¿Imanasqataq Jehova Diospa testigonkunaqa guerramanqa mana rinkuchu?

QALLARINMANMI

Jehova Diospa testigonkunaqa kaykunaraykum guerramanqa mana rinikuchu:

Diospa kamachisqanta kasukusqaykuraykum. Bibliam nin Diosta serviqkunaqa ‘lanzankutapas rutunakunamanña tikranankumanta’ hinaspa guerrakunamanpas manaña rinankumanta (Isaias 2:4).
Jesuspa kamachisqanta kasukusqaykuraykum. Jesusmi apostol Pedroman kaynata nirqa: “Kutiykachiy espadaykita maymi kasqanman, espadawan llapa peleaqkunaqa espadawantaqmi wañunqa”, nispa (Mateo 26:52). Chayna nisqanwanmi Jesusqa yachachirqa qatiqninkunaqa pitapas mana wañuchinankumanta.

Jesusqa nirqataqmi qatiqninkunaqa kay pachapi mana allin ruwaykunawan mana chaqrukunankumantapas. Chaymi testigokunaqa mayqin gobiernomanpas mana sayapakunikuchu (Juan 17:16). Manataqmi harkakunikuchu soldadokunapa ima ruwasqankutaqa nitaq runakuna soldado kayta munaptinkupas.
Runamasiykuta kuyasqaykuraykum. Qatiqninkunamanmi Jesus nirqa: ‘Musuq kamachikuytam quykichik, kuyanakuychikyá’, nispa (Juan 13:34, 35). Testigokunaqa enteron pachapim wawqi-panintin hina kawsakuniku, chaymi mana munanikuchu wañuchinakuytaqa (1 Juan 3:10-12).
Apostolkunapa tiempopi iñiqkunata qatipakusqaykuraykum. Huk qillqam nirqa: “Apostolkunapa tiempopi kaq iñiqkunaqa guerramanqa manam rirqakuchu nitaqmi soldado kaytapas munarqakuchu”, nispa (Encyclopedia of Religion and War). Chaynataqa kawsarqaku kuyanakunankupaq hinaspa enemigonkuta mana chiqninankupaq Jesuspa kamachisqanta kasukusqankuraykum. Huk qillqapipas nirqam: ‘Jesuspi iñiqkunaqa manam munarqakuchu soldado kaytaqa, chaypaqqa saqinankum karqa Dios yupaychayninkuta’, nispa (Edward Gibbon, Historia de la decadencia y caída del Imperio romano).

Lliwpa allinninpaqmi yanapakuniku

Jehova Diospa testigonkunaqa maylaw nacionpi kawsakuspaykupas runamasiykupa allinninpaq kaqkunallata ruwanaykupaqmi kallpanchakuniku. Diosta kasukusqaykuraykum autoridadkunata kasukuniku.

‘Lliwchaykichikyá kasukuychik autoridadkunata’ (Romanos 13:1).
‘Rey Cesarpa kaqtaqa paymanyá quychik, Diosmanñataq paypa kaqta’ (Mateo 22:21).

Autoridadkunata kasukusqaykuraykum impuestota utaq imamantapas paganapaq kaptinqa paganiku, chaynataq runamasiyku allinlla kanankupaq kamachisqankutapas kasukuniku.