Ñakarisqaykunata aguantanaypaqmi Jehová Dios yanapawarqa

Kaytam willakun Soledad Castillo

Qosaymi wañukurqa 34 wataypi kachkaptiy. Soqta wata qepatañataqmi taytay wañukurqa, pusaq killa qepatañataqmi niwarqaku chullalla waway mana hampiy atina onqoywan kasqanta. Chay llakikunawanqa hukmanyaruymanmi karqa, ichaqa manam chaykunawanqa atipachikurqanichu.

SUTIYMI Soledad, ichaqa manam haykapipas sapallayqa sientekurqanichu. Ñakariykunapi kaptiymi Jehová Diosqa manapuni qonqawaqchu, Isaias 41:13 nisqanman hinam, makiymanta hapiwachkanmanpas hina niwarqa mana manchakunaypaq. Willaykusqaykichikyá ñakarisqaykuna atipasqaymanta chaynataq Jehová Diosman astawan hapipakusqaymantapas.

Hawkalla hinaspa kusisqa sipasyasqaymanta

España (Barcelona) nacionpim nacerqani 3 de mayo 1961 watapi. Tayta-mamaypa sutinmi José hinaspa Soledad, sapallan ­churinmi kani. Iglesianpi yachachiqkunata mamay tapukuptinmi paykunaqa mana allintachu contestarqaku. Ichaqa isqon watachaypi kachkaptiymi mamayqa Bibliapa cheqap yachachikuyninmanta yacharurqa. Huk punchawmi Jehová Diospa testigonkuna ­visitaspanku Bibliawan contestarqaku yachay munasqankunata. Yachasqankuna ­sumaqllaña kasqanraykum Biblia estudiayta qallarirqa.

Pisi tiempollamantam bautizakurqa Jehová Diospa testigon kananpaq. Taytaypas pasaq watakunallapim bautizakurqa. Mamayta yachachiq Eliana sutiyoq cristianam cuentata qokururqa Biblia estudiay munasqayta. Warmachallaraq kaptiypas Bibliata estudianaypaqmi niwarqa. Paypa hinaspa mamaypa yanapawasqanwanmi 13 watachaypi bautizakurqani.

Sipasyasqay tiempopim Jehová Diosta anchata mañakurqani, aswanraqmi imatapas tanteanay kaptinqa. Chay wataykunapiqa hawkallam tarikurqani. Congregacionpim achka amistadniykuna karqa chaynataq tayta-mamaywanpas hawkallam kawsarqaniku. 1982 watapim Felipe sutiyoq iñiqmasiywan casarakurqani payqa ñoqa hinam astawan Dios serviyta munarqa.

Jehová Diosta kuyananpaqmi wawaykuta yachachirqaniku

Pichqa wata qepatam anchata kusikurqaniku kuyayllapaq wawachayku naceruptin, Saul nispam suticharqaniku. Sanolla chaynataq kusisqa wiñaspan Diosta kuyanantam  munarqaniku. Tiempochakuspaykum Jehová Diosmanta rimaq kaniku, kuska mikuq kaniku hinaspam parquepipas pukllarqaniku. Taytanwan predicaq lloqsiytam Saulqa munarqa, chaymi warmacha kasqanmantapacha runakunaman punkunkupi tratadochakunata saqeyta yacharurqa.

Kuyakuywan uywasqaykum allinpaq karqa. Soqta watachanmantapacham sapa kuti ñoqaykuwan predicaq lloqsirqa. Bibliapi willakuykuna leepusqaykutam anchallataña gustaq, hinaspam ganasllawanña suyaq familiantin Biblia estudianaykuta. Escuelaman yaykuruspanqa kikinñam Bibliamanta yachasqanman hina allin ruraykunata rurarqa.

Chayna sumaq kawsakusqaykum qonqayllamanta cambiarurqa. Qanchis watayoqña warmachayku kachkaptinmi qosayqa pulmonninwan onqoyta qallaykurqa. Chay onqoyninwanmi 11 killa camallanpiña ñakarirqa, manañam llamkaytapas atirqachu hinaspam 36 watanpi kachkaspa wañukurqa.

Waqaniraqmi chay llakiyta yuyarispay. Qosay aswan-aswan peorchakusqanta qawaspaymi llumpayta llakikurqani mana imatapas rurayta atispay. Sapa kutim kallpanchaq kani, ichaqa sonqoypim llumpayta llakikurqani manaña vida pasaqmasiy kananmanta musyakuspay. Huñunakusqayku salonman mana riyta atispaykum Bibliamanta qellqakunata leepurqani chaymi anchata kallpanchawarqaku. Wañukusqanmi llumpayllataña llakichiwarqa.

Chaywanpas Jehová Diosqa manamá saqewarqachu. Sapakutim mañakurqani kallpanchawananpaq. Orakuspaymi ­agradecekuni qosaywan kusisqa kawsakusqaykumanta chaynataq kaqllamanta tupaykunaypaq suyakuyniymantapas. Chaymantapas mañakurqanim qosaywan sumaq kawsakusqaykuta yuyarispay kusisqa kanaypaq chaynataq Diosta servinanpaq warmachayta ­yanapanaypaqpas. Jehová Diosta mañakusqaymi yanapawarqa chay llakiyta aguantanaypaq.

Tayta-mamaypas, iñiqmasiykunapas tukuypim yanapawarqa. Ichaqa ñoqañam Saulniyta Bibliamanta estudiachispay Diosta servinanpaq yachachinay karqa. Punta llamkapakusqay patronniymi niwarqa ­oficinapi llamkaptiy allinta pagawananpaq ichaqa limpiezata ruraspa llamkaytam akllakurqani Saulniy escuelanmata lloqsiramuptin paywan kuska imatapas ruranayrayku.

Ñoqaqa anchatam munarqani Diosmanta waway allinta yachananta, yuyarqanimá Proverbios 22:6 kayna nisqanta: “Imaynam kawsananpaqyá yachachiy warmataqa. Yuyaqña kaspapas manam pantanqachu payqa”. Kay textopa nisqanmi anchata kallpanchawarqa Diospa nisqankunata warmayman yachachinaypaq, chay rurasqaymanta Jehová Dios bendeciwanantam yacharqani. Achka qollqe ganaytapas saqerqanim warmaywan kuska imapas rurasqay imamantapas aswan allin kasqanrayku.

 Qosay wañukusqanmanta pasaq watakunallatam taytaypas wañukurqa, paypas Diosman sonqo kayninpim sumaq ejemplo karqa. Chaywanmi llumpayta wawayqa hukmanyarurqa taytanpa wañukusqanta yuyariruspan. Abuelon wañukuptinmi Saulniyqa 14 watanpi kachkarqa, chaymi sapallanña qari qepaspan nirqa mamantawan abuelanta cuidananpaq.

Leucemia onqoywan ñakarisqanmanta

Taytay wañukusqanmanta pusaq killa qepatam Saulta doctorman aparqani sapa kuti pisipasqa hinallaña sientekuptin. Doctor niwaptinmi hospitalman aparqani, achka analisiskunata ruraruspankum leucemia nisqa onqoywan kasqanta niwarqaku. *

Kay onqoywan ñakarispanmi Saulqa iskay wata parten hospitalman sapa kutilla riq. Quimioterapia nisqa tratamientota soqta killa chaskisqanwanmi wata parten allinyaykurqa. Ichaqa kaqllamanta chay onqoywan peorchakuruspanmi huktawan chay tratamientota chaskirqa, chaywanmi llumpayta debilyarurqa. Chay tratamientota huktawan ruraruptinkum warmayqa manaña aguantarqañachu. Hinaspam wañukurqa 17 watanpi kachkaspan. Chaypaqqa ñam Jehová Diosman qokururqaña hinaspapas willakurqam bautizakuy munasqanta.

Quimioterapia nisqa tratamientowan runa mana debilyarunanpaqmi doctorkunaqa ninku yawarta churachikunankupaq. Ichaqa manamá onqoqtaqa hampinmanchu. Leucemia onqoywan Saul kasqanta doctor niwaptinkum iskayniyku nirqaniku yawartaqa mana chaskinanpaq, chaynataqa tantearqaniku ‘yawartaqa amam mikunkichikchu’ nispa Jehová Diospa kamachisqanta kasukuspaykum (Hechos 15:19, 20). Sapallan kaspanpas Saulqa achka kutitam doctorkunaman qawachirqa kikinmanta chayna tanteakusqanta (leey 21 kaq paginanpi cuadrochata).

Doctorkunam nirqaku Saulqa mozo kaspanpas yuyayniyoq runa hinam entienderqa onqoynin sasachasqanmanta. Hospitalpi doctorkunaqa yawarmanta tanteasqaykutam respetarqaku ichaqa piensasqaykuta cambianaykupaqmi kallpanchawaqku. Yawarta mana chaskinanpaq tanteasqanta doctorkunaman Saul qawachisqanmi kusichiwarqa. Chaytaqa rurarqa Diosman sonqo kaspanmi.

Onqosqanmanta yachasqayku watapim Barcelona llaqtapi distrito nisqa asambleapi chaskirqaniku Acerquémonos a Jehová nisqa librota. Hospitalpi kaspaykum kay sumaq librota leerqaniku. Kay libroqa sasachakuykunapi kachkaptiykum kallpanchawarqaku iñiyniykupi qaqa hina takyanaykupaq. Libropa qallariq paginanpi Isaias 41:13 nisqan textom anchata kallpanchawarqaku. Kay textom nin: “Ñoqa Tayta Diosmi alleq makikichikmanta hapiqnikichik kani”. “Ama manchakuychikchu, ñoqam yanapasqaykichik . Niqnikichikmi kani”, nispa.

Saulpa iñiyninmantam admirakurqaku

Saul yuyayniyoq hina kasqanmanta hinaspa suyakuyninpi takyasqanmantam hospitalpi doctorkunawan enfermerakuna admirakurqaku. Hospitalpi atiendeqkunawanmi kuyachikurqa. Cancerwan onqoqta atiendeq Doctormi chaymantapacha Jehová Diospa testigonkunapa churinkunata atienderqa leucemia onqoywan onqoptinku. Payqa onqoqpa piensasqanta respetaspanmi atienderqa. Iñiyninta waway imayna defiendesqanta, wañuytapas mana manchakusqanta hinaspa kawsakuy munasqantam chay doctorqa astawan  yuyarin. Enfermerakunapas Saultam alabarqaku sumaq kayniyoq mozo kasqanmanta. Wañuy patanpiña kaspapas asichikuqmi karqa.

Huk doctoram niwarqa mana hampiy atina onqoywan warmachakuna ñakarispankuqa tayta-mamankupa hinaspa doctorkunapa contranpi churakusqankuta. Saulniymi ichaqa mana chaynachu karqa. Chaymi chay doctoraqa admirakurqa hawkalla warmay kasqanmanta. Chaymi Saulniywan iñiyniykutaqa sutillata qawachirqaniku.

Saulpa imayna kasqanmi congregacionpi huk cristianota anchatapuni yanaparqa. Kay hermanom 6 wataña sinchi llaki nisqanku onqoymanta doctorkuna hampiptinkupas mana sanoyarqachu, ichaqa achka tutam payqa Saulniyta hospitalpi cuidarqa. ­Admirakurqam onqoyninwan Saulniy mana atipachikusqanmanta chaynataq watukuqninkunatapas kallpanchasqanta qawaspan. Paymi niwarqa: “Saulpa ejemplonmi kallpanchawarqa onqoyniyta atipanaypaq”, nispa.

Waway wañukusqanmantaqa 3 wataña pasaruptinpas hinallaraqmi anchata llakikuni. Kay ñakariytaqa aguantarqani manam kikiypa atiyniywanchu aswanqa Diospa ‘hatu-hatun atiyninwanmi’ (2 Corintios 4:7). Sinchi ñakariykunapi tarikuspayqa kallpanchakunim allin kaqkunapi piensarinaypaq. Qosaypa, taytaypa hinaspa wawaypa wañukusqanmi yachachiwarqa kikillaypi mana piensanaypaq aswanqa ñakariqkunata llakipayanaypaq. Hinaspapas Jehová Diosmanmi astawan asuykurqani. Manamá manchakunichu hamuq tiempotaqa yachanipunim hanaq pachapi Dios yanapawananta. Payqa makiymanta hapiwachkanmanpas hinam haykapipas mana kachariwanqachu.

[Willakuy]

[21 kaq paginapi dibujo hinaspa recuadro]

¿IMANASQATAQ MANA CHURACHIKUNIKUCHU?

Uyarirqankipaschá Jehová Diospa testigonkunaqa operachikuspayku yawarta mana churachikusqaykumanta. Ichaqa, ¿yachankichu imanasqa mana churachikusqaykuta?

Bibliapa nisqanta kasukusqaykutam wakin runakunaqa mana entiendenkuchu. Wakinmi piensanku doctorkunawan mana hampichikuy munasqaykuta otaq ninkutaqmi wañuyllapiña piensasqaykutapas. Manamá cheqapchu chayna piensasqankuqa. Jehová Diospa testigonkunaqa munanikum kikiykuta chaynataq familiaykutapas allinta hampiwanankuta. Ichaqa yawarta mana servichikuspalla hampiwanankutam munaniku. ¿Imanasqa?

Diospa qosqan kamachikuyninta kasukuspaykum. Sinchi para pasaruptinmi animalkunapa aychanta mikunankupaq Noeytawan familianta Diosqa nirqa. Ichaqa yawarninta mana mikunankupaqmi kamachirqa (Genesis 9:3, 4). Lliw runapaqmi kay kamachikuyqa Noeymanta miramusqanchikrayku. Chaymantapas Diosqa manamá haykapipas kay kamachikuynintaqa cambiarqachu. Aswanqa Israel nacionmanpas 800 wata qepatam Dios yachachirqa runapa vidanqa yawarninpi kasqanta, chayraykum yawarqa sagrado karqa (Levitico 17:14). 1500 wata qepatam Jesuspa apostolninkunapas cristianokunata kamachirqaku “amam mikunkichikchu yawartaqa”, nispa (Hechos 15:29).

Jehová Diospa testigonkuna yawarta churachikuspaykuqa manach Diospa kamachisqantaqa kasukuchkaymankuchu. Chayraykum munaniku mana yawarniyoq hampikunallawan hampichikuyta. Chaymantapas Bibliapa kamachisqanmi Doctorkunata astawan yanapan mana yawarllawan hampinankupaq. Chaychiki huk runakunapas munanku mana yawarllawan hampichikuytaqa.

[19 kaq paginapi foto]

Qosay Felipewan Saulniypiwan

[19 kaq paginapi foto]

Taytay José hinaspa mamay Soledadpiwan

[20 kaq paginapi foto]

Saulniy huk killa manaraq wañukuchkaspa