Ashca runauna cai pasashcamanda yapa turmindarishcaraigu cai tapuigunara tapurinun, mana intindingajlla maspas cushiyanara charina munanun. Shujcuna quirinun judioguna pasashcara yapa manali an, paigunaj shinzhi an intindingaj imarasha Yaya Dios cai turmindachina tiachu saquishca.

 Panda iyai: Imarasha Yaya Dios cai turmindachina tiachu saquishca nisha tapuringaj ucha an.

 Sirtu yachachina: Maican Diosta ali sirvijcuna tapurinushca imarasha Dios manalira tiachu saquishca. Profeta Habacuc Diosta tapuca: “¿Imarashara manali ranara ricuchihuangui, llaquiunara ricushalla saquingui?” (Habacuc 1:3). Habacuc cai tapuira Diosta rurashcai paita piñana randimanda Bibliai quillcachu saquica tucuiguna caimanda yachasha valiringaj.

 Panda iyai: Dios runauna llaquiriushcara ricusha mana llaquirinzhu.

 Sirtu yachachina: Dios llaquiunara manaliras chijninmi (Proverbios 6:16-19). Biblia nin Noé punzhaunai, runauna manali rashcaunahua cai allpa undajta tiashcara Yaya Dios ricusha, “paihua shungüi yapa llaquirica” (Génesis 6:5, 6). Chita ricuchin judiogunara turmindachinujpi, huanchinujpi Yaya Dios yapa llaquirica (Malaquías 3:6).

 Panda iyai: Yaya Dios cai turmindachinahua judiogunara libachingaj munaca.

 Sirtu yachachina: Setenta huatai, Yaya Dios saquica romano runauna Jerusalén llactara tucuchinuchu (Mateo 23:37–24:2). Chi pasashca huasha Yaya Dios mana shu llactamandalla runaunara libachishca, shinallara mana bendiciashca shuj llactamanda mas valij ashcara quirishcamanda. Astaun pai “mana chican chicanzhu judiogunahua griegogunahua” (Romanos 10:12, Mushuj pactachina shimi).

 Panda iyai: Shu tucui ushaira charij, llaquij Dios sirtu tiajpi mana saquinmachu aca judiogunara turmindachinuchu.

 Sirtu yachachina: Yaya Dios llaquiunara mana cachanzhu, shinajpi maican huras shu timpumanda tiachu saquin (Santiago 1:13; 5:11).

 Paillara tucui mandana dirichu charishcara ricuchingaj ashca huataunamanda turmindusgunara tiachu saquishca. Ashca runauna quirinun Yaya Dios intiru mundura mandaushcara, shinajpi Biblia pitijta ricuchin cai mundura Supai mandaun (Lucas 4:1, 2, 6; Juan 12:31). Ishqui Bibliamanda yachachishcaunara ricushun intindingaj imarasha Yaya Dios judiogunara turmindachinuchu saquishca.

1.   Runauna manalira rurangaj ajllanushca. Yaya Dios punda runa Adán Evaras nica ima rurana ashcara, shinajpi paita casungaj mana ursachicachu. Diosta casuna randimanda paigunalla ajllanuca ima ali ashcara ima mana ali ashcaras. Shinajpi cai manali ajllashcara apishcamanda ashca llaquiunara charinuca (Génesis 2:17; 3:6; Romanos 5:12). Chi hurasmanda, intiru mundui runauna manali ajllashcamanda ashca llaquirinuca. Statement of Principles of Conservative Judaism (Declaración de principios del judaísmo conservador) nishca libro nin: “Alira manalira ajllangaj Dios ñucanchima cushcara manali utilizashcamanda intiru mundui ashca llaquiunara charinchi”. Shinajpi Yaya Dios runaunara saquishca alira o manalira rurangaj ajllasha catinuchu, shina rurasha timpura cushca runauna riparanuchu paihua mandanara mana catisha ali causai charina ushashcara o mana ushashcara.

2.   Yaya Dios paihua atun ushaihua cai turmindachina llaquiunara tucuchingami. Shu pactachina shimira cushca cai turmindachinamanda huañushcaunara, shuj ashca huaranga huañushcaunaras causachingaj. Cai llaquichinamanda llaqui iyarishcauna, sintishcaunaras tucuchingami (Isaías 65:17; Hechos 24:15). Yaya Dios runaunara llaquishcamanda tucui shunguhua quirina ushanchi pai cushca rimashcaunara pactachingami (Juan 3:16).

 Cai turmindachinamanda ashca llaquirij runauna Diospi quirinara, cushi causairas charina ushanushca. ¿Imara yanapaca? Paigunara intindina yanapashca imarasha Yaya Dios llaquiunara mana aliras tiachu saquishca, shinallara imara ruranga tucui cai llaquiunara tucuchingaj.