Juj hermanon niran: “¡Chunka isqonniyoq watañan chay Bibliata suyakusharani!”, nispa. Chay hermanonchisqa Mosoq pachaq Biblian, Diospa Palabran nisqa Bibliatan bengalí rimaypi suyakusharan. Askha runakunan rimasqanku simipi chay Biblia lloqsimuqtin kusikunku. Ichaqa, ¿imakunatan ruwakun chay Biblia lloqsimunanpaq? Chaymanta yachasun.

 Juj simiman Bibliata t’ijranapaqqa ñaupaqtan ajllakun chay simita rimaq hermanokunata, chaytaqa ruwakun yachachikuykuna qelqaymanta encargakuqkunaq nisqankuman jinan. ¿Jayk’a tiempopin Bibliata t’ijrakun? Qelqakuna t’ijrakusqanta qhawariqkunamanta Nicholas Ahladis hermanon nin: “Sapanka rimaypas jujniraymi, chaymi mana kaq tiempollapichu Bibliataqa t’ijrakun. Wakin simipiqa askha t’ijraqkunan kan wakinpitaq mana, wakin simiqa fácil t’ijrayllan wakintaq mana. Chaymantapas wakin simikunataqa askha llaqtakunapin rimakun ichaqa wakin llaqtakunapin jujnirayta rimanku. Chaymi wakin simipi Nuevo Testamentotaqa t’ijranku juj watapi, wakintaq iskay watapi, wakintaq kinsa watapi. Antiguo Testamentotawan Nuevo Testamentotawanqa wakinqa t’ijranku tawa wata maspin. Makiwan rimaqkunapaqmi ichaqa aswan askha watakunapi t’ijrakun”, nispa.

 Bibliata juj simiman t’ijrakunanpaqqa manan t’ijraqkunallachu kanan, kanallantaqmi chay simita rimaq juj hermanokunapas, paykunaqa kaq simitan rimanku ichaqa juj llaqtakunamantan kanku, paykunan tiemponkuta t’aqanku wasillankumanta imaynachus t’ijrakushasqanta revisamunankupaq, chhaynapin chay Bibliaqa k’apaj, fácil entiendeylla. Sudáfrica nacionpi Biblia t’ijraqkunata yachachiqmi kayta nin: “Biblia t’ijraqkunaqa allintan yachanku t’ijrasqankumanta Jehová Dios cuentata mañananmanta, yachallankutaqmi mana allinta t’ijraqtinku leeqkuna mana entiendenankuta”, nispa.

 Biblia t’ijrayta tukukuqtinqa imaymanakunan necesitakullantaq: papel, tinta, Bibliaq tapanpaq forro, goma, cinta, cartón, jujkunapas, chhaynapi unayta Biblia durawananchispaq. 2019 watapin tukuy chay materialkunapi gastakuran 20 millón más dólares, 300.000 más horastataqmi hermanokuna llank’aranku Bibliata imprimispa apachispa ima.

 ¿Imaraykun Bibliata papelpi ruwakunanpaq askha gastokunata ruwanchis? Hermanonchis Joel Blue nin: “Bibliata ruwasqanchismi ima qelqamantapas aswan importante”, nispa. Paymi nillantaq: “Bibliataqa allin materialkunawanmi ruwakushan, chhaynapi Jehová Diosta jatunchananpaq, Diosmanta willasqanchistapas sumaqchananpaq”, nispa. Payqa qelqakunata imprimiymanta jujnin encargakuqmi.

 Chaymantapas ñausakunapaqpas chunka simikunapin Diospa Palabran nisqa Bibliata t’ijrakullarantaq, chaytan nikun: “Braille simi” nispa. Braille simipi Bibliataqa pusaq horaspin ruwakun, chay Bibliaq raqt’anqa iskay metro masmi. Carcelpi kaq runakunapaqpas Bibliataqa ruwakullantaqmi, chay Bibliaq tapanqa papel-llamantan.

 Diospa Palabran nisqa Bibliaqa askha runakunaq sonqonmanmi chayan. Kunanqa yachasun República Democrática del Congo nacionpi, Tombe llaqtapi kiluba simita rimaq iñiq t’aqamanta. Paykunaqa juj Bibliallayoqmi karanku, sasa entiendeytaqmi chay Bibliaqa karan. Chay iñiqmasikunaqa juñunakuypi yachachimunankupaqqa chay Bibliallatan mañanakuqku. Ichaqa 2018 watamanta agosto killamantapachan sapankanku Bibliayoqkama kashanku. Kiluba simipi Diospa Palabran nisqa Bibliaqa fácil entiendeyllan, rimasqankuman jinallataqmi t’ijrasqa kashan.

 Alemán simita rimaq hermanan Diospa Palabran nisqa Bibliamanta kayta nin: “Ñaupaqpiqa obligakuqmi kani Bibliata leenaypaq, kunanmi ichaqa mayta suyakuni leenay horasta”, nispa. Carcelpi kaq runapas ninmi: “Kay Bibliaqa imaynachus piensasqaytan cambiashan, manan jayk’aqpas Bibliaq nisqantaqa entienderanichu, kunanmi ichaqa facil-llata entiendeshani. Jehová Diospa testigonkunatan astawan reqsiyta munani, yachaytataqmi munani bautizakunaypaq imachus ruwanayta”, nispa.

 Diospa Palabran nisqa Bibliaqa ruwakamun Diosta munakuq runakuna qolqenkuta churasqankuwanmi, chaymi chay Bibliata leeqkunaqa paykunata “gracias” ninku. Wakinmi donacionta churanku donate.jw.org nisqa paginanta. Gracias niykikun qoykukuq kasqaykichismanta.