Lücas 9:1-62
-
Imanö yachatsikuyänampaq döci qateqninkunata yachatsin (1-6)
-
Jesuspa causan Herödis yarpachakun (7-9)
-
Cincu mil ollqukunata Jesus pachan qaran (10-17)
-
Jesus Cristu kanqanta Pëdru nin (18-20)
-
Wanutsiyänampaq kaqta Jesus willakun (21, 22)
-
Jesuspa qateqninkuna imanö kayänampaq kaq (23-27)
-
Jesus jukläya tikran (28-36)
-
Mana alli espïrituyoq jövinta alliyätsin (37-43a)
-
Wanutsiyänampaq kaqta Jesus yapë willakun (43b-45)
-
Mëqan mas alli kanqampaq qateqninkuna discutiyan (46-48)
-
“Mana contrëkikunachö kaqqa, qamkunawanmi këkan” (49, 50)
-
Samariapa juk caserïunchö Jesusta chaskiyantsu (51-56)
-
Jesusta imanö qatinapaq kaq (57-62)
9 Tsëpitanam döci apostolninkunata qayëkatsir, mana alli espïritukunata qarquyänampaq y qeshyëkaqkunata alliyätsiyänampaq+ poderta pëkunaman churarqan.+
2 Tsëpitanam Diospa Gobiernumpita willakuyänampaq y qeshyëkaqkunata alliyätsiyänampaq mandarqan.
3 Kënömi nirqan: “Ama viäjipaq imatapis apayëtsu, ni tukruta ni mirkapa* puritsina bolsata ni tantata ni qellëta,* y ama juk mas röpatapis apayëtsu.*+
4 Më wayimampis yëkurqa, tsë sitiupita ëwakuyanqëkiyaq tsëchö quedakuyanki.+
5 Më markachöpis nunakuna mana chaskiyäshuptikiqa, mana alli këkäyanqanta musyayänampaq, tsëpita ëwakur chakikikunapita allpata tapsikuyë”.+
6 Tsënam pëkunaqa alli noticiakunata willakur y qeshyëkaqkunata alliyätsir, caserïun caserïun wakpa këpa ëwayarqan.+
7 Llapan pasakuykanqanta wiyarnam Galilëa provinciata gobernaq Herödisqa,* Juan kawarimushqa kanqanta wakinkuna niyaptin, alläpa yarpachakur këkarqan.+
8 Peru wakinqa Elïas yurimushqa kanqantam niyaq, y wakinnam Teyta Diospa unë witsan mëqan willakoqnimpis kawarimushqa kanqanta niyaq.+
9 Herödisqa kënömi neq: “Juanpa kunkanta mututsishqa këkaptïqa,+ ¿pï nunapaqtan tsëkunata parlayanqanta wiyëkä?”. Tsëmi rikëta munarqan.+
10 Apostolkuna kutirqa, llapan rurayanqantam Jesusta willayarqan.+ Tsënam pëkunata pusharkur japallankunalla kayänampaq Betsaida niyanqan markaman ëwarqan.+
11 Tsëta musyëkurnam mëtsikaq nunakuna qepanta ëwayarqan, y pëqa shumaq chaskirmi Diospa Gobiernumpita parlaparqan y qeshyëkaqkunata alliyätsirqan.+
12 Inti o rupay jeqëkaptinnam döci apostolninkunaqa pëman witïkur kënö niyarqan: “Teytë, karu sitiuchömi këkantsik, caserïukunaman y chakrakunachö wayikunaman ëwar, posädata y mikuyta ashiyänampaq kë nunakunata despachëkuyna”.+
13 Peru Jesusqa, “qamkuna imallatapis qarayë”+ nirqanmi. Pëkunanam niyarqan: “Këchöqa pitsqa tanta y ishkë pescädullam kayäpaman, sinöqa ëwar kë llapan nunakunapaq mikuyta rantirayämushaq”.
14 Tsëchöqa cincu milnö ollqukunam kayarqan, tsënö kaptimpis pëqa qateqninkunatam kënö nirqan: “Cincuenta cincuentanö jamakuyänampaq nunakunata niyë”.
15 Tsënam pëkunaqa Jesus ninqannölla llapankunata jamakuyänampaq niyarqan.
16 Tsëpitanam pitsqa tantata y ishkë pescäduta aptarkur, ciëluman rikëkur Teyta Diosman mañakurqan. Y tantakunata pakir pakirmi nunakunata qarayänampaq qateqninkunata entregarqan.
17 Llapankunam pacha junta mikuyarqan, y döci canasta juntatam sobranqanta juntayarqan.+
18 Tsëpitanam Jesus japallan mañakuykaptin qateqninkuna pëman witiyarqan, tsënam pëqa “¿pï kanqätataq nunakuna niyan?”+ nir tapurqan.
19 Pëkunanam kënö niyarqan: “Wakinmi Bautizakoq Juanmi niyan, wakinnam Elïasmi niyan, y wakinnam Diospa unë willakoqninchi kawarimushqa niyan”.+
20 Tsënam pëqa, “qamkunaqa, ¿pï kanqätataq niyanki?” nirqan. Tsënam Pëdruqa, “qamqa Diospa Cristunmi kanki”+ nirqan.
21 Tsënam pëkunata alli cläru nirqan pitapis mana willayänampaq,+
22 y kënöpis nirqanmi: “Nunapa Tsurinqa imëka sufrimientupam pasanqa, y markachö dirigeqkuna, mandakoq sacerdötikuna y Ley qellqaqkunam despreciayanqa y wanutsiyanqa o wañutsiyanqa,+ y kima junaqtam kawarimunqa”.+
23 Tsëpitanam llapankunata kënö nirqan: “Pï nunapis qatimaqnï këta munarqa, amana kikimpaqqa kawatsunnatsu,+ sinöqa sufrimientu qerunta* cada junaq aparkur qepäta shamutsun.+
24 Vïdanta salvëta munaqqa, wanunqam o wañunqam; peru qatimaqnï kanqanrëkur wanoqqa, kawarimunqam.+
25 Rasumpa kaqchöqa, ¿imataraq juk nuna logranman kë mundupa duëñun karpis, wanunan kaptin o mana allichö ushanan kaptinqa?+
26 Pï nunapis noqapita y parlanqäkunapita penqakuptinqa, Nunapa Tsurimpis kikimpa, Teytampa, y limpiu angelkunapa poderninwan shamurmi tsë nunapita penqakunqa.+
27 Peru noqam qamkunata nï,* këchö këkaqkunapita wakinnikiqa manam wanuyankitsu, Diospa Gobiernunta rikäyanqëkiyaq”.+
28 Y tsënömi karqan, tsëkunata parlanqampita puwaq junaqnö pasariptinmi Pëdruta, Juanta y Santiäguta pusharkur jirkaman mañakoq witsarqan.+
29 Tsëchö mañakuykaptinmi cäran jukläya tikrarirqan, y röpampis chipapaq yuraqmi tikrarqan.
30 Y illaqpitam ishkaq nunakuna pëwan parlëkäyarqan, pëkunaqa Moiseswan Elïasmi kayarqan.
31 Pëkunaqa chipapëkar yurirkurmi Jesus ëwakunampaq kaqta parlar qallëkuyarqan, y tsëqa ichikllachönam Jerusalenchö cumplikänan karqan.+
32 Pëdru y pëwan këkaqkunaqa punukëkäyarqanmi, peru riyarkamurqa o rikcharkamurqa, pë chipapëkanqanta+ y ishkaq ollqukuna lädunchö shëkaqta* rikäyarqan.
33 Pëkuna ëwakuykäyaptinnam Pëdruqa Jesusta kënö nirqan: “Maestru, ¡alläpa allim këchö këkanqantsikqa! Kima carpata* armashun, jukta qampaq, jukta Moisespaq y juktana Elïaspaq”. Pëqa manam cuentata qokurqantsu imata parlëkanqanta.
34 Tsëkunata parlëkaptinmi pukutë yurirkur pëkunata tsapar qallëkurqan, y llapankunata tsaparkuptinmi alläpa mantsakäyarqan.
35 Tsë höram pukutë rurimpita+ kënö nimoqta wiyayarqan: “Pëmi akranqä Tsurï.+ Pëta wiyayë”.+
36 Tsënö neq wiyakaptinqa Jesusqa japallanllanam këkarqan. Pëkunaqa upällam kakuyarqan, y tsë junaqkunaqa manam rikäyanqanta pitapis willayarqantsu.+
37 Waränin junaq jirkapita uräyämuptinnam, mëtsikaq nunakuna pëwan tinkoq ëwayarqan.+
38 Tsënam mëtsikaq nunakuna rurimpita juk nuna fuertipa kënö nirqan: “¡Maestru, tsurilläta rikëkunëkipaqmi rogakoq! Pëqa japallan tsurïmi.+
39 Juk mana alli espïritum pëman yëkur illaqpita qayarätsin, y tapsikacharkurmi pushuqata jitatsimun, y unëtaraq pëpita yarqurmi pasëpa* maltratashqata dejarin.
40 Tsë mana alli espïrituta qarquyänampaqmi qatiräshoqnikikunata rogakurqö, peru manam puëdiyashqatsu”.
41 Tsënam Jesusqa nunakunata kënö nirqan: “¡Mana markäkoq o yärakoq y llutankunata ruraq nunakuna!+ ¿Imëyaqraq qamkunata aguantar këkäshaq? Tsurikita këman apamuy”.+
42 Y tsë jövin ëwëkaptinmi, tsë demoniuqa patsaman ishkitsir pasëpa* tapsikacharkurqan. Peru Jesusqa, tsë mana alli espïrituta fuertipa qayapëkur jövinta alliyäratsirmi, papäninta entreguëkurqan.
43 Teyta Dios alläpa puëdeq kanqanta rikashqa karmi, llapankuna alläpa espantashqa këkäyarqan.
Llapan ruranqampita nunakuna espantashqa këkäyaptinmi, Jesusqa qateqninkunata kënö nirqan:
44 “Kë ninqäkunata shumaq wiyayë y ama imëpis qonqayankitsu. Nunapa Tsurinqa nunakunapa makinmanmi entregashqa* kanqa”.+
45 Pëkunaqa manam tsënö ninqanta entiendiyarqantsu. Rasumpa kaqchöqa, mana entiendiyänampaqmi pëkunapita pakashqa karqan. Tsënö kaptimpis, ninqankunapaq tapupëtaqa mantsayarqanmi.
46 Tsëpitanam pëkunapita mëqan mas alli kanqampaq discutir qallëkuyarqan.+
47 Tsënam Jesusqa shonqunkunachö imata pensayanqanta musyar, juk wamrata lädunman shëkatsir*
48 pëkunata kënö nirqan: “Pï nunapis kë wamrata jutïchö chaskeqqa, noqatapis chaskimanmi, y noqata chaskimaqqa, mandamaqnïtapis chaskinmi.+ Mëqëkipis mana kaqnölla portakoqmi qamkunachöqa mas alli kanqa”.+
49 Tsëta wiyëkurnam Juanqa nirqan: “Maestru, jutikichö demoniukunata qarquykaqtam juk nunata rikäyarqö, y noqantsikwan mana puriptinmi michëta tïrayarqö”.+
50 Tsënam Jesusqa kënö contestarqan: “Ama michëta tïrayëtsu, mana contrëkikunachö kaqqa, qamkunawanmi këkan”.
51 Ichikllachöna ciëluta ëwakunan kaptinmi,+ Jerusalenman ëwanampaq decidirqan.
52 Tsëmi puntata ëwayänampaq qateqninkunata mandarqan, tsënam pëkunaqa Jesuspaq alistapakoq ëwar Samaria nunakunapa caserïunman chäyarqan.
53 Peru Jerusalenman ëwanampaq Jesus decidishqana kaptinmi,+ tsë caserïupita nunakunaqa chaskiyarqantsu.
54 Tsëta rikëkurnam Santiäguwan Juanqa+ kënö niyarqan: “Teytë, ¿munankiku ciëlupita nina shamur pëkunata ushakäratsinampaq mañakayämunäta?”.+
55 Tsënam pëqa tumëkur pëkunata qayaparqan.
56 Tsëmi juk caserïuta ëwakuyarqan.
57 Nänipa ëwëkäyaptinnam juk nuna, “mëta ëwaptikipis qepëkitam shamushaq” nirqan.
58 Tsënam Jesusqa nirqan: “Atoqkunapaqa machënin kanmi, y pishqukunapapis qeshun kanmi, peru Nunapa Tsurimpaqa, manam wayinllapis kantsu tsëchö jamarinampaq”.*+
59 Tsëpitanam juktana, “qatimaqnï kë” nirqan. Tsë nunanam, “Teytë, puntataqa papänïtaraq pampëkamushaq”+ nirqan.
60 Tsënam pëqa nirqan: “Wanushqakunataqa wanushqa mayinkuna pampakuyätsun,+ peru qamqa ëwar Diospa Gobiernumpita wakchö këchö willakuy”.+
61 Y juknam kënö nirqan: “Qatishqëkim Teytë, peru puntataqa wayïchö këkaqkunapitaraq despidikaramushaq”.
62 Tsënam Jesusqa nirqan: “Pï nunapis takllata tsarëkar qepaman rikaqqa,+ manam Diospa Gobiernunman yëkunampaqnötsu”.+
Nötakuna
^ O “ishkë röpata vistikuyëtsu”.
^ Griëgu idiömachöqa “plätata” ninmi.
^ Kënöpis niyanmi: millkapa.
^ Tsënö nirqa, Herödis Antïpaspaqmi parlëkan. Rikäri “Bibliachö palabrakunata entiendinapaq” neqta.
^ Rikäri “Bibliachö palabrakunata entiendinapaq” neqta.
^ Kënöpis niyanmi: niyaq.
^ Kënöpis niyanmi: ichirëkaqta.
^ Kënöpis niyanmi: tolduta.
^ Kënöpis niyanmi: jankat.
^ Kënöpis niyanmi: jankat.
^ O “traicionashqa”.
^ Kënöpis niyanmi: ichïkatsir.
^ Griëgu idiömachöqa “peqanta jamaratsinampaq” ninmi.
