Wañuyqa lliw runakunapa enemigonmi, chaytaqa manam pipas venceyta atinchu. Mayqen kuyasqa ayllunchikpas wañuruptinqa llumpay hukmanyasqam tarikunchik. Mozo-sipas kaspaqa manapaschá piensanchikchu wañuy hapiruwananchiktaqa.

Egiptopi faraonkunam otaq kamachiqkunam piensarqaku wañuruspapas espiritu cuerpopi hinalla kawsanankupaq kasqanpi, chaymi ruwachirqaku pirámide nisqanku hatunllay-hatun torre hina wasikunata. Ichaqa tukuy chay ruwasqankuqa yanqapaqmi karqa.

China nacionpi kamachiqkunapas wañuyta mana munaspankum wiñay kawsachikuq hampi tariyta munarqaku. Qin Shi Huang sutiyoq kamachiqmi hampiq otaq yachayniyoq runankunata obligarqa wiñay kawsachikuq hampita ruwanankupaq. Chaymi wakin hampikunata ruwarqaku mercuriowan chapusqata. Chayna hampikunata tomasqanwanmi chay kamachiqqa wañururqa.

Wiñaypaq mozo-sipas kananpaq ima yanapasqanta maskaspanmi Juan Ponce de León nisqanku runapas Españamanta 1513 kaq watapi Puerto Rico nisqanku islaman chayarurqa. Chaymantam rirqa Estados Unidos lawman, chaypim tarirurqa Florida llaqtata. Ichaqa chaymanta watakuna pasayllatam chaypi kaq inka kaqlla runakuna wañurachirqaku, mozo-sipaslla kanapaq hampi maskasqanpi.

Runakunaqa tukuytam ruwarqaku hinalla kawsanankupaq, chaypaq imakunata ruwasqankuwan mana acuerdopi kaspapas cuentatam qokunchik maylawmanta kaspapas hinalla kawsakuy munasqanchikmanta.

¿Imanasqataq wañuytaqa mana munanchikchu? Chaymantam Biblia willawanchik: “Diosqa tukuy imatam tiempollanpi sumaqllataña rurarqa hinaspam runakunaman qorqa wiña-wiñaypaq  kaqkunamanta piensanankupaq”, nispa (Eclesiastes 3:11). * Chaymi tukuy sonqonchikwan munanchik kay Pachapi wiñaypaq kawsakuyta manam 80 watalla kawsaytachu (Salmo 90:10).

¿Imanasqataq Diosqa unanchawarqanchik wiñay kawsaypi piensaqta? ¿Chaypi yanqa piensananchikpaqchu? Manam. Diosmi prometen wañuyqa chinkachisqa kananta. Chaymantam achka kutita Bibliaqa willawanchik chaynataq wiñay kawsaymantapas. (Qaway  “Wañuyqa chinkanqam” niq recuadrota.)

Jesucristopas nirqam: “Chay wiñay kawsayniyoqqa kanku sapallan cheqap Dios kasqaykita reqsiqkunam hinaspa kachamusqayki Jesucristota reqsiqkunam”, nispa (Juan 17:3). Wañuy venceytaqa atisunmi, ichaqa Jesuspa nisqanman hinam Diospa yanapayninta necesitanchik.