Romanos 13:1-14
13 Llapallan runakunayá autoridadkunata kasukuchunku,+ autoridadkunaqa manam kanmanchu Dios mana munaptinqa,+ autoridadkunaqa Dios churaptillanmi maypipas kachkanku.+
2 Chaynaqa, autoridadkunapa contranpi pipas churakuqqa Diospa tantiasqanpa contranpim churakuchkan, contranpi churakuqkunaqa juzgasqam kanqaku.
3 Autoridadkunataqa manchakunku mana allin ruwaq runakunam, allin ruwaq runakunam ichaqa mana manchakunkuchu.+ ¿Autoridadkunata mana manchakuspa kawsakuytachu munanki? Chayna kaptinqa hinallayá allin kaqta ruway,+ hinaspaqa paykunapa alabasqanmi kanki.
4 Paykunaqa qampa allinnikipaqmi Diospaq llamkanku. Mana allin kaqta ruwaspayki ichaqa manchakuy, paykunaqa manam yanqachu autoridadqa* kanku. Autoridadkunaqa mana allin ruwaq runakunata castigaspankum Diospaq llamkanku.
5 Chaynaqa, autoridadkunataqa kasukunaykichikpunim. Ichaqa manam castigota manchakusqaykichikraykuchu, aswanqa concienciaykichikpi allinlla kanaykichikpaqmi.+
6 Chaymi qamkunapas impuestota pagankichik, autoridadkunaqa Diospaq llamkaqkunam kanku. Paykunaqa llaqtapaqmi tukuy tiempo imakunatapas ruwanku.
7 Llapallanmanyá imam mañakusqanta quychik. Impuesto mañakuqmanyá impuestota quychik,+ qullqi mañakuqmanpas qullqita quychik, chaynallataqmi kasukunaykichikta munaqtapas kasukunaykichik,+ respetanaykichik munaqtapas respetanaykichikmi.+
8 Amayá pitapas debekuychikchu, debespaqa debenakuychik kuyanakuyllatayá.+ Runamasinta kuyaq runaqa Moisespa chaskisqan kamachikuykunatam allinta kasukuchkan*.+
9 Wakin kamachikuykunam nin: “Amam hukwanqa pierdekunkichu*,+ amam pitapas wañuchinkichu,+ amam suwakunkichu,+ amam hukpa kaqtaqa imantapas munapayankichu”, nispa.+ Kay kamachikuykunapiwan wakin kamachikuykunam hukllawasqa kachkan “runamasikichiktaqa kikikichikta hinayá kuyaychik” niq kamachikuyllaman.+
10 Pipas kuyakuqqa runamasinpaqqa manam ima mana allintapas ruwanchu,+ chaymi pipas kuyakuqqa Moisespa chaskisqan kamachikuykunata allinta kasukuchkan.+
11 Tukuy kaykunataqa kasukunaykichik imay tiempopi kasqanchikta yachasqaykichikraykum. Ñamá horaña puñusqaykichikmanta rikcharinaykichikpaq,+ kunanmi salvakunanchik punchawqa aswan hichpallapiña kachkan Diospi iñikusqanchik* punchawmantaqa.
12 Tutayaypas tukurunanpaq hinañam kachkan, ñam achikyamuchkanña. Chayraykuyá tutayaypi ruwana kaqkunataqa amaña ruwasunchu,+ hinaspayá punchawpi peleanapaq churakuna pachawan churakusunchik*.+
13 Punchawpi hinayá allinta purisun,+ amayá pinqaypaq kusirikuykunapichu*, sinkakuypichu, qacha ruwaypichu, mana pinqakuspa mana allin ruwaypichu*,+ liryanakuypichu nitaq envidianakuypichu*.+
14 Aswanqa señorninchik Jesucristopa+ imayna kasqantayá qatipakuychik, amayá ñawpaqmantaraqqa tantiaychikchu aychaykichikpa munasqanta ruwanaykichikpaqqa.+
Willakuykuna
^ Griego rimaypiqa nichkan: “Espadayuqqa”, nispam.
^ Utaq: “Cumplichkan”.
^ Utaq: “Waqllikunkichu”.
^ Kaypiqa rimachkan runakuna salvasqa kanankupaq Jesusta Dios kachamusqanmanta mana iskayrayanamantam.
^ Griego rimaypiqa nichkan: “Kanchay armakunawan churakusunchik”, nispam.
^ Utaq: “Amayá chaqwallaña fiestakunapichu”.
^ Qaway “mana pinqakuspa mana allin ruway” niqpa ima ninan kasqanta.
^ Utaq: “Kuyasqan runamanta iskayrayaypichu”.
