¿Shamuj punllacunapica ima shinataj causashun?
¿Shamuj punllacunapi ima tucunata yuyashcanguichu? Bibliapica shamuj punllacunapi ima tucunatami huillan. Chaica ñucanchij causaihuanmi ricunata charin.
Diospaj gobierno chayamucushcata yachangapajca imalla tiyana cashcatami Jesusca huillarca (Lucas 21:31). Chai punllacunapica guerracuna, terremotocuna, yaricaicuna, yallitaj millai ungüicunami tiyanga nircami. Tucui chaicunami ña pajtaricun (Lucas 21:10-17).
Bibliapica gobiernocunapaj mandana ñalla tucurigrijpica achca gentecunami millaicuna tucunga ninmi. Caitaca 2 Timoteo 3:1-5-pimi liyi tucungui. Cai versocunata liyishpaca cunan punllacunapi ima shina gentecuna cashcata, imata rurajcuna cashcatami ricunchij. Canpish cai laya millai gentecunatami ricushcangui ¿nachu?
¿Cashna laya gentecuna tiyashcamantaca imataj ñalla tucunga? Jesús cai Allpa pachata mandashpaca achca cambiocunatami ruranga. Chashnami sumaj causaita apamunga (Lucas 21:36). Bibliapica Yayitu Diosca cai Allpapi causaj gentecunamanta allicunatami ruranga ninmi. ¿Chai allicunaca maijantaj can?
ALLI GOBIERNOTAMI CHARISHUN
DANIEL 7:14-pica: Yaya Diosca Jesusmanca “mandai tucunata, jatun nishca canata, mandanatami curca. Tucui gentecuna, llajtacuna, chꞌican chꞌican rimaita rimajcuna paipajta rurachunmi chashna rurarca. Pai mandaj canaca huiñaita mandaj canami. Manataj tucuringachu. Pai mandanallatami pi mana chingachishca canga” ninmi.
¿Cai versopica imatataj nicun? Yaya Diosca shuj gobiernotami churashca. Chai gobiernopica Jesusmi mandanga. Jesusca cai Allpapi tiyaj mandajcuna shinaca mana cangachu. Chaimantami cushilla causashun.
MANA UNGUSHUNCHU
ISAÍAS 33:24-pica: ‘Caipi causajcunaca, ungushcami cani nishpa pi mana ningacunachu’ ninmi.
¿Cai versopica imatataj nicun? Tucui laya ungüicuna tucurinatami nicun. Chai punllacunapica huiñai huiñaitami causashun.
SUMAJTAMI CAUSASHUN
SALMO 46:9-pica: “Paica tucui cai pacha macanacuicunata tucuchijmi” ninmi.
¿Cai versopica imatataj nicun? Tucui macanacuicuna tucurinatami nicun. Chaimantami sumajta causashun.
CAI ALLPAPICA ALLI GENTECUNALLAMI CAUSANGA
SALMO 37:10, 11-pica: ‘Millaicunaca ñallami mana tiyanga. Alli shungucunami, Dios cusha nishca Allpataca japingacuna’ ninmi.
¿Cai versopica imatataj nicun? Millai gentecuna chingarinatami nicun. Diosta cazuj gentecunallami tiyanga.
CAI ALLPACA SHUJ PARAISOMI TUCUNGA
ISAÍAS 65:21, 22-pica: “Huasicunatami shayachingacuna. Chaipimi causangacuna. Uvacunatami tarpungacuna. Chaipi pꞌucushcacunatami micungacuna” ninmi.
¿Cai versopica imatataj nicun? Cai Allpa shuj paraíso tucunatami nicun. Chaipimi, cai pachapipish cambaj munaita rurahuai nishca mañaitaca Yaya Diosca pajtachinga (Mateo 6:10).
Puede que también le interese
BIBLIAMANTA TAPUICUNA
¿Diospaj gobiernoca imatataj ruranga?
¿Diospaj gobiernoca cai Allpata mandai callarijpica ima shinataj causashun?
