Payqa llakipayawanchikmi
Diosman Asuykuychik
Payqa llakipayawanchikmi
“LLAKIPAYAYQA sonqomanta sientiymi.” Kaynatam llakipayaymanta nirqa Jehová Diosta serviq yuyaqyasqaña misionero. Jehová Diosmi sonqomanta ancha llakipayakuqqa. Payqa llakikunmi llaqtan ñakariptin. ¿Imaynatam yachanchik? Kay Pachapi Jesucristo kaspanmi allinta qawachirqa Jehová Diosqa llakipayakuq kasqanta (Juan 5:19). Ejemplopaq; Juan 11:33-35 nisqanmanta yachasun.
Lazaro mozollaraq wañukuptinmi Jesusqa chay amigonpa llaqtankama rirqa. Wañukuqpa paninkuna Martawan Mariañataqmi llumpay llakisqa karqaku. Jesusqa anchatam kay familiataqa kuyarqa, ¿imaynatataq Jesusqa sientikurqa? (Juan 11:5.) Bibliam nin: “Jesusñataqmi Mariapa waqasqantawan kuska hamuq judiokunapa waqasqanta qawaykuspan sonqonpi sinchita llakirikurqa. Chaymi tapurqa: ¿Maypitaq pamparamunkichik? nispa. Paykunañataqmi nirqaku: Señor, hakuchikyá qawaykamunki nispa. Chaymi Jesus waqarqa” (Juan 11:33-35). ¿Imanasqataq waqarqa? Amigon Lazaro wañukusqanraykum, ichaqa Jesusmi kawsarichinan karqa (Juan 11:41-44). Chaymantapas, ¿imapas karqaraqchu llakichinanpaq?
Kaymantayá Bibliapa nisqanta qawasunchik. Jesusmi Mariatawan compañaqninkuna waqaqta ‘qawaykuspan sonqonpi sinchita llakirikurqa’. Griego rimaypi chayna sientisqanmi qawachin tukuy sonqonmantapuni llumpay llakikusqanta. Llumpaytapunim Jesusqa llakikurqa chaykuna pasasqanwan. Sonqonpi llumpayta llakikuptinmi weqen atiparurqa. * Jesusqa hukkunapa ñakarisqanwanmá llakikurqa. ¿Qampas waqarqankichu kuyasqa amistadniki waqaqta qawaspa? (Romanos 12:15.)
Jesus llakipayakuq kasqanmi yanapawanchik Taytan Jehová Diospa sumaq kayninkunata entiendenanchikpaq. Jesusqa allintapunim Taytanpa sumaq kayninta qawachirqa chaymi nirqa: “Ñoqata rikuqniyqa Taytatapas rikuykunñam” nispa (Juan 14:9). ‘Jesuspa waqasqanmanta’ leespaqa musyanchikmi Jehová Diosqa serviqninkunapa ñakarisqanmanta sonqonpi sientesqanta. Chaynatamá Bibliapi wakin qellqaqkunapas Jehová Diosmanta nirqaku (Isaias 63:9; Zacarias 2:8). ¡Mayna llakipayakuqmá Jehová Diosqa!
Anchuykunapaqmi sonqomanta llakipayakuqqa. Llakiwan hukmanyasqa kaspanchikqa llakipayawaqninchikmanmi anchuykunchik. Astawanmá llakipayakuq Jehová Diosmanqa asuykuchwan ñakarisqanchikta hinaspa imamanta waqasqanchikta entiendewasqanchikrayku (Salmo 56:8).
[Willakuy]
^ par. 6 Griego rimaypiqa “waqarqam” nispanqa “sonqollanpi waqasqanmantam” nichkan Mariapa waqasqanmantañataqmi nin “uyarinapaq hina waqasqanmanta”.