¿Haykapikamataq sumaq willakuyta willakusun?

Jesusmi nirqa: “Diospa gobiernonmanta kay sumaq willakuymi willakusqa kanqa enterollan kay pachapi llapallan nacionpi runakuna yachanankupaq, chayñam tukuy mana allinkunaqa tukunqa”, nispa (Mat. 24:14). Mateo 24:​6, 13, 14 versiculokunapi ‘tukupay’ hinaspa ‘tukunqa’ nisqantam griego rimaypiqa télos nin. Chay ninanqa imapapas qalaypaq utaq wiñaypaq tukusqan ninanmi. Jesusqa rimachkarqa satanaspa munaychakusqan tukuy mana allinkuna Armagedon punchawpi qalaypaq chinkachisqa kananmantam (Apoc. 16:​14, 16). Chaynaqa, Diosmantaqa willakusunchik Armagedon qallaykunan hichpakamam. Chaytam kunanqa allintaña entiendenchik.

Kunankamam entienderqanchik llumpa-llumpay ñakariy punchawkunapi pantay religionkuna chinkachisqa kaptin sumaq willakuyta manaña willakunanchikta (Apoc. 17:​3, 5, 15, 16). Piensarqanchikmi chay tiempopi ‘Jehova Diospa llakipayanan wata’ tukunanta. Chaymi nirqanchik chaymanta qipamanqa runakuna salvakunankupaq tiempota Dios manaña qunanta (Is. 61:2). Piensarqanchiktaqmi llumpa-llumpay ñakariy punchawkuna qallaykunankama Diosman sunqu kaqkunalla salvakunankutapas. Paykunatam tupachirqanchik 607 watapi (J.t.ñ.) Jerusalen manaraq chinkachisqa kachkaptin salvakunankupaq marcasqa judiokunawan. Chay judiokunaqa marcasqa karqaku Diosta servisqankuraykum hinaspa mana allinkunata chiqnisqankuraykum (Ezeq. 5:11; 9:4). Ichaqa manamá ñawpaqta chayna nisqanchikqa tupanchu Mateo 24:14 nisqanwanqa. Chay textopa nisqanman hinaqa yaqachusmi runamasinchikkunaqa tukuy mana allinkuna tukunan punchaw hichpakama willakusqanchikta chaskikunqakuraq.

Mateo 24:14 nisqanta allintaña entiendesqanchikraykum Apocalipsis 16:21 nisqanta entiendesqanchiktapas cambiana. Chayta astawan entiendenapaqyá rimarisun sumaq willakuykunata runakuna imayna chaskinankumanta Pablopa nisqanmanta. Paymi nirqa salvakunankupaq kaqkunapaqqa sumaq willakuyqa ‘kawsay qukuq miski asnay hina kasqanmanta’. Nirqataqmi Diospa enemigonkunapaqqa ‘wañuchiq asnay hina’ kaptin mana uyariyta munasqankumantapas (2 Cor. 2:​15, 16). Uyariytaqa mana munankuchu satanaspa munayninta ruwasqankuta hinaspa mana allinkunata ruwasqankurayku chinkachisqa kanankumanta willaptinchikmi (Juan 7:7; 1 Juan 2:17; 5:19).

Apocalipsis 16:21 nisqanpim riman llumpay llasaq runtu paramanta. Yaqachusmi chaywanqa nichkan ‘llumpa-llumpay ñakariy punchawkunapi Diosmanta willakusqanchikqa runakunata astawanraq piñachinanmanta’. Chaypimá Diospa sutinqa astawanraq riqsichisqa kanqa (Ezeq. 39:7). ¿Yaqachu chay tiempopiqa willakusqanchik “miskillaña asnariq hina” kasqanrayku pillapas chaskikunqaraq? Yaqachusmi. Pantay religionkuna chinkachisqaña kaptinqa ichapas yuyarinqaku utaq yachanqaku testigokunaqa chaymanta unayña willakusqanchikta.

Yaqa chaynam pasarqa Egipto nacionpi yupaychasqanku dioskunata Jehova Dios castigaruptin. ‘Huk kasta achkallaña runakunam’ Israel runakunaman hukllawakuspanku paykunawan lluqsirqaku (Ex. 12:​12, 37, 38). Yaqachusmi chay runakunaqa Moisespa willakusqan chunka castigokunapa cumplikusqanta qawaspanku Jehova Diosta yupaychaytaña munarqaku.

Pantay religionkuna chinkachisqa kasqan qipata pipas Jehova Diosta yupaychananpaqqa Jesuspa wawqinkunamanta allpapiraq kaqkunatam yanapayta atinman, chaynapi salvasqa kananpaq (Mat. 25:​34-36, 40). Hanaq pachapaq kaqkunataqa yanapayta atinqaku Armagedon hichpakamallam, chaymantaqa manañam. ¿Imanasqa? Armagedon qallaykunanpaqqa manañam kay pachapiñachu kanqaku.

Armagedon hichpakama willakunanchikmanta allintaña entienderuspanchikmi astawanraq admirakunchik Jehova Diospa kuyakuq hinaspa llakipayakuq kasqanmanta. Payqa manamá mayqanninchikpas chinkarunanchiktaqa munanchu (2 Ped. 3:9).