Ima tiyashcata ricui

Ima tiyashcata ricui

¿Maipitaj ñucanchij ñahuitaca churacunchij?

¿Maipitaj ñucanchij ñahuitaca churacunchij?

“Jahua pachapi caj quiquintami huichilla ricuni” (SALMO 123:1).

CANTOCUNA: 143, 124

1, 2. ¿Jehová Diospaj ñahuita ricuranaca imataj can?

‘LLAQUI punllacunapimi’ causacunchij (2 Timoteo 3:1). Casilla causaita Jehová Dios apamungacamami llaquicunaca ashtahuan mirarishpa catinga. Chaita yachashpaca “¿pitataj ricuranchij? ¿Ñucanchij causaitaca pi pushachuntaj saquicunchij?” nishpami tapurina canchij. Pero ñucanchijca “Jehovami” ayudanga ninchijmi. Chaica ciertomi can.

2 ¿Jehová Diosta ricuranaca imataj can? ¿Punllanta llaquicunata chˈimbapuracushpapish ima shinataj Diosta ricuracushcataca ricuchinchij? Salmota quillcaj shuj runaca llaquicunata chˈimbapuracushpaca Diosta ricurana imamanta importante cashcatami nirca (Salmo 123:1-4-ta leyipai). Paica Diosta ricuranataca shuj sirvij runa paipaj amota ricurajhuanmi chˈimbapurarca. Sirvijca amopaj maquitami siempre chaparaj carca. ¿Chaica imatataj nisha nin? Amo paita cuidanata, paiman caranatami tucui shunguhuan crij carca. Shinallataj sirvijca amota ricurashpami pai ima  munashcata yachaj carca. Chashnami amopaj munashcata rurashpa cushichij carca. Ñucanchijpish Diospaj munai maijan cashcata yachangapajca Bibliatami cada punlla estudiana canchij. Qˈuipaca imata yachashcatami pajtachina canchij. Chaita rurajllapimi Diosca ñucanchijta ayudanga (Romanos 12:2).

3. ¿Imamantataj Diosta ricuranataca saqui tucunchij?

3 Punllata Diosta ricurana cashcata yachashpapish maipica paita ricuranatami saqui tucunchij. Por ejemplo, Martapi yuyashun. Paica ‘huasi ucupi caita chaita rurana yuyailla cashpami’ Jesús yachachishcata uyanataca saquirca (Lucas 10:40-42). Diosta alli sirvij Martaca Jesushuan cashca jahuapish chashnami tucurca. Ñucanchijpish pai layallatajmi pandari tucunchij. Shinaca ¿imataj Diosta ricuranataca saquichi tucun? Cai yachaipica shujtajcunapaj ruraicuna Diosmanta caruyachi tucushcatami ricushun. Shinallataj Diosta ricurashpa catingapaj imata rurana cashcatami yachashun.

DIOSTA ALLI SIRVIJ RUNACA ¿IMATATAJ CHINGACHIRCA?

4. Dios cusha nishca llajtaman Moisés mana yaicushcamantaca ¿imamantataj mancharinchij?

4 Moisesca paipaj causaita Jehová Dios pushachunmi saquirca. Chaimantami ‘paica mana ricuipaj Diosta ricucuj shina carca’ (Hebreos 11:24-27-ta leyipai). Bibliapica chai pachamantami ‘Mandaj Dioshuan Moisés shina ñahui ñahui rimaj profetaca israelpurapica nunca mana tiyarca’ nin (Deuteronomio 34:10). Moisesca Diospaj ñaupajpi alli ricurishpapish Dios cusha nishca llajtamanca mana yaicurcachu (Números 20:12). ¿Imamantashi mana yaicurca?

5-7. a) ¿Israelitacuna Egiptomanta llujshishca qˈuipaca ima problemataj tiyarca? b) ¿Moisesca imatataj rurarca?

5 Israelitacuna Egipto llajtamanta llujshishca ishqui quillacuna qˈuipa, manaraj Sinaí urcuman chayajpimi shuj problema tiyarca. Israelitacunaca yacu mana tiyashcamantami yallitaj quejarishpa Moisestapish cˈami callarircacuna. Chaimi Moisesca Yaya Diostaca: “Cai gentecunataca ¿imatataj rurashari? Rumicunahuan shitanallamari illan” nishpa mañarca (Éxodo 17:4). Yacu llujshichunca Horebpi tiyaj rumita cambaj caspihuan huajtai nishpami Yaya Diosca mandarca. “Moisesca israelcunata cunaj yuyajcunapaj ñaupajpimi chashna rurarca”. Yacu llujshijpimi israelitacunaca mashnata munashcata ubyarcacuna. Shinami quejarinata saquircacuna (Éxodo 17:5, 6).

6 Bibliapica Moisesca chai pambataca Masah y Meriba nishpami shutichirca ninmi. Masah shutica “Prueba” nisha ninmi. Cutin Meriba shutica “Pˈiñanacui” nisha ninmi. ¿Chai shuticunata churanaca imamantataj alli carca? ‘“¿Mandaj Diosca ñucanchijhuanchu, manachu ñucanchijhuan?” nishpa israelcuna Mandaj Diosta pˈiñachishcamantami’ chai pambataca chai shuticunata churarca (Éxodo 17:7).

7 ¿Meriba pambapi chai problema tiyashcamantaca ima shinataj Diosca sintirirca? Israelitacuna Moisesta mana cazujpica Yaya Diosca paita mana  cazushcatami sintirca (Salmo 95:8, 9-ta leyipai). Israelitacuna chashna mana alli comportarijpipish Moisesca Jehová Diosta ayudachun mañashpami pai nishcata rurarca.

8. ¿Dios cusha nishca llajtaman ñalla chayagricushpaca imatataj israelitacunaca rurarca?

8 40 huatacuna qˈuipapish ¿imataj tucurca? Israelitacunaca shitashca pambacunata rishpami shujtaj Meriba nishca pambaman chayarcacuna * (urapi tiyaj notata ricui). Cai pambaca Qades nishca cˈuchullapimi saquirirca. Qadesmanta Dios cusha nishca llajtamanca casi ni ima mana illarcachu. Chaipimi israelitacunaca yacuta mana charinchij nishpa cutin quejarircacuna (Números 20:1-5). Chashna quejarijpica Moisesca ¿imatataj rurarca?

9. ¿Diosca imatataj Moisesta mandarca, pero paica imatataj rurarca? (Página 9-pi tiyaj dibujota ricui).

9 Moisesca imata ruranata yachangapajca cutinmi Jehová Diosta ayudahuai nishpa mañarca. Cunanca Diosca shuj rumita huajtachunca mana mandarcachu. Ashtahuanpish israelitacunata rumi muyundijta tandachishpa rumita rimachunmi mandarca (Números 20:6-8). Pero Moisesca mana chaita rurarcachu. Ashtahuanpish pˈiñarishpami israelcunataca: “¡Cˈariyaj gentecuna caita uyaichij! Cancunamanca cai peña urcumantami yacuta llujshichishpa cugrinchij” nishpa rimarca. Qˈuipaca tauna caspihuanmi ishqui cutin rumita huajtarca (Números 20:10, 11).

10. ¿Moisés pai mandashcata mana cazujpica ima shinataj Diosca sintirirca?

10 Jehová Diosca Moiseshuanca achcatami pˈiñarirca (Deuteronomio 1:37; 3:26). ¿Imamanta? Moisés pai mandashcata mana cazushcamantami pˈiñarishca canga.

11. Moisés rumita huajtajpica israelitacunaca ¿imamantataj mana Dios milagrota rurashca shina ricushca canga?

11 Punta parlashca Meriba pambapi tiyaj rumicunaca yacu rumicunami carca. Chaimi mashnata huajtajpipish chai rumimanta yacuca mana llujshij carca. Pero caishuj Meribapi tiyaj rumicunaca qˈuillin rumi layami carca. Chai rumicuna ucupimi yacuca tiyaj carca. Rumipi shuj jutcuta rurashpami gentecunaca yacuta llujchijcuna carca. Chaimantami israelitacunaca Moisés chai rumita huajtashpa yacuta llujshichijpi, Yaya Dios milagrota rurashcataca mana yuyashcacuna canga. Diosca chaimantapishmi Moiseshuan pˈiñarishca canga * (urapi tiyaj notata ricui).

MOISESCA DIOSTA MANA CAZURCACHU

12. ¿Imamantataj Diosca Moiseshuanpish Aaronhuanpish pˈiñarishcanga?

12 Moisesca: “Cancunamanca cai peña urcumantami yacuta llujshichishpa cugrinchij” nircami. “Llujshichishpa cugrinchij” nishpaca pai Aaronhuan chaita  ruragricushcata layami intindichishca canga. Shinami chai milagrota Jehová Dioslla rurashcataca Moisesca mana huillarca. Diosta mana respetashcatapishmi ricuchirca. Salmo 106:32, 33-pica: “Meriba yacu cˈuchupipish, Diostaca yallitajmi pˈiñachircacuna. Paicuna chashna rurashcamantami Moisespish Diospi mana alli saquirirca. Paicuna paipaj shunguta yallitaj llaquichijpimi, Moisesca imata rimacushcata mana yachashpa rimarirca” ninmi * (urapi tiyaj notata ricui) (Números 27:14). Moisés paita mana jatunyachishcamantami Diosca pˈiñarishca canga. Chaimantami paica Moisestapish Aarontapish: ‘Ñuca mandashcata mana cazurcanguichijchu’ nirca (Números 20:24). Moisespish Aaronpish jatun juchatami rurarcacuna.

13. ¿Imamantataj Jehová Diostaca cashcata rurajmi can ninchij?

13 Moisespish Aaronpish Diospaj pueblota pushajcunami carca. Chaimantami ashtahuan responsabilidadta charircacuna (Lucas 12:48). Ñaupa huatacuna huashamanca Diosca pai cusha nishca llajtaman mana cazuj israelitacuna yaicuchunca mana saquircachu (Números 14:26-30, 34). Moisespish Diosta mana cazurcachu. Chaimantami Diosca pai cusha nishca llajtaman yaicuchun mana saquirca. Cashcata ruraj Dios cashcamantami chaita rurarca.

MOISESCA PˈIÑARIRCAMI

14, 15. ¿Imamantataj Moisesca Diosta mana cazurca?

14 ¿Imamantataj Moisesca Diosta mana cazurca? Salmo 106:32, 33-ta cutin ricushun. Chaipica: “Meriba yacu cˈuchupipish, Diostaca yallitajmi pˈiñachircacuna. Paicuna chashna rurashcamantami Moisespish Diospi mana alli saquirirca. Paicuna paipaj shunguta yallitaj llaquichijpimi, Moisesca imata rimacushcata mana yachashpa rimarirca” ninmi. Israelitacuna Jehová Diosta pˈiñachijpipish Moisesmi yallitaj llaquirishpa pˈiñarirca. Mana jarcarishpa rimarishcamantami llaquicuna shamunapica mana yuyarca.

15 Punta cutin israelitacuna yacuta mana charinchijchu nijpica Moisesca Dios mandashca shinami rurarca (Éxodo 7:6). Pero cunanca Moisesca israelitacuna ima shina comportarishcapi yuyailla cashpami Diosta mana ricurarca. Paica achca huatacunatami mana cazuj israelitacunata pushana carca. Chaimantami shaicurishpa pˈiñarishca canga. Chashna sintirishcamantami Diosta jatunyachinatapish cungarishcanga.

Diospaj munaita rurashpami paita ricurashpa catina canchij

16. ¿Moisés ima rurashcataca imamantataj yuyarina canchij?

16 Moisesca Diosta alli sirvij cashpapish juchapimi urmarca. Ñucanchijpish chashnallatajmi pandari tucunchij. Moisesca Dios cusha nishca llajtamanmi ñalla yaicugrirca. Ñucanchijpish paraíso  Allpapimi ñalla causagrinchij (2 Pedro 3:13). Chaimi chaipi causana bendiciontaca mana chˈingachisha ninchij. Chaipajca Diospaj munaita rurashpami paita ricurashpa catina canchij (1 Juan 2:17). Moisés pandarishcamantaca ¿imatataj yachacunchij?

SHUJTAJCUNA PANDARISHCALLATA AMA RICUSHUNCHIJ

17. ¿Ama yallitaj desanimaringapajca imatataj rurana canchij?

17 Ama desanimarishunchijchu. Huaquinpi ima problema ricurijpica cutin cutinmi chˈimbapurana canchij. Pero Bibliapica: “Allita ruranataca ama shaicushunchij. Mana shaicushpa allita rurashpaca, tandana pajtajpica tandashunmi” ninmi (Gálatas 6:9; 2 Tesalonicenses 3:13). Problemacuna ricurijpi o shujtajcuna ñucanchijta cutin cutin pˈiñachisha nijpica ¿jarcarishunchu? ¿Alli yuyashpachu rimarishun? (Proverbios 10:19; 17:27; Mateo 5:22). Ñucanchijta pˈiñachijpipish Jehová Diospaj maquipimi saquina canchij (Romanos 12:17-21-ta leyipai). ¿Ima shinataj chaitaca rurashun? Diostami ricurana canchij. Paimi problemacunata ima hora allichinataca yachan. Chaicamaca pacienciahuanmi shuyana canchij. Pero ñucanchijraj chashnallataj  tigrachishpaca Diosta mana respetacushcatami ricuchishun.

18. ¿Mushuj mandashcacunata cujpica imatataj yuyarina canchij?

18 Mushuj mandashcacunata alli cazushunchij. Jehová Dios paipaj organizacionman mushuj mandashcacunata cujpica utcami cazuna canchij. Ñaupa shinami rurana cani nishpaca mana atirinachu canchij (Hebreos 13:17). Shinallataj “quillcachishcapi nicushcata” ama yalli mirachingapajmi cuidadota charina canchij (1 Corintios 4:6, El Nuevo Testamento Quichua, Nueva Versión Internacional, 1999). Chashnami Jehová Diosta ricuracushcata ricuchishun.

Shujtajcuna pandarijpica ¿imatataj Moisesmanta yachai tucunchij? (Párrafo 19-ta ricui).

19. ¿Shujtajcuna pandarijpipish Dioshuan alli apanacushpa catingapajca imatataj rurana canchij?

19 Shujtajcuna pandarijpipish Dioshuan alli apanacushpa catishunchij. Diosta ricurashpa causashpaca shujtajcuna mana allita rurajpipish mana pˈiñarinachu canchij. Pˈiñarishpa mana allita rurashpaca Diosmantami caruyashun. Cai yuyaicunataca Moisés shina Diospaj organizacionpi ima responsabilidadta charijcunami ashtahuan yuyaipi charina can. Shinapish Diosta cazungapajca cada unomi esforzarina canchij. Chashnami quishpiri pudishun (Filipenses 2:12). Ashtahuan responsabilidadcunata charijpica Diosca ashtahuan alli ejemplota ricuchichunmi munan (Lucas 12:48). Jehová Diosta tucui shunguhuan cˈuyajpica paimanta ni ima mana caruyachingachu (Salmo 119:165; Romanos 8:37-39).

20. ¿Ima yuyaihuantaj causana canchij?

20 Llaqui punllacunapimi causacunchij. Chaimantami jahua pachapi caj Jehová Diosta ricuranaca importante can. Paita ricurashpallami paipaj munai maijan cashcata yachashun. Moisés ima tucushcata yuyarishpaca shujtajcuna mana allita rurajpipish Dioshuan alli apanacunataca manataj saquishunchu. Shujtajcuna pandarijpipish paicunahuan pˈiñarinapaj randica Dios ñucanchijta ayudangacama paita ricurashpa causashunchij (Salmo 123:1, 2).

^ par. 8 Cai Meriba pambaca mana párrafo 6-pi parlashca Meriba pambachu can. Párrafo 6-pi parlashca Meriba pambaca Masah shutipishmi carca. Redifim nishca pamba cˈuchullapimi saquirirca. Cai ishqui pambacunapi israelitacuna Diosta pˈiñachishcamantami Meriba nishpa shutichircacuna (Guía para el estudio de la Palabra de Dios folletopi parte 7-pi tiyaj dibujota ricui).

^ par. 11 Profesor John A. Beck runaca judiocuna paicunapaj causaimanta imata parlashcatami huillarca. “Mana cazuj israelitacunaca: ‘Cai rumi ucupi yacu tiyashcataca Moisesca allimi yachan. Pai shuj milagrota rurashcata ricuchingapajca shujtaj rumimanta yacuta llujshichichun’ nishpami rimarijcunaca carca” ninmi.

^ par. 12 La Atalaya del 15 de octubre de 1987-pi “Preguntas de los lectores” nishca temata ricui.