Ima tiyashcata ricui

Ima tiyashcata ricui

Jehová Diospajllami canchij

Jehová Diospajllami canchij

“Mandaj Diosmi ñucanchij Diosca nij llajtaca cushichishcami. Mandaj Diosca paicunataca paipajlla cachunmi chˈicanchirca” (SALMO 33:12).

CANTOCUNA: 40, 50

1. ¿Imamantataj tucuimi Diospaj can ninchij? (Jahuapi tiyaj fotota ricui).

BIBLIAPICA: “Jahua pachapish, jahua pachamanta ashtahuan jahuaman caj jahua pachapish, cai pachapish chaipi tucui imalla tiyajcunapish” Mandaj Diospajmi can ninmi (Deuteronomio 10:14; Apocalipsis 4:11). Ñucanchijtapish Jehová Diosmi rurarca. Chaimantami paipaj canchij (Salmo 100:3). Shinapish huatacuna pasajpica huaquin gentecunallatami Diosca paipajlla cachun agllashca.

2. ¿Bibliapi nishca shinaca Diosca picunatataj paipajlla cachun agllashca?

2 Salmo 135-pica ñaupa punllacunapi Diosta sirvij israelitacunaca paipajllami carcacuna ninmi (Salmo 135:4). Oseas libropica huaquin mana israelitacunapish Diospaj pueblomi tucunga nircami (Oseas 2:23). Cai profeciaca mana israelitacunatapish jahua pachapi Jesushuan mandachun Dios agllai callarijpimi pajtarirca (Hechos 10:45; Romanos 9:23-26). Jesushuan mandangapaj Diospaj espirituhuan agllashcacunaca  “jucha illaj llajta” nishcami can. Paicunaca Diospajllami can (1 Pedro 2:9, 10). Cunan punllacunapipish cai Allpapi causagrijcunataca Diosca ñuca pueblo, ‘ñuca agllashcacunami’ can ninmi (Isaías 65:22).

3. a) ¿Cunan punllacunapica picunataj Diospaj pueblopica shuj shinalla sirvicuncuna? b) ¿Cai yachaipica imatataj ricushun?

3 Jahua pachapi causagrijcunataca ‘ashalla ovejacuna’ nishpami rijsinchij. Cutin cai Allpapi causagrijcunataca ‘shujtaj ovejacuna’ nishpami rijsinchij. Paicunaca shuj shinallami Diosta sirvicuncuna (Lucas 12:32; Juan 10:16). Jehová Dios paipaj pueblo ucupi cachun saquishcamanta, paipaj amigo cachun saquishcamantami paitaca shungumanta agradicisha ninchij. Cai yachaipica ima shina chaita ricuchi pudishcatami yachashun.

ÑUCANCHIJ CAUSAITAMI DIOSMAN MINGANCHIJ

4. a) ¿Ima shinataj Diosta agradicishcataca ricuchinchij? b) ¿Jesuspish imatataj ricuchirca?

4 Diosman tucui shunguhuan mingarishpami paita agradicishcata ricuchinchij. Shinallataj bautizarishpami paipajlla cashcata, paita cazusha nishcatapish ricuchinchij (Hebreos 12:9). Jesús bautizarishpapish: “Ñuca Dioslla, ñuca cushicunaca quiquinpaj munaita ruranami” nicushca layami carca (Salmo 40:7, 8). Jesusca Diospaj pueblo ucupi huacharishca cashpapish Diospaj munaita rurasha nishcatami ricuchirca.

5, 6. a) ¿Jesús bautizarijpica Jehová Diosca ima shinataj sintirirca? b) ¿Jehová Diosca paillata sirvinata agllajpica ima shinataj sintiringa? Shuj ejemplohuan parlai.

5 ¿Jesús bautizarijpica Diosca ima shinataj sintirirca? Bibliapica: “Jesusca ña paita bautizajpi yacumanta llujshishcahuanmi, jahua pacha pascarijpi Taita Diospaj Espirituca paloma shina shamushpa paipaj jahuapi tiyarijta ricurca. Jahua pachamantaca: ‘Caimi ñuca cˈuyashca Churi. Paipimi cushicuni’ nishpa rimashcami uyarirca” ninmi (Mateo 3:16, 17). Jesusca siempremi Diospajlla cashca. Shinapish paica tucui shunguhuanmi Diosllata sirvishpa causanata munarca. Chaita ricushpami Diosca cushicurca. Ñucanchijpish paiman mingarijpica Diosca cushillami sintiringa. Shinallataj achcatami bendicianga (Salmo 149:4).

6 Ñucanchij Diosman mingarijpi pai ima shina sintirishcata shuj ejemplohuan yachashun. Shuj runa sumaj sisacunata paipaj jardinpi plantacujta yuyai. Shuj punllaca paipaj ushushimi shuj sisata pˈitishpa paiman cumbidan. Tucui sisacunaca yayapajmi can. Shinapish cˈuyaimanta paipaj ushushi shuj sisata cujpimi yayaca cushilla sintiringa. Yayapajca chai sisami tucuimanta yalli sumaj ricuringa. Chai shinallatajmi ñucanchij tucui causaipi paillata sirvinata agllajpica Diosca cushilla sintiringa (Éxodo 34:14).

7. ¿Malaquías libropi nishca shinaca paita tucui shunguhuan sirvijcunataca ima shinataj Diosca ricun?

7 (Malaquías 3:16-ta leyipai). ¿Imamantataj Diosman mingarina, bautizarinaca importante can? Causai callarishcamantami ñucanchijca Diospaj canchij. Shinapish pailla ñucanchijta Mandaj cashcata ricuchishpa paiman mingarijpica Diosca cushillami sintiringa (Proverbios 23:15). Diosca paita tucui shunguhuan  sirvijcunataca allimi rijsin. Chaimantami paicunapaj shuticunataca “paipaj libropi” quillcan.

8, 9. Jehová Diosca paipaj libropi cajcunataca ¿imata rurachuntaj mañan?

8 Jehová Dios ñucanchij shuticunata paipaj libromanta ama pˈichachunca ¿imatataj rurana canchij? Malaquiasca Jehová Diosta manchashpa, paita yuyarishpami causana canchij nircami. Shujtaj cosascunata adorajpi o gentecunata diosta shina ricujpica Jehová Diosca huiñaita causanapaj libromantami ñucanchij shutitaca anchuchinga (Éxodo 32:33; Apocalipsis 3: 5).

Tucui punllacunami ñucanchij ruraicunahuan Diosta cazushcata ricuchina canchij

9 Shuj cutinllami Diostaca cambaj munaitami ruragrini nishpa bautizarinchij. Pero mana chaita rurashpallachu saquirina canchij. Tucui punllacunami ñucanchij ruraicunahuan Diosta cazushcata ricuchina canchij. Chashnami paipaj lado cashcata, paita sirvijcuna cashcata ricuchishun (1 Pedro 4:1, 2).

CAI MUNDOPAJ RURAICUNATA AMA CATISHUNCHIJ

10. Diosta tucui shunguhuan sirvijcunaca ¿imatataj rurana canchij?

10 Ñaupa yachaipica Cainmanta, Salomonmanta, israelitacunamantami yacharcanchij. Paicunaca Diosta adoranchijmi nishpapish Diosta tucui shunguhuan cazushcataca mana ricuchircacunachu. Ñucanchijpish Diostami adoranchij nishpallaca mana saquirinachu canchij. Ashtahuanpish allicunata rurashpami millaitaca pˈiñana canchij (Romanos 12:9). Jehová Diosca cashcata rurajtapish, millaita rurajtapish, ‘Diosta sirvijtapish, Diosta mana sirvijtapish yachaj chayanguichijmi’ nircami (Malaquías 3:18).

11. ¿Diosta sirvijcuna cashcamantaca imatataj ricuchisha ninchij?

11 Jehová Dios ñucanchijta paipaj pueblopi cachun agllashcamantami diosolopagui ninchij. Ñucanchijcuna Diosta alli sirvicushcataca shujtajcunaca jahuallami ricuna can (Mateo 5:16; 1 Timoteo 4:15). Chaimanta, “¿Diosta tucui shunguhuan sirvicushcatachu ricuchini? ¿Testigo de Jehová cashcataca mana manchashpachu shujtajcunaman huillani?” nishpami tapurina canchij. Jehová Dios ñucanchijta agllashca jahua paita sirvij cashcata huillanata pinganayachijpica llaquillami sintiringa (Salmo 119:46; Marcos 8:38-ta leyipai).

¿Ñucanchij ruraicunaca Diosta sirvijcuna cashcatachu ricuchin? (Párrafo 12 y 13-ta ricui).

12, 13. ¿Imamantataj huaquin testigocunaca Diosta sirvijcuna cashcata mana ricuchincuna?

12 Huaquin testigocunaca cai pachapaj espirituta o ruraicunatami catincuna. Chaimantami Diosta mana sirvijcunamanta chˈican cashcataca mana ricuchincuna (1 Corintios 2:12). Cai pachapaj espirituta catijcunaca paicunapaj munaicunallapimi yuyancuna (Efesios 2:3). Por ejemplo, alli churarinamanta consejocunata cushca jahuami huaquincunaca maipish cachun churarincuna. Maijancunaca pegaricuj  ropacunata o aliriyacuj ropacunatami churarincuna. Tandanacuicunamanpish chashna churarishcami rincuna. Shujtajcunaca ajchatapish maipish cachunmi rurarincuna (1 Timoteo 2:9, 10). Chaimantami Diosta sirvijcuna cashcata o mana sirvijcuna cashcata ricunaca shujtajcunapajca mana fácil canga (Santiago 4:4).

13 Cutin shujtaj testigocunaca shujtaj ruraicunahuanmi cai mundopaj espirituta saquishpa Diosta alli sirvijcuna cashcataca mana ricuchincuna. Por ejemplo, fiestacunaman rishpaca pinganayajtami bailancuna. Mana alli fotocunata, mana alli comentariocunatapishmi internetpi churancuna. Paicunaca ima mana jatun juchata rurashcamantami disciplinata mana chasquishcangacuna. Shinapish Diosta alli sirvingapaj esforzaricujcunapajmi mana alli ejemplo can (1 Pedro 2:11, 12-ta leyipai).

Shujtajcuna mana Diospaj lado cashcata ricuchijpipish ama paicuna shina cashunchij.

14. ¿Diospaj amigo cashpa catingapajca imatataj rurana canchij?

14 Cai mundoca aicha munaicunallapi, ñahui ricushca munaicunallapi, charinacunallapi yuyachunmi munan (1 Juan 2:16). Pero ñucanchijca Diospajllami canchij. Chaimantami ‘millai munaicunata’ saquishpa, ‘alli yuyaihuan cashcata rurashpa, Diosllata sirvishpa’ causana canchij (Tito 2:12). Ñucanchijca rimanapi, micunapi, ubyanapi, churanapi, trabajanapipish Diosta alli sirvijcuna cashcatami siempre ricuchina canchij (1 Corintios 10:31, 32-ta leyipai).

CAISHUJ CHAISHUJ CˈUYAITA RICUCHISHUNCHIJ

15. ¿Imamantataj huauqui panicunataca cˈuyaihuan tratana canchij?

15 Jehová ñucanchijta paipaj amigo cachun saquishcamantaca huauqui panicunata  alli tratashpami agradecidos cashcata ricuchina canchij. Paicunapishmi Diospajlla cancuna. Caita yuyaipi charishpaca huauqui panicunataca siempremi cˈuyaihuan tratashun (1 Tesalonicenses 5:15). Jesusca paita catijcunataca: “Caishuj chaishuj cˈuyanacujpimi, cancunataca ñuca yachacujcunataj cashcata tucuicuna rijsingacuna” nircami (Juan 13:35).

16. ¿Yaya Diosca ima shinataj paita sirvijcunataca cuidan? Shuj ejemplohuan parlai.

16 Huauqui panicunata ima shina tratana cashcata alli intindingapajca shuj ejemplota ricushun. Diospaj huasipi tiyaj uchilla cosascunataca Jehová Diosta adorangapajllami utilizajcuna carca. Moisesman cushca leypimi chaicunata ima shina cuidanataca huillacurca. Maijan chaita mana pajtachishpaca huañunami carca (Números 1:50, 51). Jehová Diosca paita adoranapaj rurashca chai uchilla cosascunatami alli cuidarca. ¿Manachu paita shungumanta sirvijcunatacarin alli cuidanga? Shuj cutinpi Yaya Diosca paipaj pueblotaca: ‘Maijanpish cancunata llaquichishpaca, ñuca ñahui ricucujta tujsicuj shinami llaquichicun’ nircami (Zacarías 2:8).

Ñucanchij perdonajcuna, llaquij, cˈuyaj cajpica Diosca mana cungaringachu

17. ¿Jehová Diosca imatataj ricuracun?

17 Malaquías libropica Jehová Diosca paita sirvijcuna parlanacucujpica tucuitami uyan ninmi (Malaquías 3:16). Yaya Diosca “paipaj cajcunataca rijsinmi” (2 Timoteo 2:19). Tucui ima nishcata, tucui ima rurashcataca paica allimi yachan (Hebreos 4:13). Huauqui panicunahuan mana cˈuyaj, mana llaquij cajtaca Diosca ricucunmi. Pero ñucanchij perdonajcuna, llaquij, cˈuyaj cajpica paica mana cungaringachu (Hebreos 13:16; 1 Pedro 4:8, 9).

 “DIOSCA PAIPAJ CAJCUNATACA MANATAJ SHITANGACHU”

18. Paipaj pueblopi cachun saquishcamantaca ¿ima shinataj Diostaca agradici pudinchij?

18 Diostaca paipaj pueblopi cachun saquishcamantami tucui shunguhuan agradicisha ninchij. Paiman mingarinami tucuimanta yalli alli decisión cashca. “Mana alli shungu, millai runacunapaj” chaupipi causacushpapish ‘mapa illaj, pi mana juchachipaj alli shungumi’ casha ninchij. Paicunapaj chaupipica ‘cai pachapi achijyachicuj luz shinami’ casha ninchij (Filipenses 2:15). Millai cosascunataca manataj rurasha ninchijchu (Santiago 4:7). Cutin ñucanchij huauqui panicunataca Diospajlla cashcamantami cˈuyashcata, respetashca ricuchinchij (Romanos 12:10).

19. ¿Diosca paipajlla cajcunamanca ima bendiciontataj cushca?

19 Bibliapica: “Mandaj Diosca, paipaj cajcunataca manataj shitangachu” ninmi (Salmo 94:14). Ñucanchij ima tucujpipish Diosca manataj saquingachu. Huañujpipish manataj cungaringachu (Romanos 8:38, 39). “Causacushpapish, Jehová Diospajmi causacunchij, huañushpapish Jehová Diospajmi huañushun. Chaimanta causacushpapish, huañushpapish Jehová Diospajmi canchij” (Romanos 14:8, NM). Yaya Dios paipaj huañushca alli amigocunata cutin causachichunmi shuyacunchij (Mateo 22:32). Shinapish cunan punllacunapimi ña sumaj bendicioncunata chasquishcanchij. Bibliapica: “Mandaj Diosmi ñucanchij Diosca nij llajtaca cushichishcami. Mandaj Diosca paicunataca paipajlla cachunmi chˈicanchirca” ninmi (Salmo 33:12).