¿Imaraq tsapämashwan mana alli espïritukunapita?

ISLAS SALOMONPA Malaita (Melanesia, Oceanía) markanchömi James jöventa wätayarqan. Wambra kanqampitam espïritukunata alabanampaq y rarafono nishqantapis ruranampaq yachatsiyarqan, kë rurëkunaqa espïritukunata rezapëmi. Pëmi kënö nin: “Manam ni imëpis espïritukunataqa rezapämantsu karqan pitapis mana allita ruranampaqqa, tsënö kaptimpis rarafono mana tsapämaptenqa yamë mana kawakunätam creirqä”.

Më tsë markachö creiyanqannöllam Salomón islachö yachaqkunaqa, espïritukuna nunakunata mana allita rurëkuyänanllatatsu manam creiyan, hina yanapakoq kanqantapis creiyanmi. Y Melanesia nishqan islachö täraq nunakunanäqa manam mantsayantsu, antis espïritukunaqa yanapakunmi nirmi kuyayan.

Espïritukuna yanapayänampaq kaqman yärakuyanqanta o märkäkuyanqantaqa tukï costumbrenkunachömi rikätsikuyan. James täranqan markachöqa, korokoro (kë pishqutaqa tukutanömi naya o mal agüero niyan) nishqan pishqu cantaqta wiyarerqa, warmikuna hinan höram wambrankunata wayin rurinman yëkätsiyaq. Tsë pishqu cantaqta wiyarqa, pitapis desgracia pasanantam creiyan.

Huk costumbrenkunanam, wayin punkunkunaman churayan huk yulaq rumita mana alli espïritukunapita tsapämänapaq nir. Mana alli espïritukunapita tsapäkunanrëkurmi Jämesqa këkunata y hukkunatapis ruraq. Más musyarinapaq, trabäjonchö mikï katupintapis hitarinampaqshi  huk bolsaman winaq, tsëllawan pipis brüjëkunanta y qeshyëkatsinanta mantsar.

Itsa kë costumbrekunataqa markëkichö rurayantsu. Tsënö karpis, itsa Jämesnöpis espïritukunapita tsapäkunëkirëkur, imëka costumbrekunata ruranki. Y alli kawakunëkipaq yanapakonqanta itsa pensanki.

Tsënö karpis, Biblia nenqanman markäkorqa, itsa kë tapukïkunapaq Biblia ima nenqantapis musyëta munanki: 1) ¿Imanötaq mana alli espïritukunaqa ima mana allitapis ruramashwan? 2) ¿Rasumpatsuraq tsë costumbrekunaqa tsapäkun mana alli espïritukunapita? ¿O mastsuraq mana allikunata rurëkamashwan? 3) ¿Imaraq rasumpa tsapämashwan tsë mana alli espïritukunapita?

¿Imanötaq imatapis rurëkamashwan mana alli espïritukuna?

Tsë mana alli espïritukuna wanushqakunapa espïritun kanqantatsu manam Diospa Palabranqa yachatsikun. Antis kënömi nin: “Kawëkaqkunaqa musyayanmi wanuyänampaq kaqta; pero wanushqakunaqa manam imatapis musyayannatsu” (Eclesiastés 9:5). Rasun kaqchöqa, kë mana alli espïritukunaqa kayan Satanaswan mana alli angelkunam, pëkunaqa imëka mana allitam nunakunata rurayan (Apocalipsis 12:9).

Tsëmi Bibliaqa claro willakun pëkunapita cuidakunapaq. Efeso markachö cristiänokunaman cartakurmi, “noqantsicqa manam nuna puratsu pelyecantsic, sinoqa mana ricanqantsic puedeq supëcunawanmi” nerqan apóstol Pablu. Hina apóstol Pedrupis, “leonnomi qaparir qayarir, purican qamcunapa marcäquiniquicunata ushacäratsinanpaq” ninmi mana alli espïritukunata mandaq Satanás Diablupaq (Efesios 6:12; 1 Pedru 5:8).

Tsëqa, ¿imanötaq Satanás mana allita ruranman nunakunata? Jehoväta piñatsiyänampaqmi nunakunata llullapan o ulipan y ima mana allimampis qarpun. Tsëmi, “diablu[qa] shumaq anjelmanmi ticrarin” nin Bibliapis (2 Corintios 11:14). Tsë angelqa yanapakoqtukunmi, pero rasun kaqchöqa mana allita ruramënintsiktam munan. Pë imanö kanqantapis mana musyayänampaq y Diosta mana reqiyänampaqmi nunakunata wisku cuentata katsin (2 Corintios 4:4). ¿Imarëkurtaq tsëkunata ruran?

Nunakuna musyëkar o mana musyëkarpis, pëta adorayänantam Satanasqa munan. Tsëmi, Diospa Tsurin Jesus kë Patsachö këkaptimpis, ‘qonqurïcur adorananta’ munarqan. Pero Jesusnam, “¡Quepeq yarqï, diablu! Diospa palabranmi escribirëcan: ‘Diosllatam adoranequi y sirwinequi’” nerqan (Mateo 4:9, 10). Satanaspa makinchö këta Jesusqa manam paqwë munarqantsu, munëninta rurarqa adorëkanmanmi karqan.

Mëqan espïritupitapis Jehoväqa más puëdeqmi, y manam haqirenqatsu sirveqninkuna paqwë hipayänanta o ñakayänantaqa (Salmo 83:18; Romanos 16:20). Tsëmi Diosta kushitsita munarqa Jesusnö kanantsik, y Satanaspawan demonionkunapa makinman ishkitsikoq rurëkunatam haqinantsik. Tsënö kaptinmi, alläpa precisan mana alli espïritukunata adorayanqan costumbrekunata reqinantsik. ¿Imanötaq musyashwan ima costumbrepis mana alli kanqanta?

¿Imanötaq musyashwan mëqan costumbretapis Dios chikenqanta?

Unë tiempochömi israelïtakunata Jehová Dios willarqan huk nacionkunapa costumbrenta mana yachakuyänampaq. “Manam qamchö kanmantsu [...] adivinaq, ni magia ruraq, ni suerte qateq, ni hechicero, ni brüjakoq, ni brüjota tapoq” nerqanmi. Nïkurnam tsëkunata imanir mana rurayänampaqpis kënö willarqan: “Kë llapan ruraqkunataqa alläpam Jehová chikïkun” nir (Deuteronomio 18:10-12).

Tsëmi markëkichö costumbrekunata manaraq rurar kënö tapukunëki: “¿Mal agüeropita o nayapitam tsapäkun nirku rurayan? ¿Imëkapaqpis llutallanaku tsapäkunmi niyan? ¿Pitapis brüjanapaq o imapis mana chämänapaq nirku rurayan? ¿Jehoväpa o Jesuspa lädonman mana churamarnintsiktsuraq mana alli espïritupa makinman ishkitsimäshun?” (Romanos 14:11; Filipenses 2:9, 10).

Tsënö costumbrekunata mana qatinantsikqa alläpam precisan. “¿Allitsuraq canman supëpa  selebrasionnincho carir, Diospa Santa Senancho tantallantin binuta micurëcanqantsic?” nerqanmi apóstol Pablupis cristiänokunata. Hina Jehovätawan mana alli espïritukunata servita tïrarqa, Diosta ‘abusaq cuenta quecayanqantam’ willakorqan (1 Corintios 10:20-22). Diosqa munan pëllata adoranantsiktam (Éxodo 20:4, 5).

¿Kë costumbrekunaqa hutsa rurëtapis allitanöllaku rikätsikun? nirpis tapukunantsikmi. Yarpärishun mana majanwan punukoqpaq y manaraq casakur lluta piwampis punukoqpaq, tsëtaqa më markachöpis allim niyantsu manam y Bibliapis hutsam ninmi (1 Corintios 6:9, 10). Tsënö karpis, wakin markakunachöqa huk warmi brüjayämaptinmi rurarqö niptenqa manam ni imatapis niyannatsu. *

Tsënö karpis, rurayanqankunapita llapan nunakuna Diosta cuentata qoyänampaq kaqtam Bibliaqa yachatsikun (Romanos 14:12; Gálatas 6:7). Punta kamashqa Eva shutiyoq warmi ruranqanmi tsëta rikätsikun. Diosta mana wiyakonqantaqa Satanasta tumparmi pëqa tsapäkorqan. “Culebram llullapämaran [ulipämarqan] tsënöpam mikurerqä” nerqanmi. Tsënö niptimpis Diosqa cuentata mañarqanmi (Génesis 3:13, 16, 19). Tsënöllam noqantsikwampis kanqa (Hebreus 4:13).

¿Imataraq rurashwan?

Diosnintsikta kushitsita munar y Biblia nenqannö kawakïta munarqa, Satanaspawan demonionkunapa rurënimpitam paqwë rakikänantsik. Efeso markachö yachaq nunakuna qallan siglochö rurayanqanmi alli yanapamantsik. Mana alli espïritukunapita rakikëta munarmi, brujería libronkunata ëllïkur “nunacunapa nopancho limpu cayecuyarqan” (Hechos 19:19).

Pero manaraq tsëta rurarqa, “mana alli rurayashqancunata[m] llapan nunacuna nopancho willacur” kayarqan (Hechos 19:18). Y Pablu yachatsikonqan shonqunkunayaq chaptinmi libronkunatapis paqwë ushakäratsiyarqan. Tsëmi kuyayanqan costumbrenkunatapis limpu haqiriyarqan.

Wakin nunakunapaqqa alläpa aja o sasaraqmi costumbrenkunata haqiyänan. Qallananchö parlanqantsik James jövenqa Jehoväpa testïgonkunawanmi Bibliapita yachakur qallëkorqan. Yachakïkanqankuna shumaq kaptimpis, rarafono nishqan rurëta manash haqinaqraqtsu. Alli yarpachakïkurqa, Dios änikonqanman markäkur o yärakurpis, mana alli costumbrellachöraq këkanqantam musyarerqan.

¿Imataq yanaparqan tsëkunata haqinampaq? “Tsapämänampaq y pëman markäkunäpaq yanapamänampaqmi Jehoväman mañakorqä, tsëpitanam costumbrëkunata haqirerqä.” ¿Tsë rurëta haqiriptin imallaqa pasarqantsuraq? “Manam” ninmi Jämesqa. “Imam sïqa, Jehoväman más markäkïta o yärakuytam yachakorqö, kananqa musyarerqönam ashipteqa Dios más kuyamänqanta” ninmi. Jämesqa, qanchis watanam Biblia yachatsikonqanta nuna mayinkunata yachëkätsin.

¿Imanirtaq Jämesnö qampis rurankitsu? Markëkichö costumbrekuna Diospaq alli o mana alli kanqantapis rikë (Romanos 12:1, 2). Mana alli kaptenqa, valorta tsarikur tsë rurëkunata haqi. Tsëqa, Jehová ‘chasquishunquim’ y imëkapitapis tsapäshunkim (2 Corintios 6:16-18). Jämesnömi qampis kë textochö nenqan cumplikaqta rikanki: “Jehoväpa shutinqa mana huchoq törrenömi. Tsëman alli nuna qeshpiptenqa, imëkapitapis tsapanmi” (Proverbios 18:10).

[Päginapa ura kuchunchö willakï]

[10 kaq päginachö fötu]

Korokoro

[Pikunapa kanqan]

Kë fötotaqa qomarqontsik Dr. Bakshi Jehangir

[10 kaq päginachö fötu]

Brüjëkuyänanta mantsar, mikï katupinkunata wambra ëllïkan o qorïkan