Bibliaqa yanapawanchismi mana fracasaq kanapaq. Manataqmi ninchu “wakin runakunallan mana fracasaqqa kankuman” nispaqa. Cuentokunapiqa wawakunamanmi creechinku munapayasqallankuwan imapas tarikusqanta, chay hawan wawakunaqa mana chhayna kasqanta reparaspa llakikuykunapi tarikunku, Biblian ichaqa mana chaytachu nin.

Kallpachakuspaqa pipas manan fracasanmanchu. Biblian kaykunata niwanchis.

• ¿IMA NINMI BIBLIA?

  “Qolqeman sonqollikuqqa, astawanpunin munan, imaymanayoq kayta munaqpas, astawanraqmi tariyta munan” (Eclesiastés 5:10)

  ¿IMATAN CHAYWAN NISHAN? Manan qolqeyoq kaspachu pipas kusisqaqa kanqa, aswanpas qolqeyoqkunaqa llakisqan kanku. “Paykunallapi yuyaykuq runakuna” (Generation Me) nisqa libronpin Jean M. Twenge doctora nin: “Qolqellapi yuyaykuspa kawsaqkunaqa manan thakchu kawsanku, sapa kutillataqmi llakisqa kanku; hukkunawan allinta kawsanankupaq kallpachakuqkunan ichaqa mana chhaynachu kanku. Qolqewanqa manan kusikuyta rantiyta atisunmanchu. Qolqeqa kusichiwanchis necesitasqanchiskunata rantillaqtinchismi, chay qhepaman askha qolqeyoqña kasunman chaypas manañan kusikusunmanñachu”, nispa.

  KAYTAN RUWAWAQ: Ama qokuychu qolqe maskhayllaman, kawsaypiqa kanmi qolqemantapas aswan allin kaqkuna. Jesusmi nirqan sinchi munapayaymanta cuidakunapaq, imaymanayoqña kasunman chaypas manan chaymantachu kanqa kawsayninchisqa (Lucas 12:15).

•  ¿IMA NINMI BIBLIA?

  “Uma hoqariqqa qhepamanmi waqllinqa, anchaykachaq sonqoqa qhepamanmi urmanqa” (Proverbios 16:18)

  ¿IMATAN CHAYWAN NISHAN? Pipas ambicioso kaspa otaq hukkunata q’otusparaq imatapas ruwaqqa qhawarinallapaqmi mana fracasaq hina. “Allin empresakuna” nisqa libron kayta willan: Huk empresapi watan-watan mana fracasaq directorkunaqa “k’umuykukuq runakunan karqanku”, ichaqa empresapi director “sinchi hatunchakuq kasqanraykun empresakunaqa fracasan otaq mana allin qhawarisqa kanku”. Chaywanmi yachanchis sinchi hatunchakuqkunaqa fracasasqankuta.

  KAYTAN RUWAWAQ: Ama maskhaychu allin qhawarisqa kayta aswanpas kallpachakuy huch’uyyaykukuq kanaykipaq. Biblian nin: “Pipas mana imapas kashaspa aswan allin kasqanta yuyan chayqa, pay kikintan q’otukun”, nispa (Gálatas 6:3). Chhaynata yuyaykuqkunaqa manan reparakunkuchu fracasasqankuta.

•  ¿IMA NINMI BIBLIA?

  “Runapaq aswan allinqa [...] llank’asqanpipas kusikuynillanmi” (Eclesiastés 2:24)

  ¿IMATAN CHAYWAN NISHAN? Allin runa kanapaq kallpachakuqtinchisqa llank’asqanchispas kusichiwanchismi. Huk libro qelqasqanpin doctora Madeline Levine nirqan: “Imatapas allinta ruwanapaqqa chay ruwaytan allinta yachananchis, chay ruwayta allinta yachanapaqqa mana sayk’uspa ruwaqmi kananchis”, nispa. Fracasaymanta sayarinapaqqa mana sayk’uspan ruwashanalla.

  KAYTAN RUWAWAQ: Kallpachakuy llank’anaykita allinta ruwanaykipaq, ama pisipaychu ima sasachaywanpas. Sichus wawayki ima problemapipas tarikunman chayqa pay kikin chayta allichachun atisqanman hina. Chhaynapin yachanqa mana pisipaq kayta, mana iskayaspa ruwaq kayta, chaykunaqa yanapanqan kurak kaqtin.

• ¿IMA NIMI BIBLIA?

  “Aswan allinmi kawsashaq alqo, wañusqa leonmantaqa” (Eclesiastés 9:4)

  ¿IMATAN CHAYWAN NISHAN? Llank’ananchisqa yanapawananchispaqmi kanan. Sichus huk runa sinchita llank’asqanwan onqopunman, familianpas mana allintachu kawsanman chayri, ¿mana fracasaq runachu kanman? ¿Manan riki? Mana fracasaq runakunaqa llank’ankuña chaypas kikinkutapas familiantapas allintan cuidanku.

  KAYTAN RUWAWAQ: Cuidakuy ama onqonaykipaq, allinta puñuy. Sichus nishuta llank’asqaykirayku onqowaqraq familiaykitapas amigoykikunatapas saqerpariwaqraq chayqa fracasashasqaykitapas mana reparakuwaqchu hinan kanman.

• ¿IMA NINMI BIBLIA?

  “Kusisamiyoqmi huch’uyyaykukuspa Diosta maskhaqkunaqa” (Mateo 5:3)

  ¿IMATAN CHAYWAN NISHAN? Mana fracasaq kanapaqqa Bibliata estudiaspan kamachikuyninkunata kasukunanchis. Qolqellata maskhayqa llakikuykunatan apamun, Diospa nisqankunata ñawpaqtaraq ruwaymi ichaqa chaykunata pisiyachin, chaytan reparanku Jehová Diospa testigonkuna (Mateo 6:31-33).

  KAYTAN RUWAWAQ: Bibliaqa yanapasunkin mana fracasaq kanaykipaq. Jehová Diospa testigonkunan yanapasunki imaynata chayta tarinaykipaq, paykunata maskhay otaq internetpi haykuy www.jw.org nisqaman.