Sapa watam runamasiykuman qunaykupaq bibliamanta hurqusqa qillqakunata chaynataq bibliakunata wara-waranqantinta ruwaniku. Yaqa enteron pachapim kan betel wasiyku chaynataq qillqakunata ruwanaykupaq maquinaykupas. Kantaqmi huñunakunaykupaq wasikunapas. ¿Ima qullqiwantaq tukuy chaykunata ruwaniku?

Tukuy chaykunataqa ruwaniku sunquykumanta sapakama qullqiykuta qusqaykuwanmi (2 Corintios 9:7). Kay qillqaqa 1879 watapiraqmi nirqaña: “Kay qillqataqa ruwanchik Jehova Diospa yanapayninwanmi, pay hinalla yanapawaptinchikqa manam hukkuna yanapawananchikpaqqa haykapipas qullqitaqa mañakusunchu”, nispa. Kunankamapas hina chaynallatam piensaniku (chay watakunapiqa kay qillqatam suticharqaniku Zion’s Watch Tower nispa).

Sunquykumanta qusqayku qullqitaqa apachiymankum betel wasiman utaqmi churaymanku huñunakunayku wasipi qullqi churana cajachakunaman. Manam diezmotaqa mañanikuchu, qillqaykutapas manam rantikunikuchu, Diosmanta yachachispaykupas manam qullqitaqa mañakunikuchu. Huñunakunayku wasita ruwaptinkupas mana imallapaqmi yanapakuniku. Jesucristom nirqa: ‘Qamkunaqa mana imallawanmi chaskirqankichik, mana imallapaqtaqyá qamkunapas quychik’, nispa (Mateo 10:8). Betel wasikunapi llamkaqkunapas mana qullqillapaqmi llamkanku chaynataq Jehova Diospa llaqtanpi punta apaqkunapas.

Qullqi qusqaykuwanqa yanapanikutaqmi sasachakuypi tarikuq iñiqmasiykutapas. Apostolkunapa tiemponpi kaq iñiqkunapas yanapanakurqakum (Romanos 15:26). Chaynam kay tiempopipas ima sasachakuypas kaptinqa mikuyta, pachata, hampikunata apachispa yanapaniku.