Wakin runakunaqa ninkupaschá: “Bibliapi nisqanqa cambiasqapaschá kashan”, nispa. Profeta Isaiasmi ichaqa niran: “Diosninchispa siminmi ichaqa wiñaypaq qaqatapuni sayan”, nispa (Isaías 40:8). ¿Imaynapin yachasunman Bibliapi ima nisqanpas mana cambiasqachu kasqanta?

Atiyniyoq kasqanraykun Diosqa Bibliapi willachisqanta cuidaran runakuna ama cambianankupaq. Chaymi ñaupaq tiempopi Bibliata copiaq runakunaqa sapanka letrakunata yupaspa copiaranku, chhaynapin yacharanku mana imatapas cambiasqankuta yapasqankutapas. Ichaqa juchayoq kasqanchisraykun wakin copiaqkunaqa wakin palabrakunata cambiaranku.

Kay tiempopiqa Bibliamanta askha copiakunan ñaupaq tiempomanta kashan. Sichus Bibliapi wakin willakuymanta iskayashanchis chayqa, ñaupaq tiempomanta copiakunawanmi tupanachisunman, chhaynapin yachasunman cambiasqachus kashan icha manachus chayta. (Chaymanta astawan yachanaykipaq jw.org nisqapi leey “¿Se ha cambiado o manipulado la Biblia?” nisqa yachachikuyta.)

Rimasun ñaupa tiempomanta tarikusqan juj qelqa k’uyumanta, chay qelqatan Rollos del mar Muerto sutiwan reqsikun, chaytaqa 1947 watapin tariranku, Kachi qocha qayllanpi kaq qaqa t’oqopi (árabe runakunan viajashaspa tariranku). Chay qelqa k’uyukunapin qelqasqa kasharan Bibliamanta wakin textokuna, chay qelqataqa iskay waranqa wata ñaupaqtan qelqakuran. Estudiaq runakunan chaypi qelqasqa kasqanta tupanachiranku kunan tiempopi Bibliapi willakusqanwan. ¿Imatan yacharanku?

Chay estudiaq runakunan ninku: “Kunan tiempopi Bibliapi willakusqanqa kaqllan kashan ñaupa tiempomanta qelqakunapi nisqanwan”, nispa. * Ñaupaq tiempomanta askha qelqa k’uyukunata estudiaspan yachakuran Bibliapi willasqanqa mana cambiasqachu kasqanta. Chhaynaqa Diospunichá cuidaran Bibliapi willakuykuna kaqlla kananpaq.

Chay jinaqa mana iskayaspan Bibliapi nisqanta leenanchis. Chaymi kunanqa qhawarisunchis imatas profetakuna Diosmanta willaranku chayta.