¿Ima suyakuytaq kan hamuq tiempopaq?
¿Ima suyakuytaq kan hamuq tiempopaq?
IMANASQATAQ ALLINPUNI KAYMANTA YACHAYQA. Kay tiempopi runakunapa imayna kawsasqanmi qawachin hamuq tiempopi imayna kanankuta. Piensarisun, mana suyakuyniyoq runaqa ninmanpaschá: ‘Mikukusun, tomakusun, ichapas paqarinqa wañukusunpas’ nispa (1 Corintios 15:32). Chaynata piensaspankuqa llumpaytapaschá afanakunku mikukuyllapi, tomakuyllapi chaykunawanqa manataqmi tarinkuchu hawkayayta aswanqa ñakariyllatam.
Sichum runakunapa rurasqanpi confiakuspaqa hamuq tiempopaq mana suyakuyniyoqchá kachwan. Kay pachapi wayrata, yakuta chaynataq allpatapas llumpa-llumpaytam qachachachkanku. Chaymantapas manchakuypaqtaqmi arma nuclear nisqankuwan guerrakuna qallaykunanmanta willakusqanku chaynataq terroristakunapa daño rurasqankunapas. Chaynallataqmi onqoykuna hinaspa wakchayaypas ñakarichin allpantinpi wara-waranqantin runakunata. Chayna kaptinpas kanmi suyakuyqa.
Runakunaqa manam yachachwanchu hamuq tiempomantaqa, ichaqa Jehová Diosmi kaynata nin: “Hamuq tiempokunapi sucedenanmantam willakuni. Manaraq sucedeqkunatam ñawpaqmantapuni willakuni” nispa (Isaias 46:10). Chaynaqa, ¿imanintaq Jehová Diosqa hamuq tiempomanta?
¿Imanintaq Bibliaqa?
Jehová Diosqa manachá deqanqachu kay pachata nitaq lliw kawsaqtaq purmachinankuta. Bibliaqa yachachinpunim Jehová Diosqa ‘Kay pacha chinkachiqkunata chinkachinanmanta’ (Apocalipsis 11:18). Hanaq pachamanta Gobiernonwanmi Jehová Diosqa chinkachinqa kay Allpapi tukuy mana allinkunata hinaspa qallariypi unanchasqanman hinam ruranqa (Genesis 1:26-31; 2:8, 9; Mateo 6:9, 10). Bibliamanta textokunam qatiqnin parrafokunapi willawasunchik hamuq tiempomanta hinaspa runakunata imam pasananmantapas.
Salmo 46:8, 9: “Hamuspayá qawaychik Tayta Diospa imam rurasqankunata. Hamuspayá qawaychik kay pachapi imam purmachisqankunata. Guerrakunatam payqa tanirachin. Kay pachapa cantonkamam tanirachin. Flechana arcokunatam pakiparun. Peleana lanzakunatam pakiparun. Guerrapaq carretakunatam kañarun.”
Isaias 35:5, 6: “Ñawsakunam qawarikunqa. Hinaptinqa mana uyariqkunam uyarikunqa. Wistukunam luwichu hinaraq pawaykachanqaku. Upakunam sumaqllataña qaparinqaku. Chunniqpim yakukuna toqyanqa. Chaki allpakunapim mayukuna kallpanqa.”
Isaias 65:21, 22: “Wasikunatam hatarichinqaku hinaspam chaypi yachanqaku. Uvas huertakunatam plantanqaku hinaspam rurunta mikunqaku. Wasikunatam hatarichinqaku ichaqa manam sapaq runakuna yachananpaqñachu. Uvas huertakunatam plantanqaku ichaqa manam sapaq runakuna rurun mikunanpaqñachu”.
Daniel 2:44: ‘Hanaq Pachapi Diosmi hatarichinqa mana tuñichiy atina gobiernota, chay gobiernoqa huk runamanqa manam qosqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq.’
Juan 5:28, 29: “Huk punchawmi Diospa Churinpa qayasqanta uyarispanku llapallan wañuqkuna kawsarimunqaku”.
Apocalipsis 21:3, 4: “Diosñataqmi kanqa paykunapa Diosnin. Diosmi pichanqa paykunapa weqenta, manañam kanqachu wañuypas, lutokuypas, waqaypas nitaq nanaypas. Ñawpaq kaqkunaqa pasarunñam”.
Imanasqataq Bibliamanta yachasqanchikqa sonqonchikta hawkayachin
Tukuy kay nisqankunaqa manapaschá creenapaq hinachu kanman. Ichaqa Diospunim prometen manam runachu. Jehová Diosqa “mana llullakuq Diosmi” (Tito 1:2).
Diospa promesanpi confiaspaykiqa chaynataq kamachisqanman hina kawsaspaykiqa sonqoykipi hawkayaytam tarinki mayna sasachakuypi kaspaykipas. Manam guerrapas, wakcha kaypas, onqoypas nitaq machuyaypi sasachakuykunapas otaq wañuypi piensaypas sonqonchikpi hawkayayninchiktaqa chinkachinqachu. ¿Imanasqa? Segurom kachkanchik Diospa Gobiernollan tukuy mana allinkunata allichananmanta.
¿Imatataq rurawaq chayna suyakuyniyoq kanaykipaq? ‘Imam piensasqaykita allinmanña tikraspa’ chaynataq ‘Diospaq imam allin rurayta, imam agradonpaq kasqanta hinaspa imam allinpuni kasqanta’ ruraspam (Romanos 12:2). Astawanraqpaschá munanki Bibliapi Diospa promesankunaqa confiakunapaq kasqanmanta yachayta, chaymanta yachayqa allimpunim. Manachá sonqoykipi kayna hawkayaytaqa imapas qosunkimanchu.
[3 hinaspa 4 kaq paginakunapi dibujokuna]
¿Imanintaq Diospa Palabranqa hamuq tiempomanta?