1. (1) ¿Imata ruranapaqtaq apostol Juan nimantsik? (2) ¿Imanirtaq Jehovä alläpa kuyamanqantsikman pensanantsik?

APOSTOL Juanmi kënö nirqan: “¡Imanömi Tayta Dios cuyaycamantsic llapantsictapis!” (1 Juan 3:1, MTCS). Tsë palabrakunawanmi, Juanqa nimantsik Jehovä alläpa kuyamanqantsikman y imanö rikätsimanqantsikman pensanapaq. Tsëkunaman pensarqa, Dioswanmi alli amïgu kashun y masmi kuyashun.

2. ¿Imanirtaq wakinkunapaqqa Jehovä kuyanqanta creiyänan sasaraq?

² Llakikïpaqqa, wakin nunakuna Jehovä mana kuyanqanta creiyanqanmi. Pëkunapaq Dios mana yarpachakunqanta, imatapis michäkoqlla kanqanta y mana cäsukuyaptinqa castigakoqlla kanqantam creiyan. Wakin religionkunaqa, Diosqa alläpa castigakoq kanqantam yachatsikuyan. Tsëmi mëtsikaq pensayan tsënö kanqampita kuyëta mana puëdinqantsikta. Wakinkunanam pensayan, imata rurakuyaptimpis llapan nunakunata Dios kuyanqanta. Peru noqantsikqa Bibliata estudiarninmi rasumpa kaqta Jehoväpita musyantsik. Yachakurquntsikmi  kuyakoq karnin Tsurinta noqantsikrëkur wanunampaq kachamunqanta (Juan 3:16; 1 Juan 4:8). Tsënö kaptimpis, itsa Jehoväpa wakin sirweqninkunapaqqa sasaraq creiyänan Pë kuyanqanta. Itsa tsënöqa pensayan kawëninkunachö imapis pasakushqa kaptin.

3. ¿Imanirtaq Jehoväqa kuyamantsikmi nintsik?

³ ¿Imanirtaq Jehovä kuyamanqantsikta nintsik? Porqui pëmi kamamarquntsik y kawënintsik qomarquntsik (leyi Salmu 100:3-5 *). Tsëmi Bibliachöqa, Adanpaq “Diospa tsurinmi” nin (Lücas 3:38, NM). Jina Jesuspis imanö mañakunapaq yachatsimarnintsikmi, Jehoväqa teytantsik kanqanta nimarqantsik (Mateu 6:9). Imanömi juk alli teyta wamrankunata kuyan, tsënöllam Jehoväpis kuyamantsik.

4. (1) ¿Imanö Teytataq Jehoväqa? (2) ¿Imakunapitataq kë yachatsikïchö y qateqnin kaqchö yachakushun?

⁴ Wakin nunakunataqa pishillaraq këkäyaptinmi teytankuna alläpa maltratayashqa. Tsëmi juk teyta kuyakoq kanqanman creiyänanqa pëkunapaq sasaraq kanman. Peru Jehoväqa manam imëpis sufritsimantsiktsu. Pëqa mas alli kaq teytantsikmi (Salmu 27:10). Y alläpam kuyamantsik y tukïnöpam cuidamantsik. Y kuyamanqantsikta maslla cuentata qokurqa, masmi kuyashun (Santiägu 4:8). Kë yachatsikïchömi yachakushun Jehovä kuyamanqantsikta chusku formapa imanö rikätsimanqantsikta, y qateqninchönam chusku formapa kuyanqantsikta imanö rikätsinapaq kaqta.

5. ¿Imatataq Jehovä qomantsik?

⁵ Juk kutichö Atenas markata ëwarmi Pabluqa rikarqan mëtsika ïdulukunata. Y nunakunaqa tsë ïdulukuna kawëninkuna qonqantam creiyaq. Tsëmi Pablu nirqan, “que patsata llapan caqnincunatawan” Jehovä Dios ruranqanta. Jina nirqanmi, ‘imecatapis qomarnintsic yanapamanqantsicta y cawenintsicpis qomanqantsicta’ (Hëchus 17:24, 25, 28). Jehoväqa qomantsik kushishqa kawakunapaq llapan wananqantsikkunatam. Wakinllata rikärishun.

6. ¿Kawanapaq Jehovä qomanqantsik Patsaqa imanötaq? (Rikäri kë yachatsikïpa qallananchö këkaq dibüjuta.)

⁶ Tantiyarinapaq, Jehoväqa qomarquntsik juk shumaq sitiutam kawanapaq (Salmu 115:15, 16). Llapan planëtakunata kamanqampitaqa Patsallachötsunchi kawëtaqa puëdintsik. Cientïficukunaqa atska planëtakunatam tariyashqa, peru manam kawëta puëdinapaqtanöqa tariyanraqtsu. Jehoväqa imëkayoqtam kë Patsata kamashqa kawë kanampaq, jina shumaq y yachanëpaq kanampaq, kushishqa y següru kawakunapaqmi rurashqa (Isaïas 45:18). Kë Patsantsik tsënö shumaq kamashqa kanqanman yarpachakurninmi cuentata qokuntsik Jehovä rasumpa kuyamanqantsikta (leyi Job 38:4, 7 * y Salmu 8:3-5 *).

7. ¿Imanötaq juknöpaqa kuyamanqantsikta Jehovä rikätsikurqan?

 ⁷ Jina Jehoväqa kuyamanqantsikta rikätsimarquntsik kikin rikoqta kamamarnintsikmi (Genesis 1:27). Tsëmi, kuyamanqantsikta sientita puëdintsik y kuyëtapis puëdintsik. Jehoväqa musyanmi, tsëkuna rasumpa kushitsimanqantsikta, porqui teytankunapa kuyakïninta sientirninmi wamrakuna kushishqa kayan. Jinamampis, Jesusmi nirqan “Diosta wanar asheq kaqkunaqa” kushishqa kayänampaq kaqta (Mateu 5:3, NM). Bibliam nin: “Pemi qomantsic imecatapis atsca atscata probechuntsicpaq” (1 Timoteu 6:17). Clärum këkan Jehoväqa shonqupita patsë qarakoq kanqanqa y kuyamanqantsikqa (Salmu 145:16).

8. ¿Imanirtaq Jehovä yachatsimänantsikta munantsik?

⁸ Juk alli teytaqa wamrankunata kuyarnin y alli kawayänanta munarmi alleq  yachatsita procuran. Peru mëtsikaq teytakunam kanan witsanqa Biblia ninqanta respetayantsu. Tsëmi ima alli kanqanta y ima mana alli kanqanta wamrankunata yachatsita puëdiyantsu. Tsërëkurmi wamrankunaqa ima alli y ima mana alli kanqantaqa alleqllaqa musyayantsu y kushishqatsu kawayan (Proverbius 14:12). Peru Jehoväqa alli yachatsikïtam wamrankunata qon, porqui ‘rasumpa kaqpa Diosninmi’ (Salmu 31:5). Pëmi yachatsimantsik pëpita rasumpa kaqta, y imanö adoranata munanqantapis. Jina yachatsimantsikmi imanö mas alli kawakunapaq kaqta (leyi Salmu 43:3 *). ¿Imakunatataq Jehovä yachatsimarquntsik kuyamarnintsik? Rikärishun.

9, 10. (1) ¿Imanirtaq Jehoväqa kikimpita yachatsimantsik? (2) ¿Imakunatataq Jehoväqa noqantsikpita yachatsimantsik?

⁹ Jehoväqa kikimpitam precisaqkunata yachatsimantsik, porqui munan alleq reqinantsiktam (Santiägu 4:8, NM). Tsëmi jutin ima kanqanta yachatsimantsik. Jutinqa wakin jutikunapitapis masmi Bibliachö yurin. Y yachatsimantsikmi imanö Dios kanqanta. Tantiyarinapaq, kamashqankunata rikarninqa alläpa yachaq y poderösu kanqantam cuentata qokuntsik (Romänus 1:20). Jina Bibliata leyirninmi, alli ruraq kanqanta y kuyamanqantsikta musyantsik. Jehoväta mas reqirqa masmi pëman witishun.

¹⁰ Jina Jehoväqa noqantsikpitapis precisaqkunatam yachatsimantsik. Y nimantsik familiampita kanqantsiktam. Jina yamë y juknölla imanö sirwinapaqmi entienditsimantsik. Jehoväqa manam, ima alli o ima mana alli kanqanta kikintsik decidinapaqtsu kamamarquntsik (Jeremïas 10:23). Jehoväqa musyanmi noqantsikpaq ima mas alli kanqanta. Tsëmi, nimanqantsikkunata wiyakurlla y respetarninlla, kushishqa y yamë kawakushun. Jehoväqa kuyamarnintsikmi kë precisaqta yachatsimarquntsik.

11. ¿Imatataq shamoq tiempupaq Jehovä änimantsik?

¹¹ Juk alli teytaqa shamoq tiempuchö wamrampa kawënin imanö kanampaq kaqmanmi yarpachakun y kushishqa kanantam munan. Peru kanan witsanqa mëtsikaq nunakunam musyayantsu shamoq tiempuchö imapa pasayänampaq kaqta. Tsëmi, ushakaq cösaskunata tariyänampaq trabajarlla kakuyan (Salmu 90:10). Peru Jehoväta sirweqkunaqa alläpam agradecikuntsik kanan witsan kushishqa kawakunapaq Jehovä yachatsimanqantsikpita y shamoq tiempupaq shumaq kawakïta änimanqantsikpita.

12. ¿Imanötaq Caintawan Baructa Jehovä yanapëta procurarqan?

¹² Jutsata ruranampaqna Cain këkaptinmi, Jehoväqa yanapëta procurarqan. Piñakïninta dominanampaq y mana alli pensëninta cambianampaqmi nirqan. Consejanqanta wiyakuptinqa, bendicinanmi karqan (Genesis 4:6, 7). Peru Cainqa manam wiyakurqantsu y tsërëkurmi alläpa  sufrirqan (Genesis 4:11-13). Juk kutichönam, sirweqnin Baructa alläpa utishqata y mana alli pensëyoqta Jehovä rikarqan. Tsëmi pensëninta cambianampaq consejarqan. Barucqa wiyakurqanmi, y tsërëkurmi salvakurqan (Jeremïas 45:2-5).

13. ¿Imapaqtaq Jehoväpa sirweqninkunata yanaparqan problëmakunapa pasayanqan?

¹³ Jehoväqa kuyamarnintsikmi yachatsimantsik y piñapämantsik. Manam pantanqantsik hörallatsu piñapämantsik, sinöqa mas alli nuna kanantsikpaqmi imëpis yanapamantsik (Hebrëus 12:6). Jehoväqa unë tiempuchö sirweqninkunatapis mas alliyäyänampaqmi yanaparqan. Tantiyarinapaq, Josë, Moises y David sirweqninkuna problëmakunapa pasayänantam permitirqan. Tsë problëmakunapa pasarnin yachakuyanqanmi yanaparqan, mas cargukunata Jehovä qoptin mas alli rurayänampaq. Sirweqninkunata problëmakunachö yanapanqampita y mas alli nuna kayänampaq Jehovä yanapanqampita Bibliachö leyirninqa mas clärum rikantsik alläpa kuyamanqantsikta (leyi Proverbius 3:11, 12 *).

14. ¿Imanötaq kuyamanqantsikta Jehovä rikätsimantsik jutsaman ishkirishqapis?

¹⁴ Alli tantiyatsir yachatsimanqantsikta chaskikushqaqa, jutsaman ishkirishqapis kuyamanqantsiktam Jehoväqa rikätsimantsik. Profëta Isaïasmi nirqan Jehoväqa ‘chipyëpa perdonakoq’ kanqanta (Isaïas 55:7). Y rey Davidnam Jehoväpaq kënö nirqan: “Pëqa llapan jutsëkitam perdonëkan. Llapan nanatsikïnikikunatam kachakëkätsin. Pamparanqëkipitam kawënikita salvëkan, rasumpa kuyakïwanmi y llakipäkïwanmi shumaqyëkätsishunki” (Salmu 103:3, 4, 12). Rikanqantsiknömi Jehoväqa perdonamänapaq listu këkan. Peru noqantsikmi yanapamanqantsikta y piñapämanqantsikta chaskikunantsik y kawënintsikchö cambiukunata ruranantsik. Yarpäshun, Jehoväqa kuyamarnintsikmi piñapämantsik (Salmu 30:5).

15. ¿Imanö mastaq Jehoväqa kuyamanqantsikta rikätsimantsik?

¹⁵ Juk alli teytaqa wamrankunatam peligrukunapita tsapan. Tsënömi Jehoväqa peligrukunapita tsapämantsik. Salmu 97:10 textum willakun, sirweqninkunapa kawëninta y mana alli nunakunapita Jehovä tsapanqanta. Këllaman pensarishun, imapis nawintsikta tukshïta munaptinqa rasmi tsapakuntsik. Tsënöllam Jehoväpis, ima peligrupitapis raslla tsapäramantsik. Tsënöqa tsapämantsik kuyamarnintsikmi (leyi Zacarïas 2:8 *).

16, 17. ¿Imanötaq Jehoväqa sirweqninkunata mana allikunapita tsapan?

¹⁶ Jehoväqa imëpis angelninkunawanmi sirweqninkunata peligrukunapita tsapashqa (Salmu 91:11). Këllata yarpärishun,  Diospa markanta salvananrëkurmi juk paqasllachö 185 mil soldädukunata juk angel wanuratsirqan (2 Rëyes 19:35). Apostolkuna kawayanqan witsampis Pëdruta, Pabluta y wakin cristiänukunatam angelkuna carcelpita jorqayarqan (Hëchus 5:18-20; 12:6-11). Jina yarpärishun Africapa juk nacionninchö guërra kanqanman. Tsë entëru nacionpam pelya kaq, suwakï kaq, violakï kaq y wanutsinakïmi kaq. Manam ni jukllëllapis Testïgukunaqa wanuyarqantsu, peru alläpam sufriyarqan y waktsam quedayarqan. Tsënö këkarpis pëkunaqa Jehovä cuidëkanqantam sientiyarqan y kushishqam kayarqan. Y Jehoväpa testïgunkunapa principal oficïnanpitam juk wawqi watukaq ëwarqan, y imanö këkäyanqanta tapuptinmi, Jehovä yanapaptin alli këkäyanqanta niyarqan.

¹⁷ Awmi, Jehoväpa wakin sirweqninkunaqa alli tsarakuyanqampitam wanuyashqa. Tsënö tsarakuyanqampitam discïpulu Estëban y wakinkunapis wanuyarqan. Tsëmi rikätsimantsik höraqa sirweqninkunata wanïpita Jehovä mana tsapanqanta. Peru grupïpaqa markanta tsapanmi. ¿Imanö? Satanaspa trampanman mana ishkiyänampaq puntallapitana willarnin (Efesius 6:10-12). Tsë willakïkunataqa Bibliachö y Jehoväpa markan jorqamushqan publicacionkunachömi tarita puëdintsik. Tantiyarinapaq, Jehovämi puntallapitana willamantsik Internetchö peligrukunapita, qellë kuyëpita, oqllanakur ruranakïta munapätsikoq y maqanakïkunata rikätsikoq pelïculakunapita, librukunapita, y vidëujuegukunapita cuidakunapaq. Tsëkunam cläru rikätsimantsik Jehovä kuyamanqantsikta y mana allikunapita tsapämënintsikta munanqanta.

18. ¿Imanötaq sientikuntsik Jehovä kuyamanqantsikta musyarnin?

¹⁸ Jehoväta sirwinqan watakunaman pensarmi Moisesqa següru karqan Jehovä kuyanqanta. Tsëmi kënö nirqan: “Alläpa alli kënikiwan cada qoya wanayanqäta qoyämë, tsënöpa kushishqa alabayänäpaq y llapan kawënïkunachö kushishqa kayänäpaq” (Salmu 90:14). Jina yarpäshun apostol Juan kënö ninqanta: “¡Imanömi Tayta Dios cuyaycamantsic llapantsictapis!” (1 Juan 3:1, MTCS). ¡Jehovä kuyamanqantsikta musyanqantsik y sientinqantsikqa manam imawampis igualantsu!