Cargokunata chaskiyänampaq yanapashun

“Yachacoqqa yachacur usharir, mayestrunnollam canqa.” (LUC. 6:40.)

1. Patsachö Jesus yachatsikur purinqan witsan, ¿imanötaq qateqninkuna yachatsikur siguiyänampaq congregacionta patsätsishqatana haqirqan?

QELLQANQAN libropa ushananchömi apóstol Juan kënö nirqan: “Mas atscaran can Jesus rurashqancuna. Tsecunata llapanta jucllellapayan escribiyaptenqa, que patsa manam tincunmantsu tse librucunata churayänanpaqpis” (Juan 21:25). Cristuqa wallka tiempollam Patsachö yachatsikur karqan, y tsë tiempollachömi ollqukunata akrarqan, yachatsirqan y wanuriptin hinantimpa yachatsikïta imanö rikäyänampaqpis willaparqan o yätsirgan. Tsëmi, 33 watachö ciëlopa kutikurnin imanö yachatsikurnin siguiyänampaqpis congregacionta patsätsishqatana haqirqan, y wallka tiempollachömi atskaq waranqa tikrariyarqan (Hech. 2:41, 42; 4:4; 6:7).

2, 3. a) ¿Imanirtaq alläpa precisan bautizakushqa ollqukuna cargota chaskiyänampaq alistakuyänan? b) ¿Imatataq kë yachatsikïchö rikäshun?

² Kanan witsanqa, Diospa Gobiernompita yachatsikoq cristiänokunaqa pachak waranqa congregacionkunapitapis maschömi këkantsik, y qanchis waranqapitapis masmi mirarquntsik, tsëmi alläpa wanantsik Jehoväpa kaqchö pushakoq ollqukunata. Pishiyan más atskaq anciänokunam. Tsëmi congregacionchö más yanapakuyänampaq sinchikoq ollqu cristiänokunaqa ‘allita yarpecuyashqa’ (1 Tim. 3:1).

³ Tsënö kaptimpis, congregacionchö cargoyoq  kayänanrëkur imata rurayänampaq kaqta Biblia mañakunqantaqa manam pipis rasllatsu cumplin. Tsë cargokunata chaskiyänampaqqa, manam alli estudiashqa kayanqampitatsu, ni edäna kar imëkata yachaq kayanqampitatsu. Tsëpa rantinqa Jehoväpa kaqchömi poqu cristiano kayänan. Awmi, masqa precisan Jehoväpa kaqchö alli kayänanmi y manam atska yachëyoq, ni tukïchö alli rurëta yachaq kayanqantsu. ¿Imanötaq yanapashwan ollqukuna cargokunata chaskiyänampaq? “Yachacoqqa yachacur usharir, mayestrunnollam canqa” nirqanmi Cristu (Luc. 6:40). Kë yachatsikïmi rikätsimäshun cargokunata chaskiyänanrëkur Alli Yachatsikoq Jesus qateqninkunata imanö alistanqanta, y imanö ruranqampitapis yachakushunmi.

‘Amigücunam cayanqui’

4. ¿Imakunata rurartaq Jesus rikätsikurqan qateqninkunapa amïgon kanqanta?

⁴ Jesusqa manam discïpulonkunata mana imata musyaqtanötsu tratarqan, sinöqa amïgonkunatanömi. Atska tiempom pëkunawan karqan y pëkunaman markäkunqantapis rikätsikurqanmi. Tsëmi kënö nirqan: “Papänï yachatsimashqancunata[m] willayarqoq” (lei Juan 15:15). Alläpachi kushikuyarqan “¿ima señata ricarnintaq musyariyäshaq cutimunequipaq y juisiu junaqpaq?” nir tapuyanqanta Jesus contestariptin (Mat. 24:3, 4). Hinamampis, shonqunchö imanö sientekunqanta y llapan pensanqankunatam Cristuqa pëkunata willarqan. Këllaman pensarishun, traicionashqa kanqan paqasmi Pëdruta, Santiäguta y Juanta Getsemaní huertaman pusharqan, y tsëchömi pëkunaqa rikäyarqan shonqunchö imakunapaq alläpa llakikur Diosta rogakïpa mañakunqanta. Itsachi qateqninkunaqa imapaq mañakunqanta musyayarqantsu, pero cuentata qokuyarqanmi Jesus alläpa sasa tiempopa pasëkanqanta (Mar. 14:33-38). Hina más puntata Jesuspa qaqllan y röpan pasëpa chipapëkanqanta rikarpis alläpachi kushikuyarqan (Mar. 9:2-8; 2 Ped. 1:16-18). Rikanqantsiknöpis Jesuswanqa alli amïgom kayarqan, tsëmi tiempowan hatun cargokunata chaskir alli rurayänampaqpis yanaparqan.

5. ¿Imanötaq anciänokuna rikätsikuyan wakinkunata yanapayänampaq listo këkäyanqanta?

⁵ Jesusnöllam congregacionchö anciänokunapis cristiano mayinkunata yanapayan y amïgon këta tïrayan. Pëkunata kuyarninmi imanö këkäyanqampaq alläpa yarpachakuyan y tiemponkunatapis pëkunapaq rakiyan. Wakin musyayanqankunata mana willakuyänampaq kaqta musyarpis, manam imëkatapis pakaräkuyantsu. Cristiano mayinkunamanmi markäkuyan y Bibliapita llapan yachakuyanqankunatam willayan. Siervo ministerialkuna jövenllaraq kayaptimpis, manam imatapis mana musyaqtanötsu tratayan. Tsëpa rantinqa, Jehoväpa kaqchö más yanapakïta puëdeyanqanta y congregacionchö alläpa yanapakuyanqantam cuentapaq churayan.

‘Ejemplüwanmi yachatsiyarqoq’

6, 7. ¿Imanötaq Jesus qateqninkunata yachatsirqan y tsënö yachatsinqan pëkunata imanötaq yanaparqan?

⁶ Jesuspa qateqninkunaqa Jehoväpa kaqchö poqu karpis, tukï costumbreyoq kar y tukïnöpa watashqa karmi imatapis huknöpa huknöpa rikäyaq (Mat. 19:9, 10; Luc. 9:46-48; Juan 4:27). Pero pëqa manam imëpis qayaparqantsu ni mantsakätsipa parlaparqantsu. Hina mana puëdeyänampaq kaqtaqa manam mañarqantsu ni “ninqäta rurayë y ama noqa ruranqätaqa” nirtsu mandarqan. Tsëpa rantinqa rurëninwanmi yachatsirqan (lei Juan 13:15).

⁷ ¿Imata rurayänampaq kaqtataq Jesus qateqninkunata yachatsirqan? (1 Ped. 2:21.) Wananqanllawanmi kawarqan, tsëmi yanaparqan nuna mayinkunata alli servinampaq (Luc. 9:58). Llapan autoridadyoq mana kanqanta musyarmi, imëpis Diospa Palabran ninqannö yachatsikurqan (Juan 5:19; 17:14, 17). Yachanëpaq y wakinkunapaq yarparaqmi karqan, tsëmi imëkatapis kuyakïwan rurarqan (Mat. 19:13-15; Juan 15:12). Qateqninkunaqa alläpam yachakuyarqan tsënö ruranqampita. Santiägupaq parlarishun. Pëqa manam chikishqa këta mantsarqantsu, tsëmi wanutsiyanqanyaqpis Diosta mana haqishpa servikarqan (Hech. 12:1, 2). Hina Jesus yachatsinqannöllam Juanpis qanchis chunka watakunapa rurarqan (Apo. 1:1, 2, 9).

8. ¿Imanötaq anciänokuna yachatsiyan jövenkunata y wakin cristiänokunatapis?

⁸ Yanapakoq, qollmi shonqu y kuyakoq anciänokunaqa, rurëninkunawanmi jövenkunata yachatsiyan (1 Ped. 5:2, 3). Markäkïninkunachö alli sinchi karnin, alli yachatsikoq karnin, kawëninkunachö Dios munanqannö kawarnin y Diospita  shumaq yachatsikoq karninmi, kushikuyan wakin cristiänokunapis pëkunapita yachakïta puëdeyanqanta musyar (Heb. 13:7).

“Jesus[mi] cacharqan queno nishpa willapecurnin”

9. ¿Imataq rikätsikun yachatsikur puriyänampaq qateqninkunata Jesus alistanqanta?

⁹ Ishkë watakunapa alli yachatsikurirmi, Jesusqa más nunakunaman Diospita yachatsikïta chätsiyänampaq chunka ishkë apostolkunata kacharqan (Mat. 10:5-14). Y atska waranqa nunakunata mikïta qaranampaq milagrota manaraq rurarninmi, qateqninkunata nirqan tsëchö këkaqkuna imanö täkuyänampaq kaqta y mikïta imanö serviyänampaq kaqta (Luc. 9:12-17). Rikanqantsiknöpis Jesusqa pëkunata alistarqan shumaq y käyiyänampaqnölla o mayayänampagnölla yachatsirmi. Jesus kënö yachatsinqan y santo espïritupa yanapakïninmi 33 watapita patsë hinantin Patsaman yachatsikïta chätsiyänampaq yanaparqan.

10, 11. ¿Imanötaq mushoqkunata ichikllapa ichikllapa yachatsintsik?

¹⁰ Kanan witsankunapis huk ollqu Bibliapita yachakur qallanqampita patsëmi, Diospa kaqchö imanö yanapakunampaq kaqta alleq yachatsinantsik. Itsa höraqa leita alleq yachakuyänampaqpis yanapashwanraq. Imanö kaptimpis, Bibliapita yachakunqanmannömi ichikllapa ichikllapa más yanapanata wananqa. Llapan semänakuna reunionnintsikkunaman shamur qallëkuptinqa, animanantsikmi Diospita Yachatsikunapaq Escuëlaman matriculäkunampaq, manaraq bautizakushqa publicador këman chänampaq y maskunata ruranampaqpis. Bautizakurishqana kaptinqa, yachatsinantsikmi huk rurëkunachöpis yanapakunampaq, itsachi Yachatsikuyänan Wayita altsaparnin yanapakunampaq yachatsishwan. Más tiempo pasariptinnam siervo ministerial kananrëkur imakunata ruranampaq shumaq entiendetsishwan.

¹¹ Huk bautizakushqa ollquta imatapis ruranampaq mandayaptinqa, huk anciänom shumaq yachatsinqa imanö ruranampaq kaqtapis. Hina yachatsiyanqan höram musyatsiyänan pëpita imata shuyaräyanqanta. Mandayanqanta allilla mana rurëta puëdeptinqa, huk kuyakoq anciänoqa manam rastsu pensarinman manana rurëta puëdenampaq kaqta. Tsëpa rantinqa, imakunachö más alli ruranampaq kaqta y imanö ruranampaq kaqtam yachatsinan. Anciänokunaqa alläpam kushikuyan huk ollqu yachatsiyanqannölla imatapis ruraptin y tsëkunata rurar kushikuptin (Hech. 20:35).

“Consëjota wiyakoq nunaqa, yachaqmi”

12. ¿Imanirtaq Jesuspa consëjonkunaqa qateqninkunata allipa yanaparqan?

¹² Jesus qateqninkunata yachatsirqa, cada ünota wanayanqanmannömi yanapaq. Këllaman yarpärishun, huk kuti chaskita mana munaq samaritänokunata nina heqarkamur ushakäratsinampaq Santiäguwan Juan niyaptinmi, Jesus ishkanta consejarqan (Luc. 9:52-55). Y huk kutinam, kë ishkan qateqninkunapa mamänin Jesusta rogakurqan gobernanqan witsan ishkan wambrankunata lädonman tätsinampaq, pero Jesusqa shumaqllam tsë problëmata altsarqan kë ishkan qateqninkunawan parlarnin. Kënömi nirqan: “Derechu laducho y itsoq laducho pipis täcamunanpaqqa manam noqatsu dispunï. Tsetaqa Papänï[mi] dispunishqana” (Mat. 20:20-23). Cristuqa, manam entiendiyänampaqnöllatsu, rurayänampaqnöllatsu y Diospa Palabran ninqannöllatsu qateqninkunata consejaq, sinöqa Diospa Palabran imata yachatsikunqantapis kikinkuna cuentata qokuyänampaqmi yanapaq (Mat. 17:24-27). Manam ni imëpis qonqarqantsu llapanta rurëta mana puëdeyanqantaqa, y imatapis paqwë alli rurayänantaqa manam shuyararqantsu. Pëkunataqa consejaq rasumpa kuyarninmi (Juan 13:1).

13, 14. a) ¿Pikunataq consejo chaskita wanayan? b) Jehoväpa kaqchö huk ollqu alleqlla mana yanapakïkaptin huk anciano imakunachö consejanampaq kaqta willakaramï.

¹³ Congregacionchö yanapakïta munaq ollqukunaqa wanayanqam imë hörachöpis consejariyänanta. Proverbios 12:15 texto ninqannöpis, “consëjota wiyakoq nunaqa, yachaqmi”. Tsë rasumpa kanqantam huk joven wawqi willakun kënö nirnin: “Imapis mana alli yarqapamaptinqa tukïnöpam tsapäkoq kä. Pero huk anciano consejamanqanmi alläpa yanapamarqan pantanqäkunata rikätsiyämaptin chaskikunäpaq”.

¹⁴ Huk ollqu manaraq alleq pensëkur imatapis  mana alli ruraptinqa, anciänokunam pëman witikur shumaq kuyëllapa consejäyänan (Gal. 6:1). Itsa höraqa hina mana alli portakïnimpita huk wawqita consejayanman. ¿Imataraq huk anciano ruranman huk ollqu qelanëkarlla o mana alläpa sinchikushpa imatapis ruraptinqa? Jesus llapan shonqunwan Diospa Gobiernompita yachatsikunqanta y qateqninkunatapis tsënölla rurayänampaq mandanqantam yarpätsiyänan (Mat. 28:19, 20; Luc. 8:1). ¿Imataraq rurayanman huk ollqu precisaq këllata ashiptinqa? Alläpa allichi kanman precisaq këta ashiyaptin qateqninkunata Jesus consejanqanta rikäratsiyaptinqa (Luc. 22:24-27). Y, ¿imanöraq yanapashwan perdonakïta mana munaqtaqa? Allim kanman huk esclävota mëtsika haqanta perdonëkäyaptimpis, kikinqa esclävonta wallkalla haqan këkaptimpis perdonëta mana munanqanta rikäratsiyaptinqa (Mat. 18:21-35). Pitapis mana allitanö rikarqa, rasllam consejanantsik (lei Proverbios 27:9). *

“Yachaquita tïrë”

15. ¿Imanötaq familian yanapan huk ollqu congregacionchö más alli yanapakunampaq?

¹⁵ Ollqukuna cargota chaskiyänampaq anciänokuna yachatsiyänan kaptimpis, wakin kaqkunapis yanapakïta puëdeyanmi. Familiampis puëdenmi y yanapëtam tïranan Jehoväpa kaqchö más poqunampaq. Huk cristiano anciänona karqa alläpam wanan warmin y tsurinkuna munëninkunata haqirïkur shumaq kuyëpa yanapayänanta. Awmi, manam alleqllaqa cargonchö yanapakunqatsu congregacionchö shumaq yanapakunanta familian mana haqiptinqa. Familian pëkunallawan kananta mana shuyaraptinqa, más kushishqam cargonchö tsë wawqi yanapakunqa, hina manam tsëllatsu, congregacionchö kaqkunapis familianta alläpam kuyayanqa (Pro. 15:20; 31:10, 23).

16. a) ¿Pipa makinchötaq këkan huk ollqu Diospa kaqchö poqunampaq? b) ¿Imanötaq huk ollqu rikätsikun congregacionchö más cargota chaskita munanqanta?

¹⁶ Wakinkuna yachatsita y yanapëta puëdeyaptimpis, Jehoväpa kaqchö más poqurnin congregacionchö más yanapakunampaqqa kikin ollqupitam kanqa (lei Galatas 6:5). Pero manam siervo ministerial o anciano këraqtsu precisan wakinkunata yanapanapaq y Diospita más yachatsikur purinapaqqa. Tsënö kaptimpis, huk ollqu ima cargowampis más yanapakïta munarqa, puntataqa kallpachakunan Biblia ninqannö ruranampaqran (1 Tim. 3:1-13; Titu 1:5-9; 1 Ped. 5:1-3). Tsënö yanapakunampaqqa kikinmi rikänan Diospa kaqchö más poqunanrëkur imakunachö más alliyänampaq kaqta. Mana haqitam Bibliata leinan, hapallanmi más yachakunan, yachakunqankunamanmi alli yarpachakunan, mana haqipam Diosta mañakunan y Diospita yachatsikïchöpis allim yanapakunan. Tsëta rurarmi, “Dios munanqanno cawacur yachaquita tïrë” nishpa Pablu Timoteuta consejanqanta wiyakïkanqa (1 Tim. 4:7).

17, 18. ¿Imatataq huk wawqi ruranman mantsapakoq karnin, ima ruranqampis mana alli yarqapunampaq kaqta pensarnin o shonquncho más yanapakï munë mana yuriptin?

 ¹⁷ Pero ¿huk ollqu mantsapakurnin o cumplïta mana puëdenampaq kaqta pensarnin Diospa kaqchö más yanapakïta mana tïraptinqa? Tsëqa, allim yarpachakunan Jehoväwan Jesus noqantsikrëkur imakunata rurayanqanman. Awmi, ciëlochö Teytantsikqa “llapan hunaqkunam lasapämaqnintsikta apapamantsik” (Sal. 68:19). Tsëmi pëqa yanapamënintsikta puëden más cargokunata chaskinapaq. Hina manaraq siervo ministerial o anciano këman chashqa wawqikunapis, masmi kallpachakuyanqa Diospa markanchö mëtsika poqushqa ollqukunata yanapakuyänampaq wanayanqanman yarpachakurqa. Këkunaman alli yarpachakurqa, itsa más kallpachakunqa Diospa kaqchö yanapakïta manana qelanänampaq. Hinamampis, Jehoväpa santo espïrituntam mañakunan, porque tsëpa wayïninchömi këkan alli pasakïchö kawakï y peqata alli tsarë, tsëmi yanapanqa mantsapakoq këninta y imatapis alli rurëta mana puëdenampaq kaq pensëninta vencinampaq (Luc. 11:13; Gal. 5:22, 23). Y llapan shonqunwan Jehoväta y nuna mayinta servita munar Diospa kaqchö más poqunampaq alli sinchikuptinqa, Jehová bendecinqam.

¹⁸ Pipis mana animaptinmi wakin bautizakushqa ollqukunaqa congregacionchö más yanapakïta tïrayantsu. ¿Imataraq rurayanman más cargota chaskita munë shonqunkunachö mana yuriptinqa? Apóstol Pablum, “Dyosmi yuritsin qamkunachow muneyta i rureyta” nir qellqarqan (Fili. 2:13, QKW). Rikanqantsiknöpis, kikin Jehovämi yanapamantsik wakinkunarëkur trabajanapaq, hina pëqa espïritunwanmi mëqan cristiänotapis yanapëta puëden pëta alli serviyänampaq (Fili. 4:13). Hina manam tsëllatsu, pë munanqänö imata ruranapaqpis mañakïta puëdentsikmi (Sal. 25:4, 5).

19. ¿Imata shuyänapaqtaq yanapamantsik ‘qanchis mitsikoqkunapaq, y puwaq pushakoqkunapaq’ Biblia parlanqan?

¹⁹ Jehoväqa anciänokunata bendecinmi más yanapakuyänampaq ollqukunata yachatsiyaptin. Hina más yanapakuyänanrëkur y cargokunata chaskiyänanrëkur wiyakoqkunatapis Jehoväqa bendecinmi. Bibliaqa nin “qanchis mitsikoqkunata, awmi, puwaq pushakoqkunata” Jehová shäritsinampaq kaqtam, huk parlakïchöqa, markanta pushayänampaq alli yachaq ollqukunata (Miq. 5:5). ¡Alläpam kushikuntsik cargokunata chaskiyänampaq mëtsikaq ollqukunata yachëkätsiyanqanta y kikinkunapis tsërëkur sinchikïkäyanqanta musyar, tsënöpa Jehová alabashqa kanampaq!

[Päginapa ura kuchunchö willakï]

¿Ima nishwanraq?

• ¿Imanötaq qateqninkunata Jesus yachatsirqan más cargokunata chaskiyänampaq?

• ¿Imanötaq anciänokuna Cristupita yachakuyanman congregacionchö más yanapakuyänanrëkur ollqukunata yachatsiyänampaq?

• ¿Imanötaq familia yanapanman teyta kaqta o ollqu kaqta Jehoväpa kaqchö más poqunampaq?

• ¿Imatataq kikin ollqu ruranan congregacionchö cargokunata chaskita munarqa?

[Yachakunapaq kaqpa tapukïninkuna]

[31 kaq päginachö dibüjukuna]

¿Imanöraq yanapashwan Bibliapita yachakïkaqkuna Jehoväpa kaqchö más poqïta munayaptin?

[32 kaq päginachö dibüju]

¿Imanötaq ollqukuna rikätsikuyan congregacionchö cargoyoq këta munayanqanta?