku. Chaypiqa manan facilchu carropi viajayqa karan, mayninpiqa juj carrollamanmi junt’a runakuna wichamuqku. Chay runakunaqa mercadomantan rantikamuqku pescadota verdurakunata ima. Chaymi carroqa chayllamanña millayta asnaq. Wakin p’unchaykunaqa juch’uy wasikunapin estudiota qoq kayku, chay wasikunaqa sinchita rupharimuqtinmi horno jinaraq q’oñiriq, pampanpas allpallamantan karan, wallpakunapas ladollaykupin puriykachaq. Chhaynapiña tarikurayku chaypas, kusisqan kasharayku.

Anchatan agradecekuni tayta-mamayta, paykunaqa juch’uychaymantapachan Jehová Diosmanta yachachiwaranku. Adolecenciaypiña kasharani chaypas tayta-mamayqa yanapawashallarankun. Proverbios 22:6 textoq nisqanqa noqapin junt’akuran. Kunanqa kusisqan kashanku qosaywan kuska Jehová Diosta servisqaykumanta. Kunanqa 2016 watamantapachan watukuq umalli kaspa yanapakushayku.

¡Kunanqa kusisqan Jehová Diosmanta willashani! Mayninpin nini: “¿Imaynapitaq Diosmanta willayri mana gustawaranchu?”, nispa. Kunanraqmi reparani ima sasachakuykunaña kaqtinpas Jehová Diosmanta willayqa may allinpuni kasqanta. 18 watakunañan Alex qosaypiwan Jehová Diosta servishayku. Chayraykun ancha kusisqa kashani. Chayraqmi reparani Davidpa nisqanqa cheqaqpuni kasqanta. Paymi niran: “Qanman k’askakuqkuna ichaqa kusikuchunku, kusisqallapuni takichunku. Munakuqniykikunata jark’aykuy, qanpi paykuna q’ochukunankupaq”, nispa (Sal. 5:11).